राष्ट्रवादीच्या विलीनीकरणाची चर्चा सुरू असतानाच संजय काकडेंचे मोठे विधान; म्हणाले, नेत्यांच्या महत्त्वाकांक्षांमुळे…

गेल्या काही महिन्यापासून दोन्ही राष्ट्रवादी काँग्रेसच्या विलीनीकरणाची चर्चा सध्या राजकीय वर्तुळात रंगली असताना, विलीनीकरण होणे अशक्य असल्याचे मत राष्ट्रवादी काँग्रेसचे नेते संजय काकडे यांनी व्यक्त केले आहे.

• राष्ट्रवादीच्या विलीनीकरणाला संजय काकडेंचं मोठं विधान
• मंत्रिपद आणि अध्यक्षपदावरून पेच निर्माण होण्याची शक्यता
• अजित पवार अपघाताच्या सखोल चौकशीची मागणी

पुणे : गेल्या काही महिन्यापासून दोन्ही राष्ट्रवादी काँग्रेसच्या विलीनीकरणाची चर्चा सध्या राजकीय वर्तुळात रंगली असताना, विलीनीकरण होणे अशक्य असल्याचे मत राष्ट्रवादी काँग्रेसचे नेते संजय काकडे यांनी व्यक्त केले आहे. दोन्ही पक्षांतील नेत्यांच्या राजकीय महत्त्वाकांक्षा, मंत्रिपदासाठी इच्छुकांची संख्या आणि राष्ट्रीय अध्यक्षपदाचा प्रश्न यामुळे विलीनीकरणात अनेक अडचणी निर्माण होतील, असे त्यांनी स्पष्ट केले. मुख्यमंत्री देवेंद्र फडणवीस यांची भेट केवळ दिवाळीच्या शुभेच्छा देण्यासाठी घेतली होती. या भेटीत विलीनीकरण किंवा अन्य कोणत्याही राजकीय विषयावर चर्चा झाली नसल्याचे काकडे यांनी सांगितले. पवार कुटुंबातील दिवाळीच्या भेटीगाठी या परंपरेचा भाग असून, त्यावरून दोन्ही राष्ट्रवादी पुन्हा एकत्र येतील, असा निष्कर्ष काढणे चुकीचे असल्याचेही ते म्हणाले.

 

मंत्रिपदांची संख्या, राष्ट्रीय अध्यक्षपदावरून पेच

विलीनीकरण झाल्यास दोन्ही पक्षांतील अनेक नेते मंत्रिपदासाठी इच्छुक असतील. मात्र, मंत्रिपदांची संख्या मर्यादित असल्याने प्रफुल्ल पटेल, सुनील तटकरे, सुप्रिया सुळे, पार्थ पवार यांच्यासह अन्य नेत्यांमध्ये रस्सीखेच होऊ शकते. त्याचबरोबर राष्ट्रीय अध्यक्ष कोण होणार, कोअर कमिटीमध्ये कोणाला स्थान मिळणार, यावरूनही मतभेद निर्माण होतील. भाजपबाबत शरद पवारांची भूमिका पाहता दोन्ही पक्षांची राजकीय विचारधारा एकत्र येणे कठीण असल्याचे काकडे यांनी नमूद केले. राष्ट्रवादीतील २० ते २२ आमदार शरद पवारांच्या संपर्कात असल्याच्या चर्चाही त्यांनी फेटाळल्या. पक्षात नाराजी असू शकते; मात्र, त्याचा अर्थ नेते पक्ष सोडणार असा होत नाही. पक्षातील महत्त्वाचे निर्णय कोअर कमिटीच्या सहमतीने घेतले जात असल्याचे त्यांनी स्पष्ट केले.

हे सुद्धा वाचा : दर्यापूरच्या आठवडी बाजारात रक्तरंजित थरार! 60 वर्षीय व्यक्तीची निर्घृण हत्या; परिसरात खळबळ

अजित पवारांच्या अपघाताच्या चौकशीची मागणी

अजित पवार यांच्या अपघाताबाबत घातपात असल्याचा निष्कर्ष आताच काढता येणार नाही. मात्र, या प्रकरणाची सखोल चौकशी होऊन नेमके सत्य समोर यावे, अशी मागणी त्यांनी केली. दरम्यान, संजय राऊत यांनी विलीनीकरणाच्या चर्चेवर केलेल्या उपरोधिक टीकेला उत्तर देताना, त्यांनी आपला पक्षच आमच्यात विलीन करा, असा टोला लगावला. तसेच, योग्य राजकीय ऑफर मिळाल्यास संजय राऊत किंवा उद्धव ठाकरेही भाजपसोबत येऊ शकतात, असे वैयक्तिक मत त्यांनी व्यक्त केले.