पिंपरी-चिंचवड महापालिकेच्या स्थायी समितीने घेतला ‘हा’ महत्त्वपूर्ण निर्णय; सभापती अभिषेक बारणे यांनी दिली माहिती

पिंपरी- चिंचवड शहरातील वाढते नागरीकरण लक्षात घेता पिंपरी-चिंचवडचे सौंदर्य कायम राखण्यासाठी महापालिकेने एक महत्त्वाचे पाऊल उचलले आहे. यासंदर्भात सभापती अभिषेक बारणे यांनी माहिती दिली.

पिंपरी : पिंपरी- चिंचवड शहरातील वाढते नागरीकरण लक्षात घेता पिंपरी-चिंचवडचे सौंदर्य कायम राखण्यासाठी महापालिकेने एक महत्त्वाचे पाऊल उचलले आहे. शहरातील प्रमुख रस्ते, आयलंड आणि मध्य दुभाजकांच्या (मीडियन) सुशोभिकरण व नूतनीकरणाची देखभाल आता ‘सार्वजनिक-खाजगी सहभाग’, ‘कॉर्पोरेट सोशल रिस्पॉन्सिबिलिटी’ किंवा ‘सीएमआर’ तत्त्वावर केली जाणार आहे. यासंदर्भातील धोरणात्मक मसुद्याला स्थायी समितीने मंजुरी दिल्याची माहिती सभापती अभिषेक बारणे यांनी दिली.

पिंपरी-चिंचवड महानगरपालिकेच्या उद्यान व वृक्षसंवर्धन विभागामार्फत शहरातील विविध भागांत रस्ते, आयलंड आणि दुभाजकांचे सुशोभिकरण करण्यात आले आहे. मात्र, या कामांची दीर्घकालीन आणि योग्य देखभाल करणे प्रशासनासाठी मोठे आव्हान ठरत होते. महापालिकेच्या तिजोरीवर अतिरिक्त आर्थिक भार न पाडता खासगी क्षेत्राच्या सहभागातून हे सौंदर्य टिकवून ठेवण्यासाठी हे नवीन धोरण अमलात आणले जात आहे. या निर्णयामुळे पिंपरी-चिंचवडमधील सार्वजनिक ठिकाणांच्या देखभालीचा प्रश्न सुटण्यास मदत होणार असून, पायाभूत सुविधांच्या विकासाला आणि सौंदर्यीकरणाला नवी दिशा मिळणार असल्याचे बारणे यांनी सांगितले.

“पिंपरी-चिंचवड हे प्रगतशील आणि सुंदर शहर आहे. शहरातील रस्ते, आयलंड आणि दुभाजकांची नियमित व उत्तम देखभाल करणे गरजेचे आहे. महापालिकेच्या तिजोरीवर ताण न आणता खासगी लोकसहभाग आणि सीएसआर फंडाच्या माध्यमातून ही देखभाल प्रभावीपणे केली जाईल. या धोरणामुळे शहराचे सौंदर्य टिकून राहील आणि नागरिकांना स्वच्छ व प्रसन्न वातावरण मिळेल.” — अभिषेक बारणे (सभापती, स्थायी समिती, पिंपरी-चिंचवड महापालिका)

हे सुद्धा वाचा : पुण्यात खळबळ! भाचा गेला, सून माहेरी निघून गेली… मामाच्या मनात पेटला संताप, पुढे घडलं धक्कादायक

आयुक्तांचे महापालिका अधिकाऱ्यांना कडक निर्देश

पिंपरी-चिंचवड शहरातील रस्ते, पदपथ आणि इतर सार्वजनिक सुविधांच्या दुरुस्तीच्या कामांना महापालिका प्रशासनाने गती दिली आहे. शहरातील रस्त्यांवरील खड्डे येत्या दोन दिवसांत बुजवण्याच्या दृष्टीने तातडीने आवश्यक ती कार्यवाही करण्याचे स्पष्ट निर्देश महापालिका आयुक्त डॉ. विजय सूर्यवंशी यांनी संबंधित अधिकाऱ्यांना दिले आहेत. नागरिकांच्या तक्रारींची वाट न पाहता सर्व विभागीय कार्यकारी अभियंते, उपअभियंते आणि कनिष्ठ अभियंत्यांनी आपापल्या कार्यक्षेत्राची नियमित पाहणी करून आवश्यक कामांची स्वतःहून नोंद घ्यावी, अशा सूचना देण्यात आल्या आहेत. खड्डे बुजवताना कामाचा दर्जा, टिकाऊपणा आणि नागरिकांची सुरक्षितता याबाबत विशेष दक्षता घेण्याचे आदेश आयुक्तांनी दिले आहेत.