(फोटो सौजन्य- इन्स्टाग्राम)
प्रेक्षकांसाठी खास आनंदाची बातमी! जिओ स्टुडिओज आणि मुंबई फिल्म कंपनी प्रस्तुत ‘राजा शिवाजी’ चा दमदार फर्स्ट लूक टीझर आता चित्रपटगृहांमध्येच पाहता येणार आहे. हा टीझर लवकरच मोठ्या पडद्यावर ‘धुरंधर – द रिव्हेंज’ या चित्रपटाच्या प्रदर्शनासोबत सादर केला जाणार आहे. उत्साही प्रेक्षकांनी आपली सीट आधीच बुक करून ठेवण्याची सूचना दिली जात आहे, जेणेकरून ऐतिहासिक स्वराज्याच्या गाथेची पहिली झलक मोठ्या पडद्यावर अनुभवता येईल.
छत्रपती शिवाजी महाराजांच्या पराक्रमाची, स्वाभिमानाची आणि स्वराज्य स्थापनेच्या प्रवासाची सिनेमॅटिक झलक आता मोठ्या पडद्यावर पाहायला मिळणार आहे. रितेश विलासराव देशमुखच्या प्रमुख भूमिकेतून प्रेक्षकांना हा ऐतिहासिक प्रवास अनुभवायला मिळणार असून, दिग्दर्शनाखाली तयार झालेल्या चित्रपटात भारतातील महान योद्धा आणि त्याचा स्वराज्य स्थापनेचा संघर्ष सादर केला जात आहे. या अनुभवाची पहिली झलक प्रेक्षकांना फर्स्ट लूक टीझर माध्यमातून मिळणार आहे.
या भव्य ऐतिहासिक कलाकृतीसाठी संगीताची जादू अजय-अतुल यांनी तयार केली असून, आंतरराष्ट्रीय कीर्तीचे छायाचित्रकार संतोष सिवन यांनी अप्रतिम छायाचित्रणातून गाथेला भव्य दृश्यरूप दिले आहे. भाषिक आणि भौगोलिक सीमांचा भेद न करता भारताचा समृद्ध इतिहास आणि वारसा जगभरातील प्रेक्षकांपर्यंत पोहोचवण्याचे चित्रपट निर्मात्यांचे उद्दिष्ट आहे.
जिओ स्टुडिओज प्रस्तुत आणि मुंबई फिल्म कंपनीच्या बॅनरखाली ज्योती देशपांडे आणि जिनिलीया देशमुख निर्मित ‘राजा शिवाजी’ हा चित्रपट १ मे २०२६ रोजी जगभरातील चित्रपटगृहांमध्ये प्रदर्शित होणार आहे. शौर्य, सन्मान आणि स्वराज्याच्या जन्मास भव्य आदरांजली अर्पण करणारी ही ऐतिहासिक गाथा प्रेक्षकांना एका विलक्षण सिनेमॅटिक प्रवासावर घेऊन जाणार आहे.
या चित्रपटाला संगीत देण्याची जबाबदारी अजय-अतुल या लोकप्रिय जोडीवर सोपवण्यात आली आहे. त्यांच्या भव्य आणि प्रेरणादायी संगीतामुळे चित्रपटाला अधिक ऐतिहासिक आणि भावनिक उंची मिळण्याची अपेक्षा आहे. महत्त्वाचे म्हणजे ‘राजा शिवाजी’ हा चित्रपट केवळ मराठी भाषेत मर्यादित न राहता इतर भारतीय भाषांमध्येही प्रदर्शित होणार आहे. त्यामुळे मराठी चित्रपटसृष्टीतून एक भव्य पॅन इंडिया प्रकल्प साकारत असल्याचा अभिमान व्यक्त केला जात आहे.
तसेच, या चित्रपटात अभिषेक बच्चन, संजय दत्त, जिनिलिया देशमुख यांच्यासह इतर मोठे कलाकार झळकणार आहेत. आणि त्यांच्या खास भूमिका प्रेक्षकांना पाहायला मिळणार आहेत. ऐतिहासिक पार्श्वभूमी, भव्य निर्मितीमूल्ये आणि दमदार कलाकारांमुळे ‘राजा शिवाजी’ हा चित्रपट प्रेक्षकांसाठी एक अविस्मरणीय सिनेमॅटिक अनुभव ठरणार आहे.
.png "Videos"){kind=small}
