निवासी डॉक्टरांच्या संपाचा ससूनच्या नियमित सेवांवर परिणाम; मोठ्या-लहान शस्त्रक्रिया घटल्या

मोठ्या शस्त्रक्रियांवर संपाचा सर्वाधिक परिणाम झाला. नियमितपणे दररोज सरासरी ५७ मोठ्या शस्त्रक्रिया होत असताना ५ ऑगस्ट रोजी केवळ १६ आणि ६ ऑगस्ट रोजी ३२ शस्त्रक्रिया पार पडल्या.

पुणे : निवासी डॉक्टरांच्या संपाचा फटका ससून सर्वोपचार रुग्णालयातील नियमित आरोग्यसेवांना बसल्याचे आकडेवारीतून स्पष्ट झाले आहे. विशेषतः नियोजित मोठ्या आणि लहान शस्त्रक्रियांची संख्या लक्षणीय घटली. मात्र, आपत्कालीन सेवा, अतिदक्षता विभाग आणि गंभीर रुग्णांवरील उपचार सुरू ठेवण्यात रुग्णालय प्रशासनाला यश आले.

संपाच्या काळात बाह्यरुग्ण विभागातील (ओपीडी) रुग्णसंख्या काही प्रमाणात चढ-उताराची राहिली. नियमितपणे दररोज सरासरी १६२९ रुग्ण ओपीडीमध्ये येत असताना ५ ऑगस्ट रोजी दुपारी १ वाजेपर्यंत १४४७ रुग्णांनी उपचार घेतले. त्यानंतर ६ ऑगस्ट रोजी ही संख्या वाढून २१८७ वर पोहोचली. आंतरगृह रुग्ण विभागात (आयपीडी) नियमित सरासरी १०३६ रुग्ण दाखल होत असताना ५ ऑगस्ट रोजी १०२२ आणि ६ ऑगस्ट रोजी १०१७ रुग्ण दाखल झाले.

मोठ्या शस्त्रक्रियांवर संपाचा सर्वाधिक परिणाम झाला. नियमितपणे दररोज सरासरी ५७ मोठ्या शस्त्रक्रिया होत असताना ५ ऑगस्ट रोजी केवळ १६ आणि ६ ऑगस्ट रोजी ३२ शस्त्रक्रिया पार पडल्या. लहान शस्त्रक्रियांची संख्याही सरासरी १५९ वरून अनुक्रमे ३३ आणि ६३ इतकी घसरली. प्रसूती सेवांमध्येही काही प्रमाणात घट झाली असून ५ ऑगस्ट रोजी १० आणि ६ ऑगस्ट रोजी १८ प्रसूती झाल्या.

दुसरीकडे, गंभीर रुग्णांच्या उपचारांमध्ये कोणताही अडथळा येऊ दिला गेला नाही. नियमित सरासरी ९९ रुग्णांच्या तुलनेत ५ ऑगस्ट रोजी १०८ आणि ६ ऑगस्ट रोजी ११३ रुग्णांवर अतिदक्षता विभागात उपचार करण्यात आले. तसेच आकस्मिक विभागात ६ ऑगस्ट रोजी १९८ रुग्णांवर उपचार करण्यात आले.

संपामुळे नियोजित शस्त्रक्रिया पुढे ढकलाव्या लागल्या असल्या, तरी वरिष्ठ डॉक्टर आणि उपलब्ध कर्मचाऱ्यांच्या मदतीने आपत्कालीन सेवा, अतिदक्षता विभाग आणि अत्यावश्यक आरोग्यसेवा अखंड सुरू ठेवण्यात आल्याची माहिती ससून रुग्णालयाचे अधिष्ठाता डॉ. यलप्पा जाधव यांनी दिली.

नागरिकांच्या जीवाशी खेळू नका

राज्य सरकारने आणलेल्या धोरणात्मक निर्णयाला विरोध करण्यासाठी तुमच्याकडे कारणे असतील, तुमच्या समस्या आम्ही समजू शकतो, परंतु, संप करून राज्यातील नागरिकांच्या जीवाशी खेळू नका. त्यांना वेठीस धरू नका, आम्हाला एकही मृत्यू नको आहे, अशा शब्दांत गुरुवारी उच्च न्यायालयाने राज्यभरातील संपकरी डॉक्टरांना खडेबोल सुनावले. तसेच, तातडीने संप मागे घेण्याचे आदेश दिले. त्यांनतर, भारतीय वैद्यक परिषदेने (आयएमए) संप मागे घेतला जाईल, असे आश्वासन न्यायालयाला दिले.

‘… तर विकासकांना थेट जेलमध्ये टाका’; Mhada ची घरे अडवणाऱ्यांना Mangal Prabhat Lodha यांचा इशारा