पुणे जिल्ह्यात रॉकेलचा कोटा तुटपुंजा, प्रशासनासमोर मोठे आव्हान; प्राधान्य कोणाला?

युद्धजन्य परिस्थितीत गॅस सिलिंडरला पर्याय म्हणून रॉकेल वितरणाचा निर्णय घेतला असला, तरी पुणे जिल्ह्यासाठी मंजूर झालेला कोटा अत्यल्प असल्याचे स्पष्ट झाले आहे.

• पुणे जिल्ह्यात रॉकेलचा कोटा तुटपुंजा
• प्रशासनासमोर मोठे आव्हान
• प्राधान्य कोणाला दणार?

पुणे : युद्धजन्य परिस्थितीत गॅस सिलिंडरला पर्याय म्हणून रॉकेल वितरणाचा निर्णय घेतला असला, तरी पुणे जिल्ह्यासाठी मंजूर झालेला कोटा अत्यल्प असल्याचे स्पष्ट झाले आहे. पुणे जिल्ह्याला केवळ २ लाख लिटर रॉकेलचा कोटा मिळाला असून, प्रत्यक्ष गरज मात्र २४ लाख लिटरपेक्षा अधिक आहे. पुणे जिल्ह्यात एकूण ८.२१ लाख शिधापत्रिकाधारक असून, शासनाच्या निर्णयानुसार प्रत्येकाला महिन्याला ३ लिटर रॉकेल देणे अपेक्षित आहे. मात्र उपलब्ध कोट्यानुसार प्रति शिधापत्रिका पाव लिटरही देणे कठीण असल्याची स्थिती आहे.

 

प्राधान्य कोणाला?

जिल्हाधिकारी जितेंद्र डुडी यांनी स्पष्ट निर्देश दिले आहेत की, मर्यादित साठ्यामुळे अंत्योदय योजनेतील कुटुंबे, दुर्गम व गरजू भागातील नागरिक या लाभार्थ्यांना प्राधान्य दिले जाईल:

वितरणाची रूपरेषा

• तालुकानिहाय शिधापत्रिकांच्या संख्येनुसार कोटा निश्चित
• गावनिहाय गरज ओळखून वाटप
• साठवण क्षमता असलेल्या दुकानदारांमार्फत वितरण
• साठवण नसलेल्या गावांना शेजारील गावांशी जोडण्याची व्यवस्था.

जिल्हा पुरवठा अधिकारी महेश सुधळकर यांनी सांगितले की, सुरुवातीला अंत्योदय लाभार्थ्यांना रॉकेल दिले जाईल. त्यानंतर उपलब्धतेनुसार इतरांना वाटपाचा विचार केला जाईल.

राज्यातील स्थिती

केंद्र सरकारने महाराष्ट्रासाठी ३७.४४ लाख लिटर रॉकेल मंजूर केले आहे. मात्र, राज्यातील एकूण शिधापत्रिकाधारकांची संख्या पाहता हा कोटा अपुरा ठरत असल्याचे दिसून येत आहे. एकूणच, मर्यादित साठा आणि प्रचंड मागणी यामुळे रॉकेल वितरणाचा प्रश्न प्रशासनासमोर मोठे आव्हान ठरत आहे.

हे सुद्धा वाचा : भयंकर घटना! प्रेमात अडथळा, आईनेच प्रियकराच्या मदतीने 6 वर्षांच्या मुलाला संपवलं