तुमचे विचार पुढील मार्ग उजळवणारे 'दीप' आहेत; सुनेत्रा पवार यांची भावपूर्ण पोस्ट
बारामती / अमोल तोरणे : दिवंगत उपमुख्यमंत्री अजित पवार यांच्या अपघाती निधनाला दोन महिने पूर्ण झाल्याच्या पार्श्वभूमीवर त्यांच्या पत्नी व विद्यमान उपमुख्यमंत्री सुनेत्रा पवार यांनी सोशल मीडियावर भावनिक पोस्ट शेअर करत आपल्या भावना व्यक्त केल्या. या पोस्टमध्ये त्यांनी अजितदादांच्या आठवणींना उजाळा देत त्यांच्या कार्याचा वारसा पुढे नेण्याचा निर्धार व्यक्त केला आहे.
“काळ पुढे सरकतोय, पण मन अजूनही तुमच्याच आठवणींमध्ये गुंतून आहे,” अशा शब्दांत त्यांनी आपल्या भावना व्यक्त केल्या. अजित पवार यांचे लोकाभिमुख व विकासाभिमुख नेतृत्व, सर्वसामान्यांशी असलेला जिव्हाळा आणि कामासाठीची झपाटलेली वृत्ती यांचा उल्लेख करत त्यांनी सांगितले की, त्यांच्या प्रत्येक निर्णयामागील दूरदृष्टी आजही मार्गदर्शक ठरत आहे. सुनेत्रा पवार यांनी आपल्या पोस्टमध्ये नमूद केले की, “तुम्ही केवळ एक नेते नव्हता, तर असंख्य लोकांच्या आयुष्यात विश्वास, बळ आणि आशा निर्माण करणारे आधारस्तंभ होता.” त्यांच्या नेतृत्वामुळे अनेकांना दिशा व संधी मिळाल्याचे त्यांनी अधोरेखित केले.
शिव, शाहू, फुले आणि आंबेडकर यांच्या विचारसरणीवर चालणाऱ्या राष्ट्रवादी काँग्रेसच्या वाटचालीत अजित पवार यांची प्रेरणा कायम असल्याचेही त्यांनी स्पष्ट केले. “लोककल्याणासाठी निर्णय घेताना या परिस्थितीत तुम्ही काय केले असते, हा विचार मनात ठेवूनच मी प्रत्येक पाऊल उचलण्याचा प्रयत्न करते,” असे त्यांनी म्हटले आहे.
अजित पवार यांच्या अनुपस्थितीत निर्माण झालेली पोकळी कधीच भरून निघणार नाही, ही खंत व्यक्त करत त्यांनी त्यांच्या विचारांनाच पुढील मार्गाचा दीपस्तंभ मानले आहे. त्यांच्या आठवणी, संवाद आणि शिकवण यांच्याच बळावर पुढील वाटचाल करण्याचा निर्धार त्यांनी व्यक्त केला. या भावनिक पोस्टमुळे कार्यकर्त्यांमध्येही भावना दाटून आल्या असून, सोशल मीडियावर अनेकांनी अजितदादांना श्रद्धांजली अर्पण करत त्यांच्या कार्याला सलाम केला आहे.
बारामतीकरांनी केले अभिवादन
उपमुख्यमंत्री अजित पवार यांच्या निधनाला दोन महिने पूर्ण झाले आहेत. बारामती विमानतळापासून काही अंतरावर असलेल्या ठिकाणी अजितदादांचा अपघात झाला होता, त्या ठिकाणी असंख्य कार्यकर्त्यांसह अजितदादांवर प्रेम करणाऱ्या नागरिकांनी जाऊन पुष्पहार अर्पण करून अभिवादन केले. त्याचबरोबर विद्या प्रतिष्ठानच्या प्रांगणात अजितदादांच्या स्मृतीस्थळावर जाऊन देखील अनेकांनी अभिवादन केले.
बारामतीकरांनी अजितदादांच्या अर्ध पुतळ्याला अभिवादन
नटराज नाट्य कला मंडळातील अजितदादांच्या अर्ध पुतळ्याला देखील बारामतीकरांनी अभिवादन केले. या ठिकाणी या मंडळाचे अध्यक्ष किरण गुजर यांच्या पुढाकाराने अजितदादांच्या स्मृती प्रित्यर्थ अजितदादांचे आवडते गायक किशोरकुमार यांच्या गाण्यांचा कार्यक्रम प्रसिद्ध गायक हिम्मतकुमार पांड्या हे सायंकाळी सादर करणार आहेत.
हेदेखील वाचा : Maharashtra Politics : “निरोप समारंभाच्या फोटोत तुम्ही हवे होता…; अमोल मिटकरींची अजित पवारांसाठी भावूक पोस्ट
.png "Videos"){kind=small}
