Raigad News: उरण नगरपरिषदेत राजकीय संघर्ष; बहुमताचा खेळ की विकासाला अडथळा? नागरिकांच्या कामांवर होणार परिणाम

उरण नगरपरिषदेत झालेल्या सर्वसाधारण सभेत राजकारण आणि विकास यांचा संघर्ष पुन्हा एकदा समोर आला. बहुमताच्या जोरावर विरोधकांनी महत्त्वाच्या नागरी कामांना विरोध केल्याने नागरिकांच्या अडचणी वाढण्याची शक्यता निर्माण झाली आहे.

• बहुमताचा प्रभाव – भाजपाकडे १२ नगरसेवक असल्याने ठरावांवर त्यांचा निर्णायक प्रभाव दिसून आला.
• महत्त्वाच्या कामांना विरोध – पाणी, रस्ते, गटार, सुरक्षा भिंत यांसारख्या आवश्यक कामांचे ठराव नामंजूर.
• नागरिकांमध्ये नाराजी – पावसाळ्यापूर्वी कामे रखडल्याने नागरिकांच्या सुरक्षेबाबत चिंता वाढली.

उरण: उरण नगरपरिषदेची सर्वसाधारण सभा शुक्रवारी नगरपरिषद सभागृहात शांततेत पार पडली. मात्र या सभेत राजकीय संघर्षांची ठिणगी स्पष्टपणे पाहायला मिळाली. विरोधी बाकावर असलेल्या भाजपाच्या नगरसेवकांनी बहुमताच्या जोरावर अनेक महत्त्वाच्या नागरी सुविधांशी संबंधित ठरावांना विरोध दर्शवत सत्ताधाऱ्यांची कोंडी केली. परिणामी, नागरिकांच्या दैनंदिन गरजांशी संबंधित कामे पुन्हा एकदा राजकारणाच्या कचाट्यात अडकली असल्याचे चित्र निर्माण झाले आहे.

एसटीच्या ताफ्यात आठ हजार नव्या बस येणार! १ जूनपासून प्रसाधनगृहे मोफत, परिवहनमंत्री प्रताप सरनाईक यांची माहिती

डिसेंबर २०२५ मध्ये झालेल्या निवडणुकांमध्ये महाविकास आघाडीच्या भावना घाणेकर यांची नगराध्यक्षपदी निवड झाली होती. त्याचवेळी मविआचे आठ नगरसेवक निवडून आले, तर भाजपाचे १२ नगरसेवक विजयी झाले. त्यामुळे नगराध्यक्षपद गमावूनही भाजपाकडे नगरपरिषदेमध्ये संख्याबळ टिकून राहिले. याच बहुमताच्या जोरावर सभागृहातील निर्णय प्रक्रियेत भाजपाचा प्रभाव कायम असल्याचे पुन्हा एकदा स्पष्ट झाले.  (फोटो सौजन्य – AI Created)

राजकारण की विकास ? नागरिकांत चर्चेचा विषय

एकंदरीत, निवडणुकीनंतर चार महिन्यांनंतरही उरण नगरपरिषदेमधील राजकीय वातावरण तापलेलेच असल्याचे या सभेतून दिसून आले. बहुमताच्या जोरावर घेतले जाणारे निर्णय आणि विकासकामांवर होणारा परिणाम यामुळे “राजकारण की विकास?” असा प्रश्न आता नागरिकांमध्ये चर्चेचा विषय बनला आहे.

अत्यावश्यक कामावर विरोध

शुक्रवारी झालेल्या सभेत पावसाळ्याच्या पार्श्वभूमीवर अत्यंत महत्त्वाच्या मानल्या जाणाऱ्या विविध कामांसाठी ठराव मांडण्यात आले होते. मात्र, विरोधकांनी निधीअभावाचे कारण देत या ठरावांना विरोध केला. यामध्ये पाणीपुरवठा टाक्यांची स्वच्छता, बोरी गावातील रस्त्याची दुरुस्ती, बोरी गावातील मुख्य नाल्यालगत सुरक्षा भित उभारणे, स्मशानभूमीचे सुशोभीकरण, गटार बांधकाम व दुरुस्ती, अपघातप्रवण ठिकाणी गतिरोधक बसविणे. ही सर्व कामे नागरिकांच्या सुरक्षेशी आणि आरोग्याशी थेट संबंधित असतानाही विरोध झाल्याने चिता व्यक्त केली.

१० विरुद्ध १२ मतांनी ठराव नामंजूर

सभेमध्ये प्रत्येक ठरावावर मतदान घेतले असता १० विरुद्ध १२ अशा मतांनी ठराव नामंजूर करण्यात आले. यावेळी नगरसेवक अतुल ठाकूर, प्रमिला पवार आणि स्वीकृत सदस्य गणेश शिंदे यांनी नागरी सुविधा लक्षात घेऊन ठराव मंजूर करण्यासाठी प्रयत्न केले. मात्र विरोधकांच्या एकजुटीपुढे त्यांचे प्रयत्न निष्फळ ठरले.

Shahapur News : शहापूरच्या जंगलात आगीचा तांडव; वणव्यामुळे हजारो हेक्टर हिरवाई जळून खाक

नागरिकांच्या समस्यांकडे दुर्लक्ष?

सभेत राजकीय भूमिका ठामपणे मांडताना विरोधकांनी निधीअभावाचा मुद्दा पुढे केला असला, तरी नागरिकांच्या मूलभूत गरजांवर परिणाम होणाऱ्या कामांना विरोध केल्याने नाराजी व्यक्त होत आहे. पावसाळा जवळ येत असताना ही कामे रखडल्यास नागरी समस्या, आरोग्याच्या समस्या आणि अपघातांचा धोका वाढण्याची शक्यता आहे.

नगराध्यक्षा भावना घाणेकर यांची प्रतिक्रिया

नगराध्यक्षा भावना घाणेकर यांनी विरोधकांवर टीका करताना सांगितले की, “विरोधकांनी राजकारण करणे स्वाभाविक आहे. मात्र नागरिकांच्या मूलभूत प्रश्नांकडे दुर्लक्ष करणे योग्य नाही. पावसाळ्यापूर्वीची कामे तातडीने होणे गरजेचे आहे. अन्यथा गंभीर समस्यांना सामोरे जावे लागेल.