Pimpri Chinchwad News, PCMC Corruption Inquiry
पिंपरी/ज्ञानेश्वर मोरे : पिंपरी-चिंचवड महापालिकेतील कर्मचारी व अधिकाऱ्यांसाठी लागू असलेली ‘धन्वंतरी गोल्ड’ वैद्यकीय योजना आता नगरसेवकांनाही लागू करण्यात आली आहे. महापौर रवी लांडगे यांच्या सूचनेनुसार प्रशासनाने हा निर्णय घेतला असून, स्वीकृत सदस्यांसह एकूण १३८ नगरसेवक आणि त्यांच्या कुटुंबीयांना या योजनेचा थेट लाभ मिळणार आहे. महापालिकेने जुनी धन्वंतरी योजना बंद करून २०२४ मध्ये आणलेल्या विमा योजनेवर कर्मचाऱ्यांनी तीव्र नाराजी व्यक्त केली होती. त्यामुळे २०२५ मध्ये त्रुटी दूर करून ‘धन्वंतरी गोल्ड’ ही नवीन योजना सुरू केली. सध्या कार्यरत व निवृत्त अशा १०,४९३ कर्मचाऱ्यांना याचा लाभ मिळत असून, आता लोकप्रतिनिधींचाही यात समावेश करण्यात आला आहे.
प्रति कुटुंब २० लाखांची तरतूद
या योजनेअंतर्गत नगरसेवकांच्या कुटुंबाला दरवर्षी २० लाख रुपयांपर्यंतच्या मोफत उपचारांची सुविधा मिळेल. खर्च २० लाखांच्या वर गेल्यास आयुक्तांच्या अध्यक्षतेखालील १५ सदस्यीय समिती वाढीव खर्चाचा निर्णय घेईल. यासाठी नगरसेवकांच्या मानधनातून दरमहा १,५०० रुपये स्वहिस्सा कापला जाईल. पुणे व पिंपरी-चिंचवडमधील ५० मल्टिस्पेशालिटी आणि १० सिंगल स्पेशालिटी अशा ६० नामांकित रुग्णालयांमध्ये ‘संवर्ग १’नुसार नगरसेवकांना कॅशलेस उपचार मिळतील.
कर्मचाऱ्यांचा वर्गवारीनुसार स्वहिस्सा
वर्ग ‘अ’ व ‘ब’ : १,५०० रुपये दरमहा
वर्ग ‘क’ : १,१०० रुपये दरमहा
वर्ग ‘ड’ (चतुर्थ श्रेणी) : ७०० रुपये दरमहा
कर्मचाऱ्यांच्या या वर्गणीतून वर्षाला १२ कोटी १७ लाख ३१ हजार ६०० रुपये जमा होणार असून, उपचारांचा उर्वरित सर्व भार पालिका उचलणार आहे.
‘आयव्हीएफ’साठी मदत; व्यसनाधीनतेला नकार
अपत्य नसलेल्या कर्मचाऱ्यांना पहिल्या अपत्यासाठी ‘आयव्हीएफ’ (IVF) उपचारांकरिता १ लाख रुपयांचे अर्थसाहाय्य दिले जाते. मात्र, मद्यप्राशनामुळे उद्भवलेल्या आजारांवर या योजनेतून कोणताही लाभ मिळणार नाही; डॉक्टरांच्या अहवालात मद्यपानाचे कारण आढळल्यास उपचाराचा खर्च नाकारला जाईल, असा महत्त्वाचा नियम या योजनेला जोडण्यात आला आहे.
.png "Videos"){kind=small}
