Raigad News: रायगडच्या पर्यायी मार्गावर प्रश्नचिन्ह; कोट्यवधी खर्चानंतरही प्रवास धोकादायक, ग्रामस्थ संतप्त

रायगड किल्ला परिसरातील वाहतूक सुलभ करण्यासाठी तयार केलेला खर्डी नगरभवन-नेवाळीवाडी पर्यायी मार्ग पुन्हा वादात सापडला आहे. कोट्यवधी रुपये खर्चून उभारलेल्या या रस्त्यावर नागरिकांनी सुरक्षिततेचा प्रश्न उपस्थित केला आहे.

• रायगडकडे जाणाऱ्या मुख्य मार्गावरील वाहतूक कमी करण्यासाठी तयार केलेला पर्यायी रस्ता अजूनही धोकादायक ठरत आहे.
• दोनदा दुरुस्ती करूनही मार्गावरील तीव्र उतार आणि अरुंद वळणांचा प्रश्न कायम आहे.
• स्थानिकांनी तातडीने तांत्रिक फेरआढावा घेऊन सुरक्षिततेच्या उपाययोजना करण्याची मागणी केली आहे.

महाड: किल्ले रायगड परिसराच्या विकासासाठी विविध पायाभूत सुविधा उभारल्या जात असताना, खर्डी नगरभवन-नेवाळीवाडी मार्गाच्या कामावर झालेला कोट्यवधींचा खर्च वादाच्या भोवऱ्यात सापडला आहे. २०२४ मध्ये पर्यायी मार्ग म्हणून सुरू करण्यात आलेला हा रस्ता आजही धोकादायकच राहिल्याने प्रशासनाच्या नियोजनक्षमतेवर प्रश्नचिन्ह निर्माण झाले आहे.

दिव्यांगांच्या हक्कावर शासनाची कुऱ्हाड; तात्पुरते प्रमाणपत्र असणारे बालके योजनांपासून वंचित

रायगड किल्ल्याकडे जाणाऱ्या मुख्य महाड-रायगड मार्गावरील वाढती वाहतूककोंडी कमी करण्यासाठी हा पर्यायी मार्ग विकसित करण्यात आला. रोपवे परिसरातून नेवाळी-खर्डी मार्गे किल्ल्याकडे पोहोचण्याची सुविधा निर्माण करण्याचा उद्देश होता. मात्र, अल्पावधीतच या मार्गावरील तीव्र उतार, उभे चढ आणि धोकादायक वळणांमुळे तो बंद ठेवण्याची वेळ प्रशासनावर आली.

स्थानिक ग्रामस्थांनी सुरुवातीपासूनच या मार्गाच्या आराखड्यावर आक्षेप घेत, पर्यायी दिशा सुचविल्या होत्या. तथापि, त्या दुर्लक्षित राहिल्याचा आरोप होत आहे. गेल्या दोन वर्षांत दोनदा दुरुस्ती करूनही परिस्थितीत कोणताही ठोस बदल झालेला नाही. एका टप्प्यावर रस्त्याचा काही भाग वाहून गेल्याचीही नोंद आहे. नगरभवन ते नेवाळी दरम्यानचा डोंगराळ पट्टा अत्यंत खडतर असून, सरळ उभे चढ आणि अरुंद वळणे यामुळे मोठ्या बसगाड्या तर दूरच, लहान वाहने चालवितानाही चालकांना मोठी कसरत करावी लागते.

तातडीने मार्गाच्या तांत्रिक फेरआढाव्याची मागणी

परिणामी, स्थानिक नागरिकांनी या मार्गावरील प्रवास टाळण्यास सुरुवात केली आहे. दरम्यान, नेवाळी गावाखालच्या घाटमाथ्यावर सध्या रुंदीकरणाची कामे सुरू असली तरी, मूळ रचनेतील त्रुटी कायम असल्याने धोका अद्याप टळलेला नाही. अपघाताची शक्यता लक्षात घेता तातडीने तांत्रिक फेरआढावा घेण्याची मागणी पुढे येत आहे.

सलग तीन वर्षे एकाच ठेकेदाराकडून काम सुरू

दरम्यान, सलग तीन वर्षे एकाच ठेकेदाराकडून काम करून घेतल्याने दर्जाबाबत शंका व्यक्त होत आहेत. संबंधित ठेकेदाराकडे आवश्यक यंत्रसामग्री व अनुभव नसतानाही काम देण्यात आल्याचा आरोप ग्रामस्थांनी केला असून रायगड प्राधिकरणामार्फत लवकरात लवकर या कामाची पाहणी करून यावर उपाययोजना कराव्यात जेणेकरून या मार्गावरून प्रवास करणाऱ्या ग्रामस्थांना सहज सुलभ व सुरक्षितरित्या प्रवास करता येईल अशी अपेक्षा ग्रामस्थांकडून व्यक्त होत आहे.

पीएमआरडीएमध्ये अंतर्गत बदल्यांसाठी जोरदार फिल्डिंग! दबावतंत्राचा वाढता प्रभाव; आयुक्तांच्या भुमिकेकडे लक्ष

नेवाळीपासून पुढील जोडमार्गाबाबत आम्ही पर्याय सुचविला होता; मात्र अधिकाऱ्यांनी त्याकडे दुर्लक्ष केले. त्यामुळेच आज ही परिस्थिती निर्माण झाली. – यशवंत आखाडे, स्थानिक नागरिक

भौगोलिक परिस्थितीचा विचार न करता केवळ ठेकेदारांच्या फायद्यासाठी काम करण्यात आले. या मार्गावर अपघात झाल्यास संबंधित अधिका-यांवर जबाबदारी निश्चित व्हावी. – सुभाष मोरे, सामाजिक कार्यकर्ते