पावसाने दडी मारली, कर्जतवर दुष्काळाचे सावट; हजारो हेक्टरवरील भातपीक धोक्यात
कर्जत तालुका पूर्वी मोठ्या प्रमाणातील भातशेतीसाठी प्रसिद्ध होता. एकेकाळी तालुक्यात सुमारे २५ ते २७ हजार हेक्टर क्षेत्रावर भाताची शेती केली जात होती. मात्र, फार्म हाऊस आणि सेकंड होमसाठी मोठ्या प्रमाणावर जमिनी विकल्या गेल्याने भातशेतीचे क्षेत्र घटत गेले. आता हे क्षेत्र दहा हजार हेक्टरपेक्षाही कमी झाले आहे. यंदा तर जेमतेम सहा हजार हेक्टर क्षेत्रावर भात लागवड झाल्याचे सांगण्यात येत आहे.
यंदा जूनमध्ये पुरेसा पाऊस झाला नाही. जूनअखेरीस पावसाला सुरुवात झाली आणि सप्टेंबरच्या मध्यापर्यंत चांगला पाऊस झाला. तीन हजार मिलिमीटरहून अधिक पावसाची नोंद होऊनही सुरुवातीच्या विलंबामुळे भात लागवडीचे वेळापत्रक कोलमडले. सामान्यतः जुलैच्या मध्यापर्यंत लावणी पूर्ण होते; मात्र यंदा ऑगस्टपर्यंत लावणी सुरू होती. परिणामी पीक तयार होण्यास उशीर झाला.
दरवर्षी सप्टेंबरअखेरीस शेतात भाताचे ‘पिवळे सोने’ डोलताना दिसते. मात्र यंदा ऑक्टोबर सुरू होऊनही अनेक शेतांतील पीक तयार झालेले नाही. त्यातच १५ सप्टेंबरनंतर आवश्यक पाऊस न झाल्याने परिस्थिती आणखी गंभीर झाली आहे. काही भागांत वादळी वाऱ्यासह पाऊस झाला असला तरी त्याचा शेतीला अपेक्षित फायदा झालेला नाही. भातपीक पूर्ण होण्यासाठी सलग आणि पुरेशा पावसाची गरज असल्याचे शेतकऱ्यांचे म्हणणे आहे. शेतातील पाणी कमी होत असल्याने उत्पादनावर मोठा परिणाम होण्याची भीती व्यक्त केली जात आहे.
या पार्श्वभूमीवर कर्जत तालुक्यात दुष्काळ जाहीर करण्याची मागणी जोर धरू लागली आहे. नेरळ विविध विकास कार्यकारी सोसायटीच्या शेतकरी सभासदांनी वार्षिक सर्वसाधारण सभेत दुष्काळ जाहीर करण्याची मागणी केली आहे. तसेच अनेक शेतकऱ्यांनी कर्जत तहसीलदारांची भेट घेऊन प्रशासनाकडेही ही मागणी मांडली आहे.
सध्या अनेक भागांतील भातशेती वरकरणी हिरवीगार दिसत असली तरी पाण्याअभावी पीक बहरण्याची शक्यता कमी असल्याची चिंता शेतकरी व्यक्त करत आहेत. त्यामुळे आगामी काही दिवसांत पाऊस न झाल्यास कर्जत तालुक्यातील भात उत्पादक शेतकऱ्यांचे मोठे नुकसान होण्याची भीती आहे.
.png "Videos"){kind=small}
