
Jaykumar gore shambhuraj desai
सातारा : सातारा जिल्हा बँकेच्या निवडणुकीवरून महायुतीमधील राजकीय वातावरण चांगलंच तापलं आहे. मंत्री जयकुमार गोरे आणि पालकमंत्री शंभूराज देसाई यांच्यात सध्या विधानांची जुगलबंदी पाहायला मिळत आहे. आधी शंभूराज देसाई यांनी ‘जालीम औषधा’चा उल्लेख केला, त्यावर जयकुमार गोरे यांनी ‘अघोरी बाबां’चा टोला लगावला. आता देसाई यांनीही यावर मिश्कील उत्तर देत गोरेंना प्रत्युत्तर दिलं आहे. त्यामुळे साताऱ्याच्या राजकारणात पुन्हा एकदा चर्चांना उधाण आलं आहे. (Shambhuraj Desai)
सातारा जिल्हा मध्यवर्ती सहकारी बँकेच्या अध्यक्षपदी राष्ट्रवादी काँग्रेसचे उदयसिंह पाटील उंडाळकर, तर उपाध्यक्षपदी शिवसेनेचे दीपक चव्हाण यांची निवड झाली. या सत्तास्थापनेत भाजपला अपेक्षित पद मिळाले नसल्याने राजकीय चर्चांना सुरुवात झाली.
या निवडीनंतर शंभूराज देसाई यांनी काही राजकीय जखमा खोलवर असतात आणि त्या जालीम औषध घेतल्यावरच बऱ्या होतात, असं विधान केलं होतं. त्यावर जयकुमार गोरे यांनी अघोरी विद्येचा उल्लेख करत अप्रत्यक्षपणे देसाईंना लक्ष्य केलं.
जयकुमार गोरे यांच्या वक्तव्यावर प्रतिक्रिया देताना शंभूराज देसाई म्हणाले की, हा अघोरी बाबा कुठे मिळतो, हे गोरे यांनाच विचारावं लागेल. त्यांना त्याचा इलाज लागू पडला असेल, तर मी त्यांच्याकडून माहिती घेईन, असा मिश्कील टोला त्यांनी लगावला.
गोरे यांनी ‘दम होता तर निवडणूक लढवायची’ असं विधान केलं होतं. यावर उत्तर देताना देसाई म्हणाले की, आम्ही कधीही दमाची भाषा केलेली नाही. मात्र, कोणी वारंवार अशी भाषा करत असेल, तर आकडेवारीच सर्व काही स्पष्ट करते.
तालुक्यातील ११ पैकी ७ जागा राष्ट्रवादी काँग्रेस आणि शिवसेनेच्या युतीने जिंकल्या आहेत. जिल्हा गटातील पाच जागांवरही हेच ठरावधारक मतदान करणार असल्याने आमची बाजू भक्कम आहे, असा दावा त्यांनी केला. या विषयावर जाहीर चर्चा करण्याचीही तयारी असल्याचं देसाईंनी स्पष्ट केलं.
महायुतीचे अध्यक्ष आणि उपाध्यक्ष निवडून आल्याने सर्वच पक्ष आनंदी असल्याचं देसाई म्हणाले. जयकुमार गोरे हे मंत्रिमंडळातील सहकारी असल्याने त्यांच्याबद्दल अधिक भाष्य करणार नसल्याचंही त्यांनी सांगितलं.
मात्र, एका बाजूला महायुतीच्या एकजुटीची भाषा आणि दुसरीकडे मंत्र्यांमधील ही शाब्दिक टोलेबाजी पाहता सातारा जिल्ह्यातील राजकारण चांगलंच रंगताना दिसत आहे. आता जयकुमार गोरे या नव्या टीकेला काय उत्तर देतात, याकडे राजकीय वर्तुळाचं लक्ष लागलं आहे.
Ans: मंत्री जयकुमार गोरे आणि साताऱ्याचे पालकमंत्री शंभूराज देसाई यांच्यात वक्तव्यांवरून शाब्दिक संघर्ष सुरू आहे.
Ans: ‘हा अघोरी बाबा कुठे मिळतो, हे गोरे यांनाच विचारावं लागेल. त्यांना इलाज लागू पडला असेल तर मी त्यांच्याकडून माहिती घेईन,’ असा मिश्कील टोला देसाई यांनी लगावला.
Ans: अध्यक्षपदी उदयसिंह पाटील उंडाळकर आणि उपाध्यक्षपदी दीपक चव्हाण यांची निवड झाली.