पगार न दिल्याने नगरपालिका कर्मचाऱ्याची आत्महत्येची धमकी; व्हिडिओ व्हायरल होताच काही मिनिटात पगार जमा

विशेष म्हणजे काही दिवसांपूर्वीच सासवडला पाणी पुरवठा करणाऱ्या पाईप लाईनच्या ऑलमध्ये एक मेलेले कुत्रे अतिशय कुजलेल्या अवस्थेत आढळून आले आणि त्याभोवती हजारो आळ्या आणि किडे जमल्याचे देखील दिसून आले.

सासवड : सासवड नगरपरिषदेची सध्याची अवस्था खूपच दयनीय झाली असून, प्रशासनाचा सावळा गोंधळ पावलोपावली दिसून येत आहे. प्रशासनाची कामे करूनही पैसे मिळत नसल्याने ठेकेदार जाम वैतागले आहेत. याचाच अनुभव आला आणि संपूर्ण सासवड शहरात एकच खळबळ उडाली. पाणी पुरवठा विभागातील एका कर्मचाऱ्याचा सुमारे पाच महिन्याचा पगार न मिळाल्याने त्याने थेट पाणीच बंद करून मला त्रास दिल्यास आत्महत्या करणार असा इशारा दिला. त्यावेळी त्याने स्वतःचा व्हिडिओ तयार करून सोशल मीडियावर प्रसारित केला. व्हिडिओ व्हायरल होताच संपूर्ण शहरात आणि तालुक्यात खळबळ उडाली. त्यानंतर काही वेळातच ठेकेदाराने संबंधित कर्मचाऱ्याला 77 हजार रुपये पगार दिला.

सासवड नगर पालिकेच्या पाणी पुरवठा विभागातील कंत्राटी कामगार प्रकाश यादव यांनी प्रशासनाकडे वारंवार पाठपुरावा करूनही सुमारे पाच महिन्यांचा पगारच दिला नाही. यामुळे वैतागलेल्या कर्मचाऱ्याने पाणी पुरवठा विभागातील विद्युत पंप ठेवलेल्या खोलीत जाऊन, मला पाच महिन्यांचा पगार मिळाला नाही. त्यामुळे मी आजपासून पाणी बंद करत आहे, असे म्हणून सर्व पंप बंद केले. तसेच मला कोणी त्रास देण्याचा प्रयत्न केल्यास याच ठिकाणी छताला गळफास घेऊन आत्महत्या करणार असा इशारा दिला. विशेष म्हणजे यावेळी त्याने स्वतःचा व्हिडिओ तयार करून सोशल मीडियावर व्हायरल केला.

दरम्यान, संबंधित व्हिडिओ सोशल मीडियावर प्रसारित होताच सर्वत्र एकच खळबळ उडाली. सासवड नगरपालिका प्रशासन खडबडून जागे झाले. प्रशासनाने याची गंभीरपणे दखल घेत संबंधित ठेकेदाराला देखील चांगलेच सुनावले असावे असा अंदाज आहे. त्यानंतर संबंधित ठेकेदाराने कर्मचाऱ्याची तातडीने भेट घेऊन त्याची समजूत काढली. आणि त्याचा पाच महिन्यांचा सुमारे ७७ हजार रुपये पगार हातात दिला. त्यानंतर संबंधित कर्मचाऱ्याने पुन्हा नव्याने व्हिडिओ बनवून मला ठेकेदाराने पाच महिन्यांचे पैसे दिले असून, आता माझी काहीही तक्रार नाही, असे सांगितले. आणि तसा व्हिडिओ पुन्हा समाज माध्यमावर प्रसारित केला.

आत्महत्येच्या इशाऱ्यानंतर प्रशासन जागे

अर्थात संबंधित कर्मचाऱ्याला स्वतःच केलेल्या कामाचा पगार मिळवण्यासाठी संपूर्ण सासवड शहराचा पाणी पुरवठा काही वेळ का होईना पण बंद करावा लागला, एवढेच नाही तर मला त्रास दिल्यास थेट आत्महत्या करण्याचा इशारा द्यावा लागला. त्यानंतरच प्रशासन जागे झाले आहे. त्यामुळे अगोदरच चर्चेत असलेल्या प्रशासनाच्या सावळ्या गोंधळाचा संपूर्ण तालुक्याला चांगलाच अनुभव आला आहे.

विशेष म्हणजे काही दिवसांपूर्वीच सासवडला पाणी पुरवठा करणाऱ्या पाईप लाईनच्या ऑलमध्ये एक मेलेले कुत्रे अतिशय कुजलेल्या अवस्थेत आढळून आले आणि त्याभोवती हजारो आळ्या आणि किडे जमल्याचे देखील दिसून आले. याची दखल स्वतः आमदार विजय शिवतारे यांनी घेतल्यानंतर काही वेळातच प्रशासन भानावर आले आणि त्यांनी तेथील स्वच्छता करून वादावर पडदा टाकण्याचा प्रयत्न केला. मात्र, यातून एक गोष्ट प्राधान्याने समोर आली आणि ती म्हणजे प्रशासनाला जागेवर आणायचे असेल तर काही तरी वेगळ्या मार्गाने जावे लागते. परंतु हे किती दिवस चालणार ? असा प्रश्न आता सासवडकर नागरिक उपस्थित करीत आहेत.

Hingoli Earthquake : गडगडाट अन् जमीन हादरली ! हिंगोलीत दोन तासांत दोन भूकंपाचे धक्के; 4.5 तीव्रतेचा भूकंप, नागरिकांमध्ये भीती