Satara News: साताऱ्यात पालिकेची धडक कारवाई; मंगळवार तळ्यालगतचे बांधकाम जेसीबीने हटविले

सातारा शहरातील ऐतिहासिक मंगळवार तळ्याच्या दर्शनी भागातील अतिक्रमणांवर अखेर पालिकेने कारवाई केली. जेसीबीच्या सहाय्याने पक्के झुणका-भाकर केंद्र आणि टपरीचे बांधकाम हटविण्यात आले. या कारवाईमुळे तळ्यालगतचा रस्ता आणि परिसर मोकळा झाला असून, नागरिकांनी समाधान व्यक्त केले आहे.

• मंगळवार तळ्यावरील अतिक्रमणांवर पालिकेचा हातोडा
• झुणका-भाकर केंद्रासह टपरी जेसीबीने हटविली
• तळ्यालगतचा परिसर पुन्हा झाला मोकळा

सातारा : शहराच्या मध्यवर्ती भागातील ऐतिहासिक मंगळवार तळ्याच्या दर्शनी भागात झालेल्या अतिक्रमणांवर अखेर सातारा पालिकेने कारवाई केली. सोमवारी सायंकाळी अतिक्रमण निर्मूलन पथकाने जेसीबीच्या सहाय्याने एक पक्के झुणका-भाकर केंद्र आणि एका टपरीचे बांधकाम हटविले. या कारवाईमुळे तळ्यालगतचा रस्ता आणि परिसर काहीसा मोकळा झाला आहे.

हेही वाचा:Baramati Crime: माळेगाव हादरले! गजबजलेल्या राजहंस चौकात दोन तरुणांवर कोयत्याने प्राणघातक हल्ला

रस्ता अरुंद, तळ्याचा दर्शनी भागही झाकोळला

मंगळवार तळे ते राजवाडा या मार्गावर दिवसभर मोठ्या प्रमाणात वाहतूक असते. या मार्गालगत तळ्याच्या बाजूला झालेल्या बांधकामांमुळे रस्त्याची जागा कमी झाली होती. तसेच अतिक्रमणांमुळे ऐतिहासिक तळ्याचा दर्शनी भागही झाकोळला गेला होता. परिसराच्या सौंदर्यावर परिणाम होत असल्याच्या तक्रारी नागरिकांकडून करण्यात आल्या होत्या. पालिकेच्या पथकाने सोमवारी अचानक कारवाई करत संबंधित बांधकामे हटविली. जेसीबीच्या सहाय्याने पक्के बांधकाम पाडण्यात आले, तर टपरीही हटविण्यात आली. त्यामुळे तळ्यालगतची मोकळी जागा पुन्हा खुली झाली आहे.

हेही वाचा: Baramati News: ‘एक रुपयाचाही भ्रष्टाचार केला तर फाशी द्या’; ‘छत्रपती’च्या सभेत जाचकांचे वक्तव्य

अतिक्रमणांवर सातत्याने कारवाईची मागणी

मुख्याधिकारी विनोद जळक यांच्या मार्गदर्शनाखाली अतिक्रमण विभागप्रमुख प्रशांत निकम यांच्या नेतृत्वाखाली ही कारवाई करण्यात आली. ऐतिहासिक वास्तू आणि जलस्रोतांच्या परिसरात होणाऱ्या अतिक्रमणांवर पालिकेने सातत्याने कारवाई करावी, अशी अपेक्षा नागरिकांकडून व्यक्त होत आहे.