तळेगावात पाणीप्रश्नावर मोठा दिलासा; आमदार सुनील शेळके यांच्या पुढाकारातून यशवंत नगर जलशुद्धीकरण केंद्राचे लोकार्पण

Maval News : आमदार सुनील शेळके यांच्या उपस्थितीत पार पडलेल्या या कार्यक्रमामुळे स्टेशन परिसरातील नागरिकांना स्वच्छ व मुबलक पाणी उपलब्ध होण्याचा मार्ग मोकळा झाला

Maval News : वडगाव मावळ: सतिश गाडे : तळेगाव दाभाडे येथे अनेक वर्षांपासून प्रलंबित असलेल्या पिण्याच्या पाण्याच्या समस्येला अखेर मोठा दिलासा मिळाला असून, नगरपरिषदेच्या माध्यमातून यशवंत नगर येथे ३ एमएलडी क्षमतेच्या जलशुद्धीकरण केंद्राचे लोकार्पण आज उत्साहात संपन्न झाले. आमदार सुनील शेळके (Sunil Shelke) यांच्या उपस्थितीत पार पडलेल्या या कार्यक्रमामुळे स्टेशन परिसरातील नागरिकांना स्वच्छ व मुबलक पाणी उपलब्ध होण्याचा मार्ग मोकळा झाला आहे. नगरपरिषदेच्या सुमारे १ कोटी ३५ लाख रुपयांच्या निधीतून उभारण्यात आलेल्या या प्रकल्पामुळे सत्यकमल कॉलनी, म्हाडा कॉलनी, रेनो कॉलनी, स्टेशन चौक आणि यशवंत नगर परिसरातील पाणीपुरवठा अधिक सक्षम होणार असून चौराई येथील मुख्य जलशुद्धीकरण प्रकल्पावरील ताणही कमी होणार आहे.

स्टेशन भागातील नागरिकांना पाण्यासाठी दररोज करावी लागणारी कसरत लक्षात घेऊन हा प्रकल्प साकारण्यात आला असल्याचे सांगताना आमदार शेळके यांनी नागरिकांच्या मूलभूत गरजांना प्राधान्य देण्याचा आपला संकल्प पुन्हा अधोरेखित केला. तसेच तळेगाव स्टेशन परिसरासाठी आंद्रा धरणातून बंदिस्त पाईपलाईन योजनेला अंतिम टप्प्यात मंजुरी मिळत असून, लवकरच या योजनेची कामेही सुरू होणार असल्याने भविष्यात पाणीटंचाईचा प्रश्न पूर्णतः मार्गी लागणार असल्याचा विश्वास व्यक्त करण्यात आला.

हे देखील वाचा : नांदेड शहरावर गुन्हेगारीचे सावट झाले गडद; गँगवॉरमुळे शहराची शांतता आली धोक्यात

दरम्यान, वर्षानुवर्षे प्रलंबित असलेला पाणीप्रश्न सुटल्याने स्थानिक नागरिकांनी समाधान व्यक्त करत आमदार सुनील शेळके यांचे आभार मानले. या लोकार्पण सोहळ्यास नगराध्यक्ष संतोषभाऊ दाभाडे, सुरेशभाऊ चौधरी, नाना कारके, दर्शनदादा खांडगे, गणेशजी काकडे, सुरेशजी धोत्रे, इंदरजी ओसवाल यांसह नगरसेवक व मोठ्या संख्येने नागरिक उपस्थित होते.

पाणीपुरवठा व्यवस्थेला मिळणार नवे बळ

या जलशुद्धीकरण केंद्रामुळे तळेगावातील पाणीपुरवठा व्यवस्थेला आधुनिक तंत्रज्ञानाची जोड मिळणार आहे. शुद्धीकरण प्रक्रियेमुळे नागरिकांना आरोग्यदायी व सुरक्षित पाणी मिळणार असून, दूषित पाण्यामुळे होणाऱ्या आजारांमध्येही घट होण्याची अपेक्षा व्यक्त केली जात आहे.

भविष्यातील वाढत्या गरजांचा विचार

तळेगाव परिसरात वाढती लोकसंख्या आणि औद्योगिक विकास लक्षात घेता भविष्यातील पाणी गरजांचा विचार करून हा प्रकल्प उभारण्यात आला आहे. त्यामुळे पुढील काही वर्षे पाणीपुरवठा अधिक सुरळीत राहणार असून, नव्याने विकसित होणाऱ्या भागांनाही याचा फायदा होणार आहे.

हे देखील वाचा : शेवटच्या निर्णायक क्षणी सुनेत्रा पवारांचा राजकीय डाव; बारामतीसाठी सुनेत्रा पवारांचा थेट काँग्रेस प्रदेशाध्यांना फोन


नागरिकांच्या सहभागावर भर
या प्रकल्पाच्या यशस्वी अंमलबजावणीसाठी नागरिकांनीही पाणी जपून वापरणे, गळती रोखणे आणि पाणी व्यवस्थापनात सहकार्य करणे आवश्यक असल्याचे आवाहन यावेळी करण्यात आले. नगरपरिषदेच्या वतीने पाणी बचतीबाबत जनजागृती उपक्रमही राबविण्यात येणार असल्याची माहिती देण्यात आली.
स्थानिक पातळीवर सकारात्मक प्रतिसाद
लोकार्पणानंतर नागरिकांनी समाधान व्यक्त करत हा प्रकल्प तळेगावसाठी महत्त्वाचा टप्पा असल्याचे सांगितले. अनेक वर्षांपासून भेडसावत असलेल्या पाणीटंचाईच्या समस्येवर कायमस्वरूपी उपाययोजना होत असल्याने नागरिकांमध्ये आनंदाचे वातावरण पाहायला मिळाले.