Raigad News: लाखों रुपये खर्चून उभारलेला कचरा प्रक्रिया प्रकल्प बंद! खोपोलीत नेमकं चाललंय काय?

खोपोली शहरातील जुन्या भाजी मार्केट परिसरातकचऱ्याची समस्या मार्गी लावण्यासाठी मोठा खर्च करून उभारलेली कचरा प्रक्रिया यंत्रणा उभारण्यात आली होती. मात्र आता ही यंत्रणा धूळखात पडली आहे. त्यामुळे अनेक प्रश्न उपस्थित झाले आहेत.

• प्रत्यक्षात यंत्रणेचा वापर होत नसल्याने संपूर्ण प्रकल्प धूळखात पडला
• शहरातील कचरा व्यवस्थापनासाठी खर्च करण्यात आलेल्या सार्वजनिक निधीचे नेमके काय झाले?
• प्रकल्पस्थळी असलेली यंत्रसामग्री बंद अवस्थेत असून परिसरात धूळ आणि अस्वच्छता

खोपोली: खोपोली शहरातील कचऱ्याची समस्या मार्गी लावण्यासाठी नगरपरिषदेने मोठा खर्च करून उभारलेली कचरा प्रक्रिया यंत्रणा सध्या बंद अवस्थेत असल्याचे चित्र समोर आले आहे. शहरातील जुन्या भाजी मार्केट परिसरात उभारण्यात आलेल्या या प्रकल्पासाठी लाखो रुपयांची यंत्रसामग्री खरेदी करण्यात आली. मात्र, प्रत्यक्षात या यंत्रणेचा वापर होत नसल्याने संपूर्ण प्रकल्प धूळखात पडला आहे. त्यामुळे शहरातील कचरा व्यवस्थापनासाठी खर्च करण्यात आलेल्या सार्वजनिक निधीचे नेमके झाले काय, असा सवाल उपस्थित होत आहे.

Raigad News: १५८ कोटींच्या भुयारी गटार योजनेवरून माणगाव नगरपंचायतीत खडाजंगी! सत्ताधारी-विरोधक आमनेसामने, नेमकं काय घडलं?

शहरातील कचऱ्याचे योग्य वर्गीकरण करून त्यावर प्रक्रिया व्हावी आणि कचऱ्याची समस्या कमी व्हावी, या उद्देशाने ही यंत्रणा उभारण्यात आली होती. मात्र, प्रकल्पस्थळी असलेली यंत्रसामग्री बंद अवस्थेत असून परिसरात धूळ आणि अस्वच्छता दिसून येत आहे. कचऱ्यावर प्रक्रिया करण्यासाठी खरेदी केलेली यंत्रेच वापराविना पडून असतील, तर या प्रकल्पाचा मूळ उद्देश साध्य कसा होणार, असा प्रश्न नागरिक विचारत आहेत.

खर्च झाला, पण प्रकल्प कार्यान्वित का नाही?

या प्रकल्पासाठी नगरपरिषदेने नेमका किती निधी खर्च केला? यंत्रसामग्री कोणत्या कंपनीकडून खरेदी करण्यात आली? खरेदी प्रक्रिया पारदर्शक पद्धतीने झाली का? तसेच यंत्रणेची क्षमता किती असून ती प्रत्यक्षात किती दिवस चालविण्यात आली? असे अनेक प्रश्न आता पुढे येत आहेत, यंत्रणा बंद पडण्यामागचे नेमके कारण काय, तांत्रिक अडचणी आहेत की देखभाल-दुरुस्तीअभावी हा प्रकल्प बंद आहे, याची माहितीही प्रशासनाने नागरिकांसमोर मांडणे आवश्यक आहे.

कचरा व्यवस्थापनाच्या निधीचे व्यवस्थापन कोण करणार?

एकीकडे शहरातील कचरा संकलन आणि विल्हेवाटीचा प्रश्न कायम असताना दुसरीकडे कचऱ्यावर प्रक्रिया करण्यासाठी खरेदी केलेली लाखो रुपयांची यंत्रसामग्री वापराविना पडून आहे. त्यामुळे सार्वजनिक पैशातून उभारलेल्या या प्रकल्पाची जबाबदारी निश्चित करण्याची मागणी जोर धरू लागली आहे.

Raigad News: सह्याद्रीच्या जंगलतोडीविरोधात शेकाप आक्रमक; चित्रलेखा पाटील यांचा टोरंट प्रकल्पाला विरोध

नागरिकांकडून ‘या’ प्रमुख मागण्या

• नगरपरिषदेने या संपूर्ण प्रकल्पाचा खर्च, निविदा प्रक्रिया, यंत्रसामग्रीची खरेदी, देखभाल-दुरुस्ती आणि सध्याची स्थिती याबाबत सविस्तर माहिती जाहीर करावी.
• बंद पडलेली यंत्रणा तातडीने सुरू करून कचरा प्रक्रिया प्रकल्पाचा प्रत्यक्ष वापर करावा, अशी अपेक्षा नागरिकांकडून व्यक्त होत आहे.
• केवळ यंत्रसामग्री खरेदी करून कचरा व्यवस्थापनाचा प्रश्न सुटणार नाही; तर त्या यंत्रणेचा नियमित वापर होणेही तितकेच महत्त्वाचे आहे.
• अन्यथा लाखोंचा खर्च करून उभारलेला हा प्रकल्प केवळ शोभेची वस्तू ठरण्याची शक्यता नाकारता येत नाही.

(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)