‘पुणे पोलिसांनी अद्याप परवानगी दिलेली नसली तरी…’ MPSC विद्यार्थ्यांच्या आंदोलनावर Rohit Pawar यांची भूमिका

Rohit Pawar: विद्यार्थ्यांमध्ये कोणताही गट पडलेला नाही. मुख्यमंत्र्यांसोबत चर्चेसाठी गेलेल्या विद्यार्थ्यांमध्ये काही क्लासचालक होते आणि त्यांना फसवून नेण्यात आले, असा आरोप पवार यांनी केला.

• २७ सप्टेंबरला सकाळी दहा वाजता गरवारे रोडवर ठिय्या आंदोलन
  
• पुणे पोलिसांनी अद्याप आंदोलनाला दिली नाही परवानगी
  
• सरकारने विद्यार्थ्यांच्या १५ सदस्यांच्या शिष्टमंडळाशी चर्चा करण्याची मागणी 

पुणे/Rohit Pawar: एमपीएससी विद्यार्थ्यांच्या विविध मागण्यांसाठी २७ सप्टेंबरला सकाळी दहा वाजता गरवारे रोडवर ठिय्या आंदोलन करण्यात येणार असून, त्यापूर्वी सरकारने (MPSC) विद्यार्थ्यांच्या १५ सदस्यांच्या शिष्टमंडळाशी चर्चा करावी, अशी मागणी आमदार रोहित पवार यांनी मंगळवारी पत्रकार परिषदेत केली. आंदोलनासाठी पुणे पोलिसांनी अद्याप परवानगी दिलेली नसली तरी आंदोलन होणारच, अशी भूमिका त्यांनी मांडली.

विद्यार्थ्यांनी २६ सप्टेंबरला आंदोलनाची घोषणा केली होती. मात्र, गणेशोत्सवाच्या पार्श्वभूमीवर त्या दिवशी आंदोलन करता येणार नसल्याचे पोलिसांनी सांगितले. त्यामुळे २७ सप्टेंबरला आंदोलन करण्याचा निर्णय घेण्यात आला आहे. आंदोलन किती दिवस चालेल, हे निश्चित नसून ठिय्या आंदोलन करण्यात येणार आहे. काही विद्यार्थी उपोषणाच्या तयारीत असल्याचेही पवार यांनी सांगितले.

MPSC JOB : पोरांनो अभ्यासाला लागा ! आतापर्यंतची विक्रम मोडणारी भरती होणार; मुख्यमंत्री देवेंद्र फडणवीस यांची माहिती

एमपीएससी अध्यक्ष विवेक भीमनवार यांचा राजीनामा, तुकाराम मुंढे आणि सुनील गेडाम यांची आयोगाच्या अध्यक्षपदी नियुक्ती, परीक्षा ऑफलाइन पद्धतीने घेणे आणि ७० हजार पदांची भरती प्रक्रिया सुरू करणे यासह विद्यार्थ्यांच्या पाच मागण्या असल्याचे पवार यांनी सांगितले. आयोगाच्या अध्यक्षांविरोधातील पुरावे मुख्यमंत्री देवेंद्र फडणवीस यांच्याकडे देणार असल्याचेही त्यांनी स्पष्ट केले. या मागण्या मान्य झाल्यास सरकारचा जाहीर सत्कार करू, असेही त्यांनी नमूद केले.

विद्यार्थ्यांमध्ये कोणताही गट पडलेला नाही. मुख्यमंत्र्यांसोबत चर्चेसाठी गेलेल्या विद्यार्थ्यांमध्ये काही क्लासचालक होते आणि त्यांना फसवून नेण्यात आले, असा आरोप पवार यांनी केला. आंदोलनाशी संबंधित सुमारे ७० ते ८० विद्यार्थ्यांना पोलिसांच्या नोटिसा देण्यात आल्याचा दावाही त्यांनी केला. विद्यार्थ्यांचे आंदोलन दडपण्याचा प्रयत्न होत असल्याचा आरोप त्यांनी केला.

दरम्यान, काँग्रेसचे पदाधिकारी बुधवारी दिल्लीला जाणार असून, काँग्रेस नेते राहुल गांधी यांनी एमपीएससी विद्यार्थ्यांच्या आंदोलनात सहभागी व्हावे, अशी विनंती त्यांना करण्यात येणार आहे. राहुल गांधी प्रत्यक्ष आंदोलनस्थळी येण्याची शक्यता असल्याची माहिती पोलिसांना दिल्याचे पवार यांनी सांगितले. पेपरफुटीच्या आधीच राधा समिती स्थापन करण्यात आली होती. समितीकडून टप्प्याटप्प्याने ऑनलाइन परीक्षा घेण्याबाबत भूमिका मांडली जात असल्याने विद्यार्थ्यांमध्ये नाराजी असल्याचे पवार म्हणाले.

MPSC Paper Leak : रोहित पवार पुन्हा आक्रमक; 26 सप्टेंबरला पुण्यात आंदोलन, भीमनवारांच्या राजीनाम्याची मागणी

मराठवाड्यातील अतिवृष्टीवरूनही सरकारला सवाल

मराठवाड्यातील अतिवृष्टी आणि पीक नुकसानीवरूनही पवार यांनी सरकारवर प्रश्न उपस्थित केले. मराठवाड्यात सुमारे ३५ हजार कोटी, तर राज्यात ८० हजार कोटी रुपयांचे नुकसान झाल्याचा दावा त्यांनी केला. एकरी साडेआठ हजार रुपये मदत दिली तर उर्वरित नुकसानभरपाईचे काय, असा सवाल त्यांनी केला. पीकविमा कंपन्यांकडून शेतकऱ्यांना पैसे मिळाले नसल्याचा आरोपही त्यांनी केला.

मुख्यमंत्र्यांनी सर्वपक्षीय शिष्टमंडळ तयार करून शरद पवार यांच्यासह काँग्रेसच्या नेत्यांना त्यात सहभागी करून पंतप्रधान नरेंद्र मोदी यांची भेट घ्यावी, अशी मागणीही पवार यांनी केली. अलनिनोचे संकट मार्च २०२७ पर्यंत राहण्याची शक्यता असल्याचे आपण मुख्यमंत्र्यांना यापूर्वीच सांगितले होते, असेही त्यांनी नमूद केले.