सत्ताधाऱ्यांची चार तास कोंडी; पुणे जिल्हा परिषदेत राष्ट्रवादी काँग्रेसविरोधात ‘एकजूट’
पुणे : पुणे जिल्हा परिषदेत सत्ताधारी राष्ट्रवादी काँग्रेस पक्षाला गुरुवारी (दि.१६) झालेल्या विशेष सर्वसाधारण सभेत मोठ्या राजकीय कोंडीचा सामना करावा लागला. विषय समित्यांच्या सदस्य निवडीच्या प्रक्रियेदरम्यान विरोधकांसह इतर सदस्यांनी एकत्र येत भूमिका घेतल्याने सत्ताधाऱ्यांची तब्बल चार तास कोंडी झाली.
जिल्हा परिषदेत राष्ट्रवादी काँग्रेसकडे स्वतंत्र सत्ता असली तरी या सभेत मात्र त्यांच्या विरोधात अनपेक्षित राजकीय एकजूट दिसून आली. भाजप, शिवसेना (शिंदे गट) तसेच महाविकास आघाडीतील राष्ट्रवादी काँग्रेस (शरदचंद्र पवार गट) आणि शिवसेना (उद्धव बाळासाहेब ठाकरे गट) या सदस्यांनी एकत्र येत सत्ताधाऱ्यांना अडचणीत आणले. विशेष म्हणजे जिल्हा परिषदेत महाविकास आघाडीची ताकद मर्यादित असतानाही कॉंग्रेसचा एकही सदस्य नाही, राष्ट्रवादी (पवार गट) केवळ एक सदस्य आणि शिवसेना (ठाकरे गट) सहा सदस्य या गटाने इतर पक्षांच्या सदस्यांसोबत मिळून प्रभावी राजकीय दबाव निर्माण केला.
विषय समित्यांच्या निवडीसारख्या नियमित प्रक्रियेत अचानक बदललेल्या या समीकरणामुळे सभागृहात गोंधळाचे वातावरण निर्माण झाले. सत्ताधाऱ्यांना आपली भूमिका ठामपणे मांडण्यासाठी वारंवार चर्चा, सल्लामसलत आणि अंतर्गत बैठका घ्याव्या लागल्या. मात्र, एकमत होत नसल्याने निर्णय प्रक्रियेला विलंब झाला आणि ही कोंडी तब्बल चार तास कायम राहिली.
या घडामोडींमुळे पुणे जिल्हा परिषदेत सत्ताधारी राष्ट्रवादी काँग्रेसची पकड आव्हानासमोर उभी राहिल्याचे स्पष्ट झाले आहे. स्थानिक पातळीवरील बदलती राजकीय गणिते आणि सदस्यांमधील समन्वयाच्या अभावामुळे सत्ताधाऱ्यांना पुढील काळात अधिक सावध भूमिका घ्यावी लागणार असल्याची चर्चा राजकीय वर्तुळात रंगू लागली आहे.
.png "Videos"){kind=small}
