अध्यक्षपदाचा ‘फॉर्म्युला’ अद्याप गुप्तच; जिल्हा परिषदेत सत्ताधाऱ्यांचा डाव की संभ्रम?
या अनिश्चिततेमुळे जिल्हा परिषदेत पुढील सत्तासमीकरणांवर मोठा परिणाम होत आहे. विविध विषय समित्यांच्या सभापती निवडीची प्रक्रिया सुरू होण्याच्या उंबरठ्यावर असताना अनेक इच्छुकांनी अचानक ‘ब्रेक’ लावल्याचे चित्र आहे. सभापतीपद स्वीकारल्यास अध्यक्षपदाची संधी हुकू शकते, या भीतीनेच दावेदार मागे सरकत असल्याची चर्चा रंगली आहे. अडीच वर्षांचा फॉर्म्युला लागू झाल्यास अध्यक्षपदावर ‘एकच चेहरा’ कायम राहणार, तर सव्वा वर्षांच्या फॉर्म्युल्यात दुसऱ्या उमेदवाराला संधी मिळण्याची शक्यता निर्माण होणार, याच राजकीय गणितांवरून सध्या अंतर्गत रस्सीखेच सुरू असल्याचे बोलले जात आहे.
त्यामुळेच फॉर्म्युला जाहीर करण्यास विलंब होत असल्याचा आरोपही दबक्या आवाजात होत आहे. अध्यक्षपदासाठी भोरचे विक्रम खुटवड, मुळशीचे शांताराम इंगवले, दौंडचे तुषार आप्पा थोरात, बारामतीचे करण खलाटे आदींची नावे चर्चेत होती. मात्र, अंतिम निर्णयानंतरही कार्यकाळाबाबतची अस्पष्टता कायम असल्याने नाराजीचा सूर उमटत आहे.
दरम्यान, मावळ–मुळशी भागातून सार्वजनिक बांधकाम समिती सभापतीपदासाठी जोरदार लॉबिंग सुरू असल्याची माहिती आहे. अध्यक्ष-उपाध्यक्षांच्या सत्कारानंतर समित्यांच्या नियुक्त्या जाहीर होणार असल्याचे सांगितले जात असले, तरी फॉर्म्युला स्पष्ट होईपर्यंत जिल्हा परिषदेत राजकीय अस्थिरता कायम राहणार, हे मात्र निश्चित.
पुणे जिल्हा परिषदेवर राष्ट्रवादीचे वर्चस्व
गेल्या अनेक वर्षांपासून पुणे जिल्हा परिषद ही राष्ट्रवादी काँग्रेसचा बालेकिल्ला मानला जातो. जिल्हा परिषद निवडणुकीच्या प्रचारादरम्यानच उपमुख्यमंत्री अजित पवार यांचे विमान अपघातात निधन झाले. त्यानंतर झालेल्या निवडणुकीत राष्ट्रवादीने पुन्हा एका जिल्हा परिषदेवर आपले वर्चस्व प्रस्थापित केलं आहे. दरम्यान, विद्यमान उपमुख्यमंत्री सुनेत्रा पवार यांच्याकडून अध्यक्षपदी कुणाला संधी मिळणार, याबाबत राजकीय वर्तुळात जोरदार चर्चा सुरू होती. महत्त्वाची बाब म्हणजे, शरद पवार यांच्या राष्ट्रवादीतील उमेदवारांनीही घड्याळाच्या चिन्हावर निवडणूक लढवली होती. त्यामुळे या पक्षातील नेत्यालाही जिल्हा परिषदेवर संधी मिळणार का, असा प्रश्न विचारला जात होता. अखेर दौंडचे वीरधवल जगदाळे अध्यक्षपदी आणि विवेक वळसे पाटील उपाध्यक्षपदी विराजमान झाले आहेत.
.png "Videos"){kind=small}
