सुनेत्रा पवारांकडे निर्णयाचा अधिकार; काही इच्छुकांकडून जिल्हा परिषद अध्यक्षपदासाठी सह्यांचे राजकारण
पुणे : पुणे जिल्हा परिषदेच्या अध्यक्ष व उपाध्यक्षपदाच्या निवडणुकीच्या पार्श्वभूमीवर राष्ट्रवादी काँग्रेसमध्ये इच्छुकांकडून लॉबिंगचे राजकारण रंगू लागले आहे. पक्षाने उमेदवार निवडीचे सर्वाधिकार उपमुख्यमंत्री सुनेत्रा पवार यांच्याकडे सोपवले असतानाही काही इच्छुकांकडून सदस्यांच्या सह्या गोळा करून शिफारस व पाठिंब्याची पत्रे तयार करण्याचे प्रयत्न सुरू असल्याची चर्चा आहे.
पुणे जिल्हा परिषदेच्या ७३ सदस्यांपैकी राष्ट्रवादी काँग्रेसचे ५१ सदस्य असल्याने अध्यक्ष व उपाध्यक्षपदावर पक्षाचीच निवड होणार हे जवळपास निश्चित मानले जात आहे. या पार्श्वभूमीवर जिल्हा बँकेच्या सभागृहात झालेल्या बैठकीत अध्यक्ष व उपाध्यक्षपदासाठी उमेदवार ठरविण्याचे सर्वाधिकार सुनेत्रा पवार यांना देण्याचा ठराव करण्यात आला. त्यामुळे त्यांच्या निर्णयानुसारच अधिकृत उमेदवारांची घोषणा होणार आहे.
मात्र, या निर्णयानंतरही काही इच्छुक सदस्यांकडून शिफारसपत्रे व पाठिंब्याच्या सह्या गोळा करण्याची मोहीम सुरू असल्याची माहिती समोर येत आहे. “कोणालाही नाराज करायचे नाही म्हणून सदस्य सह्या करतात; मात्र त्याचा अर्थ तो आमचा ठाम पाठिंबा आहे असे मानू नये,” अशी भूमिका काही नवनिर्वाचित सदस्यांनी व्यक्त केली. सर्वाधिकार सुनेत्रा पवार यांच्याकडे असताना असे लॉबिंग करण्यामागे नेमका उद्देश काय, असा सवालही सदस्यांकडून उपस्थित केला जात आहे.
अध्यक्षपदाची निवडणूक बुधवारी
अध्यक्षपदाची निवडणूक बुधवारी (१८ मार्च) होणार असून त्या दिवशी सकाळी राष्ट्रवादी काँग्रेसच्या नवनिर्वाचित सदस्यांची बैठक घेऊन उमेदवारांची नावे जाहीर केली जाणार आहेत. अध्यक्षपदासाठी दौंडचे तीन वेळा जिल्हा परिषद सदस्य राहिलेले वीरधवल जगदाळे, बारामतीचे माजी सभापती करण खलाटे, ज्येष्ठ सदस्य शांताराम इंगवले, विक्रम खुटवड, माजी उपाध्यक्ष विवेक वळसे-पाटील आणि तुषार थोरात यांची नावे चर्चेत आहेत.
हे सुद्धा वाचा : भटक्या कुत्र्यांनी 15 मिनिट लचके तोडले; चाकणमध्ये महिलेचा तडफडून मृत्यू
उपाध्यक्षपदासाठी महिला सदस्यांचे लागले लक्ष
दरम्यान, उपाध्यक्षपदासाठी महिलेला संधी दिली जाणार का, याकडे महिला सदस्यांचे लक्ष लागले आहे. अध्यक्ष किंवा उपाध्यक्षपदासाठी काही इच्छुकांनी जिल्हा बँकेच्या संचालकांची शिफारसही घेतल्याची चर्चा आहे. जिल्हा बँक आणि जिल्हा परिषद यांचा थेट संबंध नसतानाही अशा प्रकारे पाठिंबा गोळा करण्याचे प्रयत्न सुरू असल्याचे पक्षांतर्गत बोलले जात आहे. विशेषतः दौंड आणि इंदापूर तालुक्यांमध्ये सदस्यांकडून पाठिंब्याच्या पत्रांवर सह्या घेण्यासाठी दबावाचे राजकारण सुरू असल्याची माहिती समोर येत आहे.
.png "Videos"){kind=small}
