(फोटो सौजन्य - इन्स्टाग्राम)
गुढीपाडव्याच्या शुभमुहूर्तावर अंकिता वालावलकर आणि कुणाल भगत या जोडप्यानी त्यांच्या आयुष्यातील एक मोठं स्वप्न पूर्ण केलं आहे. मुंबईत स्वतःचं घर असावं, ही अनेकांची इच्छा असते आणि ती पूर्ण करण्यासाठी अनेक वर्षांची मेहनत घ्यावी लागते. अशाच संघर्षातून जात या दोघांनी अखेर त्यांच्या हक्काचं घर घेतलं असून ही आनंदाची बातमी त्यांनी सोशल मीडियावर चाहत्यांसोबत शेअर केली आहे.
‘कोकण हार्टेड गर्ल’ म्हणून ओळखली जाणारी अंकिता वालावलकरने इन्स्टाग्रामवर घराचे फोटो शेअर करत एक भावनिक कॅप्शन देखील लिहिले आहे, या कॅप्शने सर्वांचं लक्ष वेधलं आहे. तिने तिच्या प्रवासाबद्दल सांगताना लिहिलं की, “घर घेणं हे फक्त स्वप्न नव्हतं, ती माझी जिद्द होती.” मुंबईत सिव्हिल इंजिनियर म्हणून इतरांची घरं बांधताना तिच्या मनात कायम एकच प्रश्न असायचा—“माझं घर कधी?”
तिने पुढे लिहिले, ‘स्वप्नं नेहमी आपल्या क्षमतेपेक्षा मोठी पाहावीत, कारण क्षमता आपण वाढवू शकतो. पण छोटं स्वप्न कधीच मोठं होत नाही. पेडर रोडवरून जाताना ती अनेकदा अँटिलिया समोर उभी राहायची आणि “एक दिन मेरा भी घर होगा” अशी स्टोरी शेअर करायची. तिच्यासाठी ती केवळ स्टोरी नव्हती, तर एक प्रार्थना होती. विशेष म्हणजे, आज ज्या टॉवरमध्ये त्यांनी घर घेतलं आहे, त्याचं नावही ‘अँटिलिया’ असल्याचा योगायोग तिने शेअर केला आहे.
तिच्या प्रवासात अनेक अडचणी देखील आल्या आहेत. याबद्दल सांगताना अंकिता म्हणाली, “मुंबईत रोटी कमावणं सोपं आहे, पण स्वतःचं घर घेणं खूप कठीण आहे,” असं ऐकूनही ती कधीच मागे हटली नाही. लग्नानंतर हे स्वप्न तिचं आणि कुणालचं दोघांचं झालं. वर्षभर त्यांनी अनेक घरे पाहिली, पण मनाला पटेल असं घर सापडत नव्हतं. शेवटी एक दिवस अचानक त्यांना हे घर सापडलं आणि पहिल्याच क्षणी मनाने “हेच!” असं सांगितलं.
तसेच ती पूढे म्हणाली, ‘तरीही निर्णय सोपा नव्हता. आर्थिक गणित जुळत नव्हतं, भविष्याची भीती होती. पण त्या क्षणी त्यांनी धाडस केलं. “उडी मारली की पोहायला येतंच,” असं म्हणत त्यांनी रिस्क घेतली. त्या रात्री दोघांनाही झोप लागली नाही, पण त्यांच्या स्वप्नावरचा विश्वास अधिक मजबूत होता. शेवटी त्यांनी भीतीपेक्षा मोठं स्वप्न निवडलं.
आज त्यांच्या हातात घराच्या चाव्या आहेत आणि मनात समाधानाची भावना. “ही जागा छोटी असेल, पण आमची आहे. अभिमान पैशांचा नाही, तर त्या प्रवासाचा आहे,” असं म्हणत अंकिताने तिचा आनंद व्यक्त केला. तिने शेवटी चाहत्यांना एक प्रेरणादायी संदेश दिला—“लोक काय म्हणतात याकडे लक्ष देऊ नका. उशीर झाला तरी चालेल, पण जिद्द जिवंत ठेवा. कारण घर जिद्दीनेच बांधलं जातं.” एकेकाळी ‘अँटिलिया’ कडे पाहत स्वप्न पाहणारी अंकिता आज स्वतःच्या ‘अँटिलिया’मध्ये उभी आहे—आणि तिची ही कथा अनेकांसाठी प्रेरणादायी ठरत आहे. अंकिता वालावलकर आणि कुणाल भगत यांना चाहते शुभेच्छा देत आहेत.
.png "Videos"){kind=small}
