(फोटो सौजन्य - इन्स्टाग्राम)
जिओ स्टुडिओ आणि मुंबई फिल्म कंपनी प्रस्तुत बहुप्रतिक्षित ‘राजा शिवाजी’ या चित्रपटाचा दमदार फर्स्ट लूक टीझर आता प्रेक्षकांच्या भेटीला येणार आहे. विशेष म्हणजे, हा टीझर केवळ चित्रपटगृहांमध्येच पाहायला मिळणार असून तो ‘धुरंधर-द रिव्हेंज’ या चित्रपटाच्या प्रदर्शनासोबत दाखवण्यात येणार आहे. त्यामुळे १८ मार्चपासून सुरू होणाऱ्या सशुल्क प्रिव्ह्यूदरम्यान प्रेक्षकांना या भव्य ऐतिहासिक चित्रपटाची पहिली झलक अनुभवता येणार आहे. तसेच हा चित्रपट प्रेक्षकांसाठी डबल धमाका ठरणार आहे.
छत्रपती शिवाजी महाराज यांच्या पराक्रमाची, स्वाभिमानाची आणि स्वराज्य स्थापनेच्या महान प्रवासाची सिनेमॅटिक झलक मोठ्या पडद्यावर पाहण्याची ही एक खास संधी ठरणार आहे. या चित्रपटात रितेश देशमुख प्रमुख भूमिकेत असून त्यांनीच या चित्रपटाचे दिग्दर्शनही केले आहे. एका महान योद्ध्याची गाथा आणि स्वराज्य स्थापनेसाठीचा संघर्ष या चित्रपटातून प्रभावीपणे उलगडला जाणार आहे.
या भव्य ऐतिहासिक कलाकृतीला संगीताची साथ अजय-अतुल यांनी दिली आहे, तर आंतरराष्ट्रीय ख्यातीचे छायाचित्रकार संतोष सिवन यांनी आपल्या अप्रतिम कॅमेऱ्याद्वारे या गाथेला भव्य आणि दृष्टीसुखद रूप दिलं आहे. चित्रपटाच्या माध्यमातून भारताचा समृद्ध इतिहास, संस्कृती आणि वारसा जागतिक पातळीवर पोहोचवण्याचा निर्मात्यांचा उद्देश आहे.
जिओ स्टुडिओज प्रस्तुत आणि मुंबई फिल्म कंपनीच्या बॅनरखाली ज्योती देशपांडे आणि जेनेलिया देशमुख यांनी या चित्रपटाची निर्मिती केली आहे. शौर्य, सन्मान आणि स्वराज्याच्या जन्माला भव्य आदरांजली अर्पण करणारा ‘राजा शिवाजी’ हा चित्रपट १ मे २०२६ रोजी जगभरातील चित्रपटगृहांमध्ये प्रदर्शित होणार आहे.
इतिहासाची थरारक गर्जना आणि भव्यतेचा नवा अध्याय घेऊन सज्ज झालेला हा चित्रपट प्रेक्षकांना एका विलक्षण सिनेमॅटिक प्रवासावर घेऊन जाणार आहे. आता या ऐतिहासिक गाथेची पहिली झलक मोठ्या पडद्यावर पाहण्यासाठी प्रेक्षकांची उत्सुकता शिगेला पोहोचली आहे. तसेच चाहते हा चित्रपट पाहण्यासाठी खूप उत्सुक आहेत.
.png "Videos"){kind=small}
