यंदा सगळं काही जास्तच! पुणेकर थंडीने गारठले; डिसेंबरने 10 वर्षांचा रेकॉर्ड मोडला, २३ दिवसांतच…

यंदाचा डिसेंबर ठरला सर्वाधिक थंड 
१० वर्षातील सर्वाधिक एक अंकी किमान तापमानाची नोंद 
यंदाचा डिसेंबर सर्वाधिक थंड असल्याचे निरिक्षण

पुणे: पुण्यात यंदा हुडहुडी वाढली असून डिसेंबर महिन्याने थंडीचे गेल्या १० वर्षांतील सर्व विक्रम मोडीत काढले आहेत. डिसेंबरच्या अवघ्या २३ दिवसांतच तब्बल १३ दिवस किमान तापमानाची नोंद ‘एक’ अंकी झाली आहे. गेल्या १० वर्षांतील हा एक विक्रम ठरला आहे. २०१४ पासूनची आकडेवारी पाहता यंदाचा डिसेंबर सर्वाधिक थंड असल्याचे निरिक्षण नोंदविण्यात आले आहे.

गेल्या काही दिवसांपासून पुणे आणि परिसरात किमान तापमानात लक्षणीय घट झाली आहे. पहाटेच्या वेळी गारठा वाढला आहे. दिवसभर निरभ्र आकाश आणि कोरड्या हवामानामुळे रात्रीच्या वेळी थंडीचा प्रभाव वाढत असल्याचे निरीक्षण नोंदवले जात आहे. याविषयी भारतीय हवामानशास्त्र विभाग पुणेचे वैज्ञानिक ‘डी’ डॉ. एस. डी. सानप यांनी सांगितले की, ‘सध्या पुणे आणि परिसरातील हवेमध्ये आद्रतेचे प्रमाण कमालीचे घटले आहे. तर उत्तरेकडून येणाऱ्या थंड आणि कोरड्या वाऱ्यांच्या प्रभावामुळे गारवा अधिक प्रकर्षाने जाणवत आहे. तसेच दिवसभर आकाश पूर्णपणे निरभ्र राहत असल्याने सूर्याची उष्णता रात्री वेगाने उत्सर्जित होते आणि पहाटेच्या किमान तापमानात मोठी घट पाहायला मिळते. यामुळेच यंदा डिसेंबरमध्ये गेल्या दशकातील सर्वाधिक एक अंकी तापमानाचे दिवस नोंदवले गेले आहेत.’पुणे की शिमला? नागरिक गारठले; शहरात पुढील दोन दिवसांमध्ये…, कसे असणार तापमान?

२०१४ ते २०१६ या कालावधीत डिसेंबरमध्ये एक अंकी किमान तापमानाचे दिवस तुलनेने अधिक होते. विशेषतः २०१६ मध्ये १२ दिवस किमान तापमान एक अंकी नोंदवले गेले होते, ज्यामुळे ते वर्ष थंडीच्या दृष्टीने लक्षवेधी ठरले. मात्र त्यानंतर २०१७ आणि २०१८ मध्ये या दिवसांची संख्या कमी-जास्त राहिली. २०१८ मध्ये गेल्या दहा वर्षातील सर्वाधिक कमी म्हणजे ५.९ अंश सेल्सिअस किमान तापमान नोंदविण्यात आले. तर २०१९ आणि २०२१ या वर्षांत एकही दिवस किमान तापमान एक अंकी नोंदवले गेले नाही. २०२४ मध्ये पाच दिवस किमान तापमान एक अंकी राहिले. मात्र २०२५ मध्ये २३ डिसेंबरपर्यंतच तब्बल १३ दिवस किमान तापमान एक अंकी नोंदवले गेले. पुढील काही दिवसांत ही संख्या वाढण्याची शक्यता असल्याने, यंदाचा डिसेंबर पुण्यासाठी अधिक गारठ्याचा असल्याचे निरिक्षण नोंदविण्यात आले आहे.

पुणे आणि परिसरात मंगळवारी (ता. २३) हवामान प्रामुख्याने स्थिर होते. किमान तापमान ८.१ अंश सेल्सिअस, तर कमाल तापमानात किंचित वाढ होऊन २९ अंश सेल्सिअस नोंदविण्यात आले. दिवसभर निरभ्र आकाश आणि कोरड्या वातावरणामुळे हवेत गारवा जाणवत होता. तर पुढील दोन ते तीन दिवसांत हवामानात फारसा बदल होणार नसून त्यानंतर मात्र किमान तापमानात दोन अंश सेल्सिअसने वाढ होणार असल्याचे हवामानशास्त्र विभागाने सांगितले आहे.

पुणे आणि परिसरामध्ये बुधवारी (ता. २४) किमान तापमान स्थिर राहणार असून ९ अंश सेल्सिअस तर कमाल तापमान २९ अंश सेल्सिअस इतके नोंदविण्यात येणार आहे. आकाश मुख्यतः निरभ्र राहून दुपारी आणि सायंकाळी अंशतः ढगाळ राहण्याची शक्यता आहे. सकाळी विरळ धुके पडण्याची शक्यता आहे. तर गुरुवारपासून (ता. २५) कमाल आणि किमान तापमानात किंचित वाढ होण्याची शक्यता आहे. कमाल तापमान ३० अंश सेल्सिअस पर्यंत तर किमान तापमान ११ अंश सेल्सिअस पर्यंत नोंदविण्यात येणार आहे. आकाश मुख्यतः निरभ्र राहण्याची शक्यता हवामानशास्त्र विभागाने वर्तविली आहे.

Maharashtra Weather : हुडहुडी कमी होणार! ख्रिसमसनंतरच मिळणार थंडीपासून दिलासा, काय आहे IMD चा अंदाज?

वर्ष – दिवस

२०१४ – ८

२०१५ – ७

२०१६ – १२

२०१७ – ४

२०१८ – ८

२०१९- ०

२०२० – ४

२०२१ – ०

२०२२ – २

२०२३ – ०

२०२४ – ५

२३ डिसेंबर २०२५ पर्यंत – १३ (वाढ होण्याची शक्यता)

Web Title: This december is coldest on record pune winter season weather latest news

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News  only on Navarashtra.com