Wardha News : ओबीसी विद्यार्थ्यांचे वसतिगृह अजूनही भाड्याच्या घरात; हक्काच्या इमारतीचा प्रस्ताव रखडला

Wardha News : वर्ध्यात ओबीसी विद्यार्थ्यांसाठी सुरू असलेली मुला-मुलींची दोन वसतिगृहे सध्या भाड्याच्या इमारतीत सुरू आहेत. स्वतंत्र इमारतीसाठी सिंदी मेघे येथे जागा निश्चित झाली असून जमीन हस्तांतरण आणि निधी मंजुरीची प्रक्रिया रखडली आहे.

• नालवाडीतील मुला-मुलींची दोन्ही ओबीसी वसतिगृहे भाड्याच्या जागेत
• सिंदी मेघे परिसरात स्वतंत्र वसतिगृहासाठी जागा निश्चित
• जमीन हस्तांतरण आणि निधी मंजुरीनंतर बांधकामाला मिळणार गती

 

Wardha News : वर्धा जिल्ह्यातील ओबीसी विद्यार्थी आणि विद्यार्थिनींसाठी नालवाडी परिसरात सुरू असलेली दोन स्वतंत्र वसतिगृहे सध्या भाड्याच्या इमारतीत सुरू आहेत. स्वतःची हक्काची इमारत नसल्याने विद्यार्थ्यांना भाड्याच्या जागेतच राहण्याची सुविधा देण्यात आली आहे. दरम्यान, स्वतंत्र वसतिगृहाच्या इमारतीसाठी जिल्हा प्रशासनाकडे प्रस्ताव सादर करण्यात आला असून सिंदी मेघे परिसरात जागाही निश्चित करण्यात आली आहे. मात्र जमीन हस्तांतरणाची प्रक्रिया अद्याप पूर्ण झालेली नाही.

नालवाडी येथे ओबीसी विद्यार्थ्यांसाठी आणि विद्यार्थिनींसाठी प्रत्येकी १०० विद्यार्थी क्षमतेची स्वतंत्र वसतिगृहे सुरू आहेत. सध्या मुलींच्या वसतिगृहात ४८ विद्यार्थिनी, तर मुलांच्या वसतिगृहात ६० विद्यार्थी वास्तव्यास आहेत.

दोन्ही वसतिगृहांना स्वतःची इमारत नसल्याने भाड्याच्या जागेत विद्यार्थ्यांच्या निवासाची व्यवस्था करण्यात आली आहे. शासनाकडून या विद्यार्थ्यांना निर्वाह भत्ताही दिला जातो. भोजनासाठी विद्यार्थ्यांना दरमहा ४ हजार ५०० रुपयांचा निर्वाह भत्ता मिळतो. विद्यार्थिनींसाठी यासोबत स्वतंत्र स्वच्छता भत्त्याचीही तरतूद आहे.

Wardha News : ३२६ वनहक्कधारकांच्या सातबारावर चढणार नाव; आदिवासी-वननिवासी शेतकऱ्यांना मोठा दिलासा

सिंदी मेघेतील जागा निश्चित

ओबीसी विद्यार्थ्यांसाठी कायमस्वरूपी आणि स्वतंत्र इमारत उभारण्याच्या उद्देशाने जिल्हा प्रशासनाकडे काही महिन्यांपूर्वी प्रस्ताव सादर करण्यात आला. प्रशासनाने सिंदी मेघे परिसरातील जागा वसतिगृहासाठी निश्चित केली आहे. सध्या या जागेच्या हस्तांतरणाची प्रक्रिया सुरू असल्याची माहिती आहे.

मात्र जमीन हस्तांतरण पूर्ण झाल्यानंतर पुढचा महत्त्वाचा टप्पा म्हणजे बांधकामासाठी आवश्यक निधी मंजूर होणे. शासनाकडून निधी उपलब्ध झाल्यानंतरच दोन्ही वसतिगृहांच्या स्वतंत्र इमारती उभारण्याच्या कामाला प्रत्यक्ष सुरुवात होऊ शकणार आहे.

विद्यार्थ्यांना मिळणार कायमस्वरूपी सुविधा

सध्या भाड्याच्या इमारतीत राहणाऱ्या विद्यार्थ्यांना भविष्यात स्वतःच्या इमारतीत अधिक चांगल्या सुविधा मिळण्याची अपेक्षा आहे. त्यामुळे सिंदी मेघे येथील जागेचं हस्तांतरण, निधी मंजुरी आणि बांधकामाची प्रक्रिया कधी मार्गी लागते, याकडे ओबीसी विद्यार्थी आणि पालकांचं लक्ष लागलं आहे.

स्वतंत्र इमारत उभी राहिल्यास विद्यार्थ्यांच्या निवासाची समस्या कायमस्वरूपी सुटण्यास मदत होणार असून, वसतिगृहाच्या सुविधांमध्येही वाढ होण्याची शक्यता आहे.

Wardha News : आश्रमशाळेत क्षमतेपेक्षा कमी विद्यार्थी, ६० टक्केच हजेरी; अधिकाऱ्यांच्या नियमित भेटी नसल्याची ओरड