नाट्यगृहांच्या ऑनलाईन आरक्षणाला विरोध; नाट्य व्यवस्थापक संघाचे महापौरांना निवेदन

मराठी नाट्यव्यवस्थापन संघाने रंगयात्रा ॲपद्वारे होणाऱ्या सांस्कृतिक भवनांच्या तारखांचे ऑनलाईन आरक्षण बंद करण्याची मागणी करत महापौर मंजुषा नागपुरे यांना निवेदन दिले आहे.

• नाट्यगृहांच्या ऑनलाईन आरक्षणाला विरोध
• नाट्य व्यवस्थापक संघाचे महापौरांना निवेदन
• नाट्यसंस्थांना प्राधान्याची मागणी

पुणे : मराठी नाट्यव्यवस्थापन संघाने रंगयात्रा ॲपद्वारे होणाऱ्या सांस्कृतिक भवनांच्या तारखांचे ऑनलाईन आरक्षण बंद करण्याची मागणी करत महापौर मंजुषा नागपुरे यांना निवेदन दिले आहे. ऑनलाईन आरक्षणामुळे राजकीय वर्चस्व असलेल्या सामाजिक संस्थांना सोय होऊन नाट्यसंस्थांना कमी तारखा मिळण्याची शक्यता असल्याचे निवेदनात नमूद करण्यात आले आहे. तसेच नाट्यगृहांमध्ये नाट्यप्रयोगांऐवजी इतर कार्यक्रम वाढण्याची भीतीही व्यक्त करण्यात आली आहे.

 

अखिल भारतीय मराठी नाट्य परिषदेचे अध्यक्ष प्रशांत दामले यांच्या हस्ते हे निवेदन सादर करण्यात आले. यावेळी अभिनेते उमेश कामत, नाट्यनिर्माते प्रसाद कांबळी, नाट्य व्यवस्थापक संघाचे सुनील महाजन, सत्यजित धांडेकर, प्रवीण बर्वे, समीर हंपी, श्रीपाद पद्माकर तसेच नगरसेवक पृथ्वीराज सुतार उपस्थित होते.

निवेदनात नमूद करण्यात आले आहे की, नाट्यसंस्थेशिवाय इतर खाजगी व्यावसायिक संस्था आर्थिक बळावर ऑनलाईन बुकिंग करून नाट्यव्यवसाय अडचणीत आणू शकतात. नाटकांच्या तिकिटांसाठी ऑनलाईन सुविधा उपयुक्त असली तरी नाट्यगृहांच्या आरक्षणासाठी ती गरजेची नसल्याचे संघाचे मत आहे.

मराठी नाट्यव्यवस्थापक संघाच्या मागण्या

• मागील चौमाहीतील कार्यक्रमांच्या प्रमाणावर पुढील चौमाहीत तारखांचे वाटप करावे. ऑनलाईन आरक्षण बंद करून लेखी अर्जाची प्रक्रिया सुरू करावी.
• बालगंधर्व रंगमंदिर, यशवंतराव चव्हाण नाट्यगृह, अण्णा भाऊ साठे नाट्यगृह, गणेश कला क्रीडा मंच, विठ्ठलराव तुपे नाट्यगृह येथे नाट्यसंस्थांना प्राधान्य द्यावे.
• नाट्यगृहांची माहिती (स्टेजचा आकार, आसन क्षमता, भाडे, लोकेशन) ऑनलाईन उपलब्ध असावी; मात्र तारखांचे ऑनलाईन बुकिंग करू नये.

बालगंधर्व रंगमंदिर व्यावसायिक सभागृह होऊ नये

निवेदनात म्हटले आहे की, बालगंधर्व रंगमंदिर हे पुण्यातील प्रमुख सांस्कृतिक केंद्र असून ते रंगमंदिरच राहावे. ऑनलाईन आरक्षणामुळे कोणत्या कार्यक्रमासाठी नाट्यगृह वापरले जाणार आहे, याची माहिती स्पष्ट होत नाही. लेखी अर्ज प्रक्रियेमुळे कार्यक्रमाचा उद्देश स्पष्ट होऊ शकतो.

“पुढील चौमाहीचे ऑनलाईन आरक्षण अद्याप सुरू झालेले नाही. प्राप्त झालेल्या लेखी अर्जांची पडताळणी करून त्यानुसार तारखा दिल्या जातील.” — राजेश कामठे, नाट्यगृह व्यवस्थापक, पुणे महानगरपालिका.

हे सुद्धा वाचा : पिंपरीत नवनियुक्त आयुक्तांचा ‘दणका’; अवैध बांधकामांना अभय देणाऱ्या दोन अभियंत्यांचे निलंबन