वाई डाक उपविभागाची कामगिरी अभिमानास्पद; PLI-RPLI महालॉगिन डेमध्ये ₹1.58 कोटींचा विमाहप्ता, कर्मचाऱ्यांचा गौरव
Satara News : वाई डाक उपविभागाने विविध उपक्रमांमध्ये केलेली उल्लेखनीय कामगिरी कौतुकास्पद असून, ही कामगिरी डाक विभागासाठी अभिमानास्पद आहे. भविष्यातही वाई डाक उपविभागाची टीम अशीच उल्लेखनीय कामगिरी करेल, असा विश्वास महाराष्ट्र व गोवा डाक परिमंडळाचे मुख्य पोस्टमास्तर जनरल रामचंद्र जायभाये यांनी व्यक्त केला.
वाई डाक उपविभागाच्या वतीने ३० ऑगस्ट रोजी वाई येथील किसनवीर महाविद्यालयाच्या सभागृहात ‘ग्रामीण डाक सेवक संवाद व गौरव समारंभा’चे आयोजन करण्यात आले होते. यावेळी ते प्रमुख पाहुणे म्हणून बोलत होते.
कार्यक्रमाच्या अध्यक्षस्थानी सातारा डाक विभागाचे प्रवर डाक अधीक्षक प्रसून्ना रेड्डी होते. किसनवीर महाविद्यालयाचे प्राचार्य डॉ. गुरुनाथ फगरे, डाक उपअधीक्षक मयूरेश कोळे, सहाय्यक डाक अधीक्षक हितेश पाठक, सातारा (प.) डाक उपविभागाचे निरीक्षक धनेश यादव तसेच वाई डाक उपविभागाचे निरीक्षक ज्ञानेश्वर डोंगरे यांची प्रमुख उपस्थिती होती.
कार्यक्रमाची सुरुवात दीपप्रज्वलनाने व स्वागतगीताने झाली. यावेळी १९ ऑगस्ट २०२६ रोजी घेण्यात आलेल्या PLI-RPLI महालॉगिन डे तसेच आर्थिक वर्षात राबविण्यात आलेल्या विविध उपक्रमांमध्ये उल्लेखनीय कामगिरी करणाऱ्या ग्रामीण डाक सेवक, सब पोस्टमास्तर आणि डाक कर्मचाऱ्यांचा ट्रॉफी व पारितोषिक देऊन गौरव करण्यात आला.
१९ ऑगस्ट रोजी झालेल्या महालॉगिन डे दरम्यान वाई डाक उपविभागाने तब्बल १ कोटी ५८ लाख रुपयांचा विमाहप्ता जमा केला. या उल्लेखनीय कामगिरीबद्दल वाईचे डाक निरीक्षक ज्ञानेश्वर डोंगरे आणि त्यांच्या संपूर्ण टीमचे विशेष कौतुक करण्यात आले.
मार्गदर्शन करताना मुख्य पोस्टमास्तर जनरल रामचंद्र जायभाये यांनी भारतीय डाक विभागामार्फत अत्यंत कमी खर्चात डाक जीवन विमा (PLI) व ग्रामीण डाक जीवन विमा (RPLI) उपलब्ध करून दिला जात असल्याचे सांगितले. वाई तसेच परिसरातील नागरिकांनी या योजनांचा अधिकाधिक लाभ घ्यावा, असे आवाहनही त्यांनी केले.
प्रवर डाक अधीक्षक प्रसून्ना रेड्डी म्हणाले की, वाई डाक उपविभागाची कामगिरी खरोखरच गौरवास्पद आहे. सर्व उपविभाग एक टीम म्हणून काम करत असल्यामुळे अशक्यप्राय वाटणारी उद्दिष्टेही अत्यंत कमी कालावधीत साध्य झाली आहेत. भविष्यातही हीच कार्यक्षमता आणि टीमवर्क कायम ठेवावे, असे आवाहन त्यांनी केले.
डाक उपअधीक्षक मयूरेश कोळे यांनीही वाई डाक उपविभागातील अधिकारी व कर्मचाऱ्यांचे विशेष कौतुक केले. यावेळी पारितोषिक विजेत्या काही कर्मचाऱ्यांनी आपले मनोगत व्यक्त केले.
कार्यक्रमास वाई डाक उपविभागातील सर्व ग्रामीण डाक सेवक, सब पोस्टमास्तर तसेच डाक कर्मचारी मोठ्या संख्येने उपस्थित होते. कार्यक्रमाची सांगता राष्ट्रगीताने झाली.
.png "Videos"){kind=small}
