सासपडे हत्या प्रकरण फास्ट्रॅक कोर्टात चालवले जाणार; राज्य महिला आयोगाच्या अध्यक्षा रुपाली चाकणकर यांची माहिती
टिटवेवाडी : सासपडे येथील अल्पवयीन मुलीची निर्घृण हत्या करण्यात आली. तिच्या कुटुंबाला न्याय लवकरात लवकर मिळावा यासाठी याप्रकरणी केस फास्ट्रॅक न्यायालयात चालवली जाणार आहे. राज्य महिला आयोगामार्फत आरोपीला फाशीची शिक्षा व्हावी यासाठी शिफारस करणार असल्याचे आयोगाच्या अध्यक्षा रुपाली चाकणकर यांनी सांगितले.
राज्य महिला आयोगाच्या अध्यक्षा चाकणकर यांनी सासपडे येथे जाऊन चव्हाण कुटुंबाची भेट घेऊन त्यांचे सांत्वन केले. यावेळी पोलीस अधीक्षक तुषार दोशी उपस्थित होते. चव्हाण कुटुंबीयांना कोणत्याही प्रकाराचा त्रास होऊ नये, यासाठी पोलीस संरक्षण द्यावे, असे सांगून राज्य महिला आयोगाच्या अध्यक्षा चाकणकर म्हणाल्या, मनोधैर्य योजनेतून कुटुंबाला तातडीने मदत करावी. तसेच मुख्यमंत्री सहाय्यता निधीतूनही कुटुंबाला मदत मिळवून देण्यात येईल. राज्य महिला आयोग आपल्या पाठीशी असून, न्यायालयात जास्तीत जास्त पुरावे सादर करुन आरोपीला फाशीची शिक्षा होण्यासाठी प्रयत्न केले जातील.
सासपडेसारखी घटना
सातारा जिल्ह्यात पुन्हा घडू नये, यासाठी पोक्सोमधील जे गुन्हेगार बाहेर आहेत, ते सध्या काय करत आहेत, याची तपासणी करुन काही गैरवर्तन करत असल्यास त्यांच्यावर तातडीने कारवाई करावी, असे निर्देश चाकणकर यांनी पोलीस विभागाला दिले.
काय आहे नेमकं प्रकरण?
गेल्या शुक्रवारी परीक्षा झाल्यानंतर संबंधित मुलगी वडिलांकडून चावी घेऊन घरी गेली. घरी गेल्यानंतर ती आतल्या खोलीत कपडे काढत होती. त्यावेळी तिच्या घरात व आजुबाजूला कोणी नसल्याचे पाहून राहुल घरात गेला. त्याने तिच्यावर अतिप्रसंग करण्याचा प्रयत्न केला. मात्र, मुलीने त्याला जोरदार प्रतिकार केला. त्यामुळे चिडलेल्या आरोपीने तिला फरशीवर आपटले व तिला बाथरुमच्या दिशेने ओढत नेले तिथलाच वरवंटा तिच्या डोक्यात घातला. त्यात मुलगी रक्तबंबाळ झाल्याने आरोपीने तेथून पळ काढला.
हेदेखील वाचा : कपडे बदलताना आत शिरला, नंतर मुलीने अत्याचाराला विरोध करताच डोक्यात वरवंटा घातला अन्…
