Raigad News: जिल्हा परिषदेत अध्यक्षपद ठरलं; आता ‘मलाईदार’ खात्याकडे सर्वांचे लक्ष

रायगड जिल्हा परिषदेत अध्यक्षपद आणि सत्ता वाटपाचे सूत्र ठरले आहे. मात्र तरी देखील सर्वात महत्त्वाच्या मानल्या जाणाऱ्या अर्थ व बांधकाम खात्यावरून महायुतीतील प्रमुख पक्षांमध्ये रस्सीखेच सुरू आहे.

• रायगड जिल्हा परिषदेत महायुतीची सत्ता स्थापन झाली असली तरी अर्थ व बांधकाम खात्यावरून महायुतीत चुरस वाढली आहे.
• शिवसेना, राष्ट्रवादी काँग्रेस पक्ष आणि भारतीय जनता पक्ष यांच्यात ‘मलाईदार’ खाते कोणाला मिळणार यावर अंतर्गत चर्चा सुरू आहे.
• सुनील तटकरे यांच्या मध्यस्थीनंतर सत्ता समीकरण जुळले, पण खाते वाटपाचा तिढा अद्याप कायम आहे.

रोहा-अष्टमी: रायगड जिल्हा परिषदेत महायुतीची सत्ता स्थापन झाली असली तरी सत्तेच्या वाटपात सर्वात महत्त्वाच्या मानल्या जाणाऱ्या अर्थ व बांधकाम खात्यावरून राजकीय रस्सीखेच रंगली आहे. जिल्हा परिषदेतील हे ‘मलाईदार’ खाते कोणाकडे जाणार याकडे सध्या सर्वांचे लक्ष लागले असून, यावरून महायुतीतील प्रमुख पक्षांमध्ये आतल्या गोटात चांगलीच चुरस निर्माण झाली आहे. महायुतीतील राष्ट्रवादी, शिवसेना आणि भाजप यांच्यातील सत्ता समीकरणे जुळवताना अनेक तडजोडी कराव्या लागल्या.

Satara News : सभापती निवडीवेळी पत्रकारांना परवानगी; जिल्हाधिकाऱ्यांचा महत्त्वपूर्ण निर्णय

शिवसेनेने स्वतंत्र लढा देत २१ सदस्य निवडून आपली ताकद दाखवली, तर राष्ट्रवादीला १६ आणि भाजपला १५ जागांवर समाधान मानावे लागले. या निकालानंतर सुरुवातीला सत्तास्थापनेत पेच निर्माण झाला होता, मात्र वरिष्ठांची मध्यस्थी आणि खा. सुनील तटकरेंच्या नरमाईच्या भूमिकेमुळे महायुतीचा मार्ग मोकळा झाला. सत्तावाटपात अध्यक्षपदाचे सव्वा-सव्वा वर्षांचे सूत्र ठरले असून भाजप, शिवसेना आणि राष्ट्रवादी यांना अनुक्रमे संधी देण्यात आली आहे. तसेच प्रत्येक पक्षाला दोन सभापती पदे देण्याचेही ठरले आहे, मात्र अर्थ व बांधकाम या महत्त्वाच्या खात्याच्या सभापतीपदावर अद्याप एकमत झाले नाही. (फोटो सौजन्य – AI Created)

महायुतीत वरकरणी दिसतेय सुसंवादाचे चित्र

राजकीय वर्तुळात अशी चर्चा आहे की, हे खाते सहसा उपाध्यक्षाकडे दिले जाते. त्या पार्श्वभूमीवर रोहा येथील मधुकर पाटील यांचे नाव पुढे येत आहे. तरीही शिवसेना आपली ताकद दाखवत हे खाते आपल्या वाट्याला यावे, अशी ठाम भूमिका घेत आहे. दुसरीकडे राष्ट्रवादी काँग्रेस हे खाते मिळवण्यासाठी आग्रही असल्याचे समजते. दरम्यान, अलिबागमध्ये झालेल्या एका कार्यक्रमात महेंद्र दळवी आणि सुनील तटकरे यांच्यातील मतभेद दूर झाल्याची चर्चा असून, त्यामुळे महायुतीत वरकरणी सुसंवादाचे चित्र दिसत आहे, मात्र पडद्यामागे खाते वाटपावरून सुरू असलेली चुरस अद्याप कायम असल्याचे बोलले जात आहे.

Mumbai News: मुंबईतील शेकडो कुटुंबांसाठी दिलासादायक! प्रलंबित LIC इमारतीच्या पुनर्विकासाचा मार्ग होणार मोकळा

सर्व पक्ष एकत्र; विरोधक नसल्याची परिस्थिती

रायगडच्या राजकारणात सध्या सर्व पक्ष एकत्र आल्याने ठोस विरोधक नसल्याची परिस्थिती निर्माण झाली आहे. त्यामुळे अनेक मुद्दे शांततेतच मार्गी लागत असले, तरी अर्थ व बांधकाम खात्याचा तिढा मात्र कायम आहे. येत्या काही दिवसांत हे ‘मलाईदार’ खाते कोणाच्या झोळीत पडते, यावर रायगड जिल्हा परिषदेत पुढील राजकीय समीकरणे ठरणार असल्याचे स्पष्ट संकेत मिळत आहेत.

डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचार्‍यांनी संपादित केलेले नाही.