Kantara Controversy : ‘कांतारा’ नक्कल प्रकरणी रणवीर सिंगचा मोठा निर्णय, ‘या’ पवित्र मंदिरात जाऊन मागणार माफी?

बॉलिवूड अभिनेता रणवीर सिंगचा कांतारा नक्कल प्रकरणाचा वाद अजूनही सुरूच आहे. याप्रकरणी सध्या कर्नाटक उच्च न्यायालयात सुनवाणी सुरू असून या प्रकरणी नवीन माफीनामा जाहीर करण्यात येणार असल्याची माहिती मिळत आहे

बॉलिवूड अभिनेता रणवीर सिंग सध्या यशाच्या उंबरठ्यावर आहे. त्याच्या ‘धुरंधर: द रिव्हेंज’ या चित्रपटाने १७०० कोटी रुपयांची कमाई करून इतिहास रचला आहे, परंतु गेल्या नोव्हेंबरमध्ये सुरू झालेला एक धार्मिक वाद अजूनही धुमसत आहे. ऋषभ शेट्टीच्या ‘कांतारा’ या चित्रपटाशी आणि त्याद्वारे धार्मिक भावनांचा कथित अपमान केल्याच्या आरोपाशी संबंधित या प्रकरणाची सुनावणी सध्या कर्नाटक उच्च न्यायालयात सुरू आहे.

नोव्हेंबर २०२५ मध्ये गोव्यात झालेल्या आंतरराष्ट्रीय भारतीय चित्रपट महोत्सवातून हा वाद निर्माण झाला आहे. रणवीर सिंगने ‘कांतारा: चॅप्टर १’ मध्ये ऋषभ शेट्टीने साकारलेल्या ‘दैवा’ या पात्राची नक्कल केली होती. दक्षिण भारतात, ही भूमिका केवळ एक चित्रपटातील भूमिका नसून गाढ धार्मिक श्रद्धेचे प्रतीक आहे. ऋषभ शेट्टीने मंचावर रणवीरला थांबवण्याचा प्रयत्न केला, परंतु उत्साहाने भारावलेल्या रणवीरने तोच प्रकार पुन्हा केला. या कृत्यामुळे कर्नाटकातील लोकांच्या आणि भक्तांच्या भावना दुखावल्या गेल्या, ज्यामुळे अभिनेत्यावर गुन्हा दाखल करण्यात आला.

‘राजा शिवाजी’च्या ‘छत्रपती’ अँथमचा BTS व्हिडिओ प्रदर्शित; चाहत्यांसाठी अजय-अतुलच्या संगीताची खास भेट

वाद वाढत गेल्यावर रणवीर सिंगने सोशल मीडियावर माफी मागितली, पण तक्रारदार प्रशांत मैथल यांनी ती स्वीकारण्यास नकार दिला. त्यांनी असा युक्तिवाद केला की, रणवीरचे पूर्वीचे प्रतिज्ञापत्र केवळ एक औपचारिकता होती आणि त्यात पश्चात्तापाची कोणतीही प्रामाणिकता नव्हती. यामुळेच हे प्रकरण न्यायालयात पोहोचले. १० एप्रिल रोजी कर्नाटक उच्च न्यायालयात झालेल्या सुनावणीदरम्यान, रणवीरचे वकील, साजन पूवैया यांनी स्पष्ट केले की, अभिनेत्याला आपल्या कृतीचा तीव्र पश्चात्ताप आहे. वकिलांनी न्यायाधीश एम. नागप्रसन्ना यांना सांगितले की, आपल्या एका लहानशा कृतीने कोणाच्या भावना इतक्या खोलवर दुखावल्या जातील याची रणवीरला कल्पना नव्हती.

Gaurav More : “फिल्टरपाडा ते पवई…” आठवण की मुळांची जाणीव? घराच्या ‘त्या’ पाटीवरून अखेर व्यक्त झाला गौरव मोरे!

आता, रणवीर एक नवीन प्रतिज्ञापत्र दाखल करणार आहे, ज्यातील शब्द तक्रारदाराच्या संमतीने अधिक बळकट केले जातील. रणवीर सिंगने केवळ शब्दांनीच नव्हे, तर कृतीनेही माफी मागण्याचा प्रस्ताव ठेवला आहे. आपल्या नवीन माफीनाम्यात, त्याने म्हैसूरमधील ऐतिहासिक आणि जागृत चामुंडी देवी मंदिराला भेट देण्याची इच्छा व्यक्त केली आहे. तिथे वंदन करून आपल्या कृत्यांबद्दल जाहीरपणे पश्चात्ताप करण्याची त्याची इच्छा आहे. रणवीरची सकारात्मक वृत्ती लक्षात घेऊन, न्यायालयाने या प्रकरणाची पुढील सुनावणी २३ एप्रिलपर्यंत पुढे ढकलली आहे.

चित्रपटसृष्टीत अशी चर्चा आहे की, रणवीरच्या ‘धुरंधर’ या चित्रपटाच्या प्रचंड यशाच्या पार्श्वभूमीवर, हा वाद त्याच्यासाठी एक मौल्यवान धडा आहे. आजच्या काळात दाक्षिणात्य चित्रपटसृष्टी आणि तिच्या संस्कृतीबद्दल जागरूकता निर्माण करणे अत्यंत महत्त्वाचे आहे. रणवीरने मंदिरात जाऊन माफी मागण्याच्या घेतलेल्या निर्णयामुळे त्याची प्रतिमा सुधारेल.