मंगळवार, 10 नोव्हेंबर 2026
(फोटो सौजन्य - इन्स्टाग्राम)
आता गुढीपाडव्याच्या शुभमुहूर्तावर चित्रपटाचं आणखी एक रहस्यमय पोस्टर रिलीज करण्यात आले आहे. या नव्या पोस्टरमध्ये गावातील काही लोकांचे फक्त डोळे दिसत आहेत, तर एका व्यक्तीच्या डोक्यावर काळ्या रंगाचा पोपट बसलेला दिसत आहे. या अनोख्या आणि गूढ दृश्यामुळे “हे डोळे नेमके कुणाचे?”, “हे कलाकार कोण आहेत?” आणि “या काळ्या पोपटामागचं रहस्य काय?” असे अनेक प्रश्न प्रेक्षकांच्या मनात निर्माण झाले आहेत.
या पोस्टरसोबत ऐकू येणाऱ्या “गावात सारी चर्चा रे, गप्पांना आलाय ऊत! भुतानं झाडाला धरलंय की झाडानं धरलं भूत” या ओळींनी चित्रपटाचा रहस्यमय आणि थरारक माहोल अधिकच गडद केला आहे. या ओळींमुळे चित्रपटातील गाव, त्यातील पात्रं आणि एकूण कथानकाबद्दलची उत्सुकता आणखी वाढली आहे. या वेगळ्या पोस्टरबद्दल बोलताना बावेश जनवलेकर यांनी सांगितलं की, “‘तुंबाडची मंजुळा’ हा आमच्यासाठी अत्यंत महत्त्वाकांक्षी प्रकल्प आहे. अनेक वर्षांनंतर पूर्णपणे झी स्टुडिओची निर्मिती असलेला हा चित्रपट प्रेक्षकांसमोर येत आहे. चित्रपटाची कथा आणि विषय अत्यंत रोचक असल्यामुळे त्याच्या प्रमोशनमधील प्रत्येक गोष्ट ही वेगळी आणि उत्सुकता वाढवणारी असावी, या उद्देशाने या पोस्टर्सची कल्पना राबवली आहे.”
ते पुढे म्हणाले की, “या पोस्टरमध्ये दिसणारं गाव आणि गावकरी हे सगळेच अतरंगी आहेत. आता टप्प्याटप्प्याने चित्रपटातील विविध गोष्टी उलगडत नेल्या जातील, ज्यामुळे प्रेक्षकांची उत्कंठा आणखी वाढेल.” या चित्रपटाची निर्मिती उमेशकुमार बन्सल आणि बवेश जानवलेकर यांनी केली आहे, तर दिग्दर्शनाची जबाबदारी वैभव कोरगावकर यांनी सांभाळली आहे. रहस्य, थरार आणि वेगळ्या कथानकामुळे ‘तुंबाडची मंजुळा’ हा चित्रपट प्रेक्षकांसाठी एक अनोखा सिनेमॅटिक अनुभव ठरणार आहे. प्रेक्षकांच्या उत्सुकतेला शिगेला पोहोचवणारा हा चित्रपट येत्या ५ जून रोजी सिनेमागृहात प्रदर्शित होणार आहे. आता या गूढ कथेमागचं रहस्य उलगडण्यासाठी चाहत्यांना थोडी अजून प्रतीक्षा करावी लागणार आहे.
