आंजर्लेमधील कड्यावरच्या गणपती मंदिरातील दानपेटी फोडून चोरी; भक्तांमध्ये संताप
Ratnagiri News Marathi: रत्नागिरी जिल्ह्यातील दापोली तालुक्यातील आंजर्ले येथील प्रसिद्ध कड्यावरच्या गणपती मंदिरात चोरट्यांनी मध्यरात्री चोरी करत दानपेटी फोडून रोख रक्कम लंपास केली. १४ एप्रिल २०२६ रोजी पहाटे साधारण २ ते २.३० वाजण्याच्या सुमारास ही घटना घडली आहे. आंजर्ले येथील कड्यावरच्या गणपती मंदिरात मध्यरात्री चोरीची धक्कादायक घटना घडली असून, चोरट्यांनी दानपेटी फोडून सुमारे ९० हजार रुपयांचा मुद्देमाल लंपास केला आहे. या प्रकरणी दापोली पोलीस ठाण्यात चार अनोळखी इसमांविरुद्ध गुन्हा दाखल करण्यात आला आहे.
मिळालेल्या माहितीनुसार, विजय गणेश निजसुरे (वय ५९, एलआयसी एजंट,. आंजर्ले) यांनी दापोली पोलीस ठाण्यात फिर्याद दिली. त्यानुसार, १४ एप्रिल २०२६ रोजी पहाटे सुमारे २.२० वाजण्याच्या सुमारास चार अनोळखी इसमांनी मंदिर परिसरात प्रवेश केला. या चोरट्यांनी निळ्या रंगाचे फुलहाताचे जॅकेट, काळ्या रंगाची पँट, पायात पांढऱ्या-काळसर रंगाचे बूट, डोक्यावर कानटोपी आणि तोंडावर मास्क घातले होते.
चोरट्यांपैकी तिघांनी कोणत्यातरी लोखंडी हत्याराच्या साहाय्याने मंदिराच्या दर्शनी दरवाजाचे कुलूप तोडले आणि मंदिरात प्रवेश केला. त्यानंतर वरच्या सभामंडपातील स्टीलची दानपेटी उचलून ती मंदिराजवळील शिवमंदिरासमोरील त्रिपुराच्या मागील बुरुजाखाली नेली. तेथे दानपेटी फोडून त्यातील रोख रक्कम आणि दोन स्टीलचे लॉकर चोरून नेण्यात आले.
चोरीस गेलेल्या मालामध्ये दानपेटीतील सुमारे ५० हजार रुपयांची रोख रक्कम, ज्यात ५००, २००, १००, ५०, २०, १० रुपयांच्या नोटांसह विविध मूल्यांची नाणी होती, तसेच ४० हजार रुपये किमतीचे दोन स्टील लॉकर असा एकूण ९० हजार रुपयांचा मुद्देमाल आहे. या प्रकरणी दापोली पोलीस ठाण्यात गु.र. नं. ६२/२०२६ अंतर्गत भारतीय न्याय संहिता कलम ३३१(४), ३०५(अ), ३२४(४), ३(५) अन्वये गुन्हा दाखल करण्यात आला आहे. वरिष्ठांच्या आदेशानुसार या गुन्ह्याचा पुढील तपास पोउनि पाटील यांच्याकडे सोपविण्यात आला आहे.
चोरीची माहिती मिळताच पोलिसांनी तात्काळ घटनास्थळी धाव घेत पंचनामा सुरू केला. या घटनेतील महत्त्वाचा धागा म्हणजे मंदिर परिसरातील सीसीटीव्ही कॅमेऱ्यांमध्ये चोरट्यांची हालचाल कैद झाली आहे. फुटेजच्या आधारे पोलिसांनी आरोपींचा शोध सुरू केला असून, संशयितांची ओळख पटविण्याचे काम वेगाने सुरू आहे.
आंजर्ले येथील कड्यावरचा गणपती हे कोकणातील प्रसिद्ध श्रद्धास्थान असल्याने या चोरीच्या घटनेमुळे परिसरात खळबळ उडाली आहे. मंदिरात चोरी झाल्याने भाविकांमध्ये संतापाचे वातावरण असून, मंदिराच्या सुरक्षेबाबत प्रश्नचिन्ह निर्माण झाले आहे. पोलिसांकडून या प्रकरणाचा अधिक तपास सुरू असून, आरोपींना लवकरच अटक करण्यात येईल, असा विश्वास व्यक्त करण्यात येत आहे.
.png "Videos"){kind=small}
