मंगळवार, 22 सप्टेंबर 2026
दौंड तालुक्यात परतीच्या पावसाचे दमदार कमबॅक; अनेक ठिकाणी जोरदार हजेरी, बळीराजा सुखावला (File Photo)
पाटस : दौंड तालुक्यातील दौंड शहरासह पाटस, कुरकुंभ, मळद, नानगाव, कानगाव यासह तालुक्याच्या पूर्व भागात परतीच्या पावसाने दमदार हजेरी लावली आहे. परतीच्या पावसाच्या या आगमनाने मान टाकलेल्या शेत पिकांना जीवदान मिळाले असून, बळीराजा सुखावला आहे.
गेल्या काही दिवसांपासून पावसाने दडी मारल्याने दहा दिवसांचा गणेशोत्सव यंदा पावसाअभावी कोरडा जातोय की काय, असे चित्र निर्माण झाले होते. हवामान विभागाने दिलेला पावसाचा अंदाजही फेल जातोय का, असे वाटत होते. शेतातील पिके पाण्याअभावी माना टाकू लागली होती. मात्र, सोमवार (दि.२१) रोजी सायंकाळी चार वाजण्याच्या सुमारास वातावरणात अचानक बदल झाला आणि तालुक्यातील अनेक भागात वादळी वाऱ्यासह विजांच्या कडकडाटासह मुसळधार पावसाने हजेरी लावली.
दरम्यान, सुमारे एक ते दीड तास झालेल्या या जोरदार पावसामुळे ओढे, नाले वाहते झाले असून शेतात पाणी साचले आहे. या पावसामुळे कापूस, सोयाबीन, मका, बाजरी यासह फळबागांना मोठा फायदा होणार आहे. परतीचा पाऊस वेळेवर आल्याने रब्बी हंगामासाठीही हा पाऊस पोषक ठरणार आहे. दौंड तालुक्याच्या पूर्व भागात सर्वदूर पाऊस झाल्याने नागरिकांमध्ये आणि शेतकऱ्यांमध्ये समाधानाचे वातावरण पसरले आहे.
पिंपरी-चिंचवडला मुसळधार पावसाने झोडपले
गेल्या अनेक दिवसांपासून असह्य उकाडा आणि घामाच्या धारांनी त्रस्त झालेल्या पिंपरी-चिंचवडकरांना अखेर वरुणराजाने मोठा दिलासा दिला आहे. सोमवारी दुपारनंतर शहरात विजांच्या कडकडाटासह आणि वादळी वाऱ्यासह कोसळलेल्या मुसळधार पावसाने संपूर्ण परिसराला अक्षरशः झोडपून काढले. सायंकाळी साडेपाच वाजेपर्यंत चिंचवड परिसरात तब्बल 50 मिमी इतक्या विक्रमी पावसाची नोंद झाली आहे.
पुणे शहर व परिसरात केवळ शिडकावा
एकीकडे पिंपरी-चिंचवड आणि मावळ पट्ट्यामध्ये पावसाने दमदार हजेरी लावली असताना, पुणे शहरात मात्र केवळ हलक्या सरींवरच समाधान मानावे लागले. पुण्यातील बहुतांश भागांत पाऊस हुलकावणी देताना दिसला.
राज्यातील अनेक भागांत पावसाचा अंदाज
गेल्या काही दिवसांपासून वातावरणात कमालीचा बदल जाणवत आहे. दिवसाचा उन्हाचा फटका बसत आहे. मात्र, रविवारी आणि सोमवारी राज्यातील अनेक भागांत हलका ते मध्यम स्वरुपाचा पाऊस झाल्याचे पाहिला मिळाले. असे असताना आजही पावसाचा अंदाज वर्तवण्यात आला आहे. पुणे, सातारा, सांगली, कोल्हापूरसह अनेक जिल्ह्यांना सतर्कतेचा इशारा देण्यात आला आहे.
