इंदापुरात नगराध्यक्षपदाची लढत तापली, दोन्ही उमेदवारांची झंझावाती मोहीम; निवडणूक वातावरण रंगतदार

इंदापूर नगरपरिषद निवडणुकीत अर्ज माघारीनंतर वातावरण तापलं असताना, आता शहरात प्रचाराचा खरा थरार जाणवू लागला आहे.

• इंदापुरात नगराध्यक्षपदाची लढत तापली
• दोन्ही उमेदवारांची झंझावाती मोहीम
• निवडणूक वातावरण रंगतदार

इंदापूर : इंदापूर नगरपरिषद निवडणुकीत अर्ज माघारीनंतर वातावरण तापलं असताना, आता शहरात प्रचाराचा खरा थरार जाणवू लागला आहे. नगराध्यक्षपदासाठी राष्ट्रवादी काँग्रेसचे भरत शहा आणि कृष्णा-भीमा विकास आघाडीचे प्रदीप गारटकर यांनी शहरातील प्रत्येक प्रभागात मोठ्या प्रमाणात जनसंपर्काचा वेग वाढवला असून, दोन्ही बाजूंनी तुफान मोहीम उभी टाकली आहे. गारटकर यांच्या प्रचारासाठी माजी मंत्री हर्षवर्धन पाटील, भाजपाचे नेते प्रवीण माने, आणि स्वतः गारटकर हे शहरातील विविध प्रभागांत सभा, कोपरा बैठका, संवाद यांची मालिका राबवत आहेत. प्रत्येक गल्लीबोळात होणाऱ्या या बैठकींमुळे आघाडीच्या पथकाला मोठा प्रतिसाद मिळत असून, वातावरणात ठसा उमटवण्याचा त्यांचा प्रयत्न जोरदार सुरू आहे.

दुसरीकडे राष्ट्रवादीचे उमेदवार भरत शहा यांनी होम टू होम मोहीम आक्रमकपणे सुरू केली आहे. त्यांच्या संपर्क मोहिमेला साथ देण्यासाठी माजी नगराध्यक्षा अंकिता शहा, बंधू मुकुंद शहा हे घरोघरी जाऊन नागरिकांशी संवाद साधत आहेत. त्याचसोबत जिल्हा बँकेचे संचालक आप्पासाहेब जगदाळे यांनीही शहरात अनेकांच्या भेटी घेत प्रचाराला वेग दिला आहे. शुक्रवारपासून राज्याचे कृषीमंत्री दत्तात्रय भरणे हेही शहरातील विविध भागांत सभा घेणार असून, या सभांमुळे राष्ट्रवादीच्या प्रचारात आणखी दम येण्याची शक्यता व्यक्त होत आहे.

डिजिटल प्रचारावर विशेष लक्ष

निवडणुकीचा रंगतदार माहोल फक्त रस्त्यांवरच नाही तर सोशल मीडियावरही दिसून येत आहे. दोन्ही बाजूंकडून डिजिटल प्रचारावर विशेष लक्ष केंद्रित केले असून, बाहेरगावी असलेल्या मतदारांपर्यंत पोहचण्यासाठी वेगवेगळ्या माध्यमांचा उपयोग केला जात आहे. दरम्यान, शहरात जेवणावळींचा ट्रेंडही सुरू झाला आहे. प्रभागनिहाय आयोजित केल्या जाणाऱ्या या जेवणावळींनी प्रचाराला वेगळेच वळण मिळाले आहे. प्रचाराची गती वाढताच हॉटेलांमध्येही गर्दी वाढल्याचे चित्र कायम आहे. एकीकडे हिवाळ्याचा गारवा वाढत असताना, दुसरीकडे इंदापूरच्या राजकारणात ‘गरमाई’ शिगेला पोहचली असून, कोण बाजी मारते याकडे सर्वांचे लक्ष लागले आहे.