चंदननगरच्या दुय्यम निबंधक कार्यालयात गोंधळ, नागरिकांकडूनच कागदपत्रांची पडताळणी; रोहन सुरवसे पाटलांचा दावा

हवेली क्रमांक सात, चंदननगर येथील दुय्यम निबंधक कार्यालयातील कथित भोंगळ कारभाराचा पर्दाफाश राष्ट्रवादी काँग्रेसचे नेते रोहन सुरवसे-पाटील यांनी केला आहे. यामुळे मोठी खळबळ उडाली आहे.

पुणे : हवेली क्रमांक सात, चंदननगर येथील दुय्यम निबंधक कार्यालयातील कथित भोंगळ कारभाराचा पर्दाफाश राष्ट्रवादी काँग्रेसचे नेते रोहन सुरवसे-पाटील यांनी केला आहे. कार्यालयात खासगी व्यक्ती संगणकावर कागदपत्रांची पडताळणी करीत असल्याचे या व्हिडिओमध्ये दिसत असल्याचा दावा त्यांनी केला आहे. तसेच, हवेली क्रमांक सात चे सह दुय्यम निबंधक महादेव गुरव यांनी शासनाचा खूप मोठ्या प्रमाणात महसूल व नियमाचा भंग करून दस्त नोंदणी केली आहे. या संदर्भात महसूल मंत्री चंद्रशेखर बावनकुळे यांनी या प्रकरणाची चौकशी करून दोषी अधिकाऱ्यांवर कारवाई करावी, अशी मागणी केली आहे.

नोंदणी विभागासारख्या महत्त्वाच्या शासकीय कार्यालयात नागरिकांकडूनच कागदपत्रांची पडताळणी करत आहेत. ही गंभीर बाब असल्याचे सुरवसे-पाटील यांनी म्हटले आहे. महसूल आणि नोंदणी विभागात नागरिकांच्या मालमत्तेशी संबंधित महत्त्वाची कागदपत्रे हाताळली जातात. त्यामुळे या कागदपत्रांच्या सुरक्षिततेबरोबरच त्यांची योग्य पद्धतीने छाननी होणे आवश्यक आहे. मात्र, चंदननगर येथील कार्यालयातील कथित प्रकारामुळे प्रशासनाच्या कार्यपद्धतीवर प्रश्नचिन्ह निर्माण झाले आहे.

‘नोंदणी कार्यालयात अधिकारी उपस्थित नसताना नागरिकच संगणकावर कागदपत्रे तपासत असतील, तर कार्यालयाचा कारभार नेमका कोणाच्या नियंत्रणाखाली सुरू आहे?’ असा सवाल सुरवसे-पाटील यांनी उपस्थित केला. कार्यालयात दस्तऐवज आणि महत्त्वाच्या फाइल्सची सुरक्षितता कितपत राखली जाते, याचीही तपासणी करण्याची मागणी त्यांनी केली आहे.

‘उद्या कार्यालयातून एखादी महत्त्वाची फाइल किंवा कागदपत्र गायब झाले, तर त्याची जबाबदारी कोणाची?’ असा प्रश्न उपस्थित करीत त्यांनी वरिष्ठ अधिकाऱ्यांनी या प्रकरणाची तातडीने चौकशी करावी, अशी मागणी केली आहे. संबंधित अधिकाऱ्यांची उपस्थिती, कार्यालयातील कामकाजाची पद्धत आणि कागदपत्रांच्या हाताळणीबाबत तपासणी करण्याची गरज असल्याचे त्यांनी म्हटले आहे. ‘कार्यालयात गोंधळ सुरू असताना साहेब गायब आहेत. महसूल आणि नोंदणी विभागातील या कारभाराकडेही लक्ष द्यावे,’ असा सवाल करीत सुरवसे-पाटील यांनी महसूलमंत्री चंद्रशेखर बावनकुळे यांच्याकडे लक्ष वेधले आहे. या कथित प्रकाराची चौकशी करून दोषींवर कारवाई करावी, अशी मागणी त्यांनी केली आहे.

हे सुद्धा वाचा : पुणे महापालिकेत भाजप-राष्ट्रवादीचा वाद पेटला; सुनील टिंगरेंचे थेट मुख्यमंत्र्यांना पत्र