विजय शिवतारे यांच्या उपस्थितीत सिंचन भवन येथे बेठक संपन्न; अधिकाऱ्यांना दिल्या महत्वाच्या सूचना
सासवड : पुरंदर उपसा सिंचन योजनेला ४ टीएमसी पाणी सिंचनासाठी उचलण्यास परवानगी आहे. परंतु जलसंपदा विभाग योजना कार्यान्वित झाल्यापासून २ टीएमसी पेक्षा अधिक पाणी उचलू शकेलला नाही, ही बाब लक्षात घेऊन तांत्रिक दोष आणि जास्तीत जास्त जलवाहिन्याचे जाळे निर्माण करून पूर्ण क्षमतेने उपसा सिंचन योजना चालवावी. त्यासाठी आवश्यक निधी शासनाकडून आणू, असे प्रतिपादन आमदार विजय शिवतारे यांनी केले आहे. सिंचन भवन येथे आमदार शिवतारे यांच्या उपस्थितीत पुरंदर उपसा योजना, कऱ्हा नीरा नदीजोड प्रकल्प व अन्य विषयांवर बैठक पार पडली. यावेळी त्यांनी उपसा योजनेच्या अधिकाऱ्यांना सूचना केल्या आहेत.
या बैठकीला शिवतारे यांच्यासह मुख्य अभियंता हेमंत धुमाळ, अधिक्षक अभियंता जैस्वाल, कार्यकारी अभियंता अशोक शेटे, राजेंद्र दुबल यांच्यासह शिवसेनेचे पुरंदर तालुकाप्रमुख हरीभाऊ लोळे, गणेशराव मुळीक, विक्रांत पवार, आड. नितीन कुंजीर, सामाजिक कार्यकर्ते तात्या मगर, अविनाश बडदे, विशाल लवांडे, दिपक काळे, उमेश काळे, सागर यादव यांसह ग्रामस्थ उपस्थित होते.
नदीजोड प्रकल्पाच्या आराखड्याचे सादरीकरण
आमदार शिवतारे यांनी प्रस्तावित केलेल्या कऱ्हा नीरा नदीजोड प्रकल्पाच्या प्राथमिक आराखड्याचे जलसंपदा विभागाच्या अधिकाऱ्यांनी सादरीकरण केले. त्यात शिवतारे यांनी काही दुरुस्त्या प्रस्तावित केल्या. याशिवाय पुरंदर उपसा योजनेचे पंप कचरा, जलपर्णी व प्लास्टिक यामुळे मोठ्या प्रमाणात नादुरुस्त होत असल्याच्या पार्श्वभूमीवर मुंबईतील मिठी नदीच्या स्वच्छतेसाठी वापरण्यात येत असलेले तंत्रज्ञान प्रत्यक्ष पाहून घ्यावे, अशा सूचना शिवतारे यांनी दिल्या आहेत. योजनेच्या देखभाल दुरुस्तीचे काम करणारी यंत्रणा अत्यंत दर्जाहीन आणि संथ असल्याने त्यावर तातडीने कार्यवाही करावी, असेही शिवतारे यांनी यावेळी सांगितले.
यंदा अतिरिक्त ३० कोटींचा निधी मिळणार
दरम्यान गुंजवणी प्रकल्पाच्या सुधारित मान्यता प्रस्ताव आणि निधी उपलब्धतेबाबत तातडीने कार्यवाही करावी, असेही शिवतारे यांनी यावेळी सुचित केले. पुरंदर उपसा योजनेचे तलाव जोडण्यासाठी यंदा अतिरिक्त ३० कोटींचा निधी मिळणार असून पूर्व भागातील राजुरी, रिसे, पिसे, नायगाव आणि पांडेश्वर या गावांनाही पुरंदर उपसाचा नियमित लाभ मिळण्यासाठी ठोस कार्यवाही करावी, असे शिवतारे यांनी सांगितले.
.png "Videos"){kind=small}
