(फोटो सौजन्य - इन्स्टाग्राम)
मराठी चित्रपटसृष्टीत नेहमीच आशयप्रधान आणि प्रेक्षकांच्या मनाला भिडणाऱ्या कथांची परंपरा राहिली आहे. याच परंपरेला पुढे नेत आता ‘गल्ली नं. १३’ हा नवा चित्रपट प्रेक्षकांच्या भेटीला येण्यासाठी सज्ज झाला आहे. चित्रपटाचे शीर्षक जितके वेगळे आणि कुतूहल निर्माण करणारे आहे, तितकाच त्याचा आशयही वेगळा असणार असल्याची चर्चा सध्या रंगू लागली आहे. नुकतेच या चित्रपटाचे पहिले पोस्टर प्रदर्शित करण्यात आले असून, त्याला प्रेक्षकांकडून उत्स्फूर्त प्रतिसाद मिळताना दिसत आहे.
या पोस्टर लाँच सोहळ्याला अनेक मान्यवरांची उपस्थिती लाभली. चित्रपटाशी संबंधित कलाकार, निर्माते आणि तांत्रिक टीमसोबतच विविध क्षेत्रातील प्रतिष्ठित व्यक्तींनीही हजेरी लावली होती. ‘गल्ली नं. १३’ची निर्मिती आरबी सिनेमॅटिक्सने पिकल एन्टरटेन्मेंटच्या सहकार्याने केली असून, रामनाथ बोडके आणि राजश्री बडगुजर हे या चित्रपटाचे निर्माते आहेत. विशेष म्हणजे, सामाजिक आणि सांस्कृतिक क्षेत्रात सक्रिय असलेले रामनाथ बोडके यांची ही पहिलीच चित्रपट निर्मिती असून, त्यामुळे या प्रकल्पाकडे अधिक उत्सुकतेने पाहिले जात आहे.
Dhurandhar 2: लपून- छपून यामी गौतमने पाहिला 3 तास 49 मिनिटांचा ‘हा’ चित्रपट; नक्की काय आहे कारण?
चित्रपटाचे दिग्दर्शन, पटकथा आणि संवादलेखन महेंद्र रामभाऊ बोरकर यांनी केले आहे. मराठी आणि हिंदी मालिकांमध्ये लेखनाचा मोठा अनुभव असलेल्या बोरकर यांनी या चित्रपटातून एक वेगळी कथा मांडण्याचा प्रयत्न केला आहे. त्यांच्या साहित्यिक कार्यालाही मोठी दाद मिळाली असून, ‘ब्युटिफाईंग रिलेशन्स’ या पुस्तकासाठी त्यांना गोल्डन बुक पुरस्काराने गौरविण्यात आले आहे. त्यामुळे त्यांच्या दिग्दर्शनातून साकार होणारा हा चित्रपट प्रेक्षकांसाठी खास ठरण्याची शक्यता आहे.
चित्रपटाच्या पोस्टरनेही प्रेक्षकांचे लक्ष वेधून घेतले आहे. पोस्टरमध्ये नायक पाठमोरा उभा असून, त्याच्या व्यक्तिमत्त्वात एक गूढता दिसून येते. स्टायलिश जॅकेट परिधान केलेल्या या नायकाच्या मागे वीज पडल्यासारखा इफेक्ट देण्यात आला आहे, ज्यामुळे तो दुभंगल्यासारखा भासतो. शहराच्या पार्श्वभूमीवर साकारलेले हे पोस्टर चित्रपटाच्या कथेबद्दल कोणतीही थेट कल्पना देत नसले, तरी त्यातून एक वेगळा आणि थरारक अनुभव मिळणार असल्याचे संकेत मिळतात.
‘गल्ली नं. १३’ ही कथा मुख्यतः तरुणाईभोवती फिरणारी असली, तरी त्यात कुटुंबव्यवस्था, सामाजिक बदल आणि आधुनिक जीवनशैलीतील विविध पैलूंवर प्रकाश टाकण्यात येणार आहे. हा चित्रपट केवळ मनोरंजनापुरता मर्यादित नसून, प्रेक्षकांना विचार करायला भाग पाडणारा असेल, असा विश्वास निर्मात्यांनी व्यक्त केला आहे. कुटुंब, प्रेम, संस्कृती, स्वप्न आणि मानवी नात्यांमधील गुंतागुंत या सगळ्यांचा सुंदर मिलाफ या कथेत पाहायला मिळणार आहे.
दिग्दर्शक महेंद्र बोरकर यांच्या मते, हा चित्रपट आजच्या जेन झी पिढीपासून ते ज्येष्ठ प्रेक्षकांपर्यंत सर्वांना भावेल. प्रत्येकाच्या आयुष्यातील पहिल्या प्रेमाच्या आठवणी जाग्या करणारा, तसेच नात्यांची वेगवेगळी रूपं दाखवणारा हा सिनेमा असेल. प्रेक्षकांना कधी हसवणारा, तर कधी भावूक करणारा असा हा एक परिपूर्ण मनोरंजनाचा पॅकेज ठरणार आहे.
चित्रपटाची कथा डॉ. एस. डी. पाटील यांनी लिहिली असून, संगीतकार रोहित नागभिडे या चित्रपटातील गीतांना सुरेल संगीत देणार आहेत. नृत्य दिग्दर्शनाची जबाबदारी प्रज्ञा पाटील सांभाळणार असून, एपीएच स्टुडिओकडे पोस्ट-प्रॉडक्शनची धुरा सोपवण्यात आली आहे. सध्या चित्रपटासाठी कलाकारांची निवड प्रक्रिया सुरू असून, लवकरच चित्रीकरणाला सुरुवात होणार आहे. ‘गल्ली नं. १३’ हा चित्रपट आपल्या वेगळ्या शीर्षक, आशयघन कथा आणि ताकदीच्या टीममुळे आधीपासूनच चर्चेत आला आहे. आता पोस्टरनंतर प्रेक्षकांच्या अपेक्षा आणखी वाढल्या असून, हा चित्रपट मराठी सिनेसृष्टीत एक वेगळी ओळख निर्माण करेल का, याकडे सर्वांचे लक्ष लागले आहे..
.png "Videos"){kind=small}
