(फोटो सौजन्य - इन्स्टाग्राम)
मराठी मनोरंजन विश्वातील लोकप्रिय विनोदी शो महाराष्ट्राची हास्ययात्राने अनेक कलाकारांना घराघरात पोहोचवलं आहे. या शोमधून प्रकाशझोतात आलेल्या कलाकारांपैकी एक म्हणजे गौरव मोरे. आपल्या भन्नाट कॉमिक टायमिंगमुळे आणि वेगळ्या स्टाईलमुळे प्रेक्षकांच्या मनात घर करणारा गौरव आता आपल्या वैयक्तिक आयुष्यामुळे चर्चेत आला आहे. गौरव मोरे नुकतेच लग्न केलं असल्याचे समोर आले आहे. आणि त्याचे फोटो सोशल मीडियावर व्हायरल होत आहेत.
गौरव मोरेनं नुकतंच गुपचूप लग्न केल्याची बातमी समोर आली असून, त्याचे लग्नाचे फोटो सध्या सोशल मीडियावर जोरदार व्हायरल होत आहेत. गौरवने प्रियांका कारेकरसोबत आयुष्याची नवी सुरुवात केली आहे. या खास क्षणाचे फोटो अभिनेत्री ऋतुजा बागवे हिने आपल्या सोशल मीडियावर शेअर केले. फोटो शेअर करताना तिनं “मिस्टर अँड मिसेस मोरे… तुमच्या नवीन प्रवासासाठी आणि नवीन घरासाठी खूप शुभेच्छा” असा खास संदेशही दिला आहे.
गौरवच्या या लग्नाच्या बातमीने त्याच्या चाहत्यांना सुखद धक्का बसला आहे. विशेष म्हणजे, गौरवने फक्त लग्नच नाही तर नवीन घरही घेतलं आहे. त्यामुळे त्याने चाहत्यांना एकाच वेळी दोन आनंदाच्या बातम्या दिल्या आहेत. सोशल मीडियावर शेअर केलेल्या फोटो आणि स्टोरीजमधून त्याच्या नव्या घराची झलकही पाहायला मिळत आहे.
त्याच्या घराबाहेर लावलेली खास नेमप्लेट सध्या चर्चेचा विषय ठरली आहे. ‘फिल्टरपाड्याचा बच्चन’ अशी हटके नेमप्लेट पाहून चाहते त्याच कौतुक करत आहेत. गौरवच्या या अनोख्या स्टाईलने पुन्हा एकदा त्याची वेगळी ओळख अधोरेखित केली आहे. दरम्यान, गौरवची पत्नी प्रियांकाने याआधीही त्याच्या वाढदिवसानिमित्त खास पोस्ट शेअर करत त्याला “स्पेशल पर्सन” म्हटलं होतं. त्यामुळे दोघं काही काळापासून रिलेशनशिपमध्ये असल्याची चर्चा आधीपासूनच होती. आता या जोडप्याने लग्नबंधनात अडकत आयुष्याच्या नव्या प्रवासाला सुरुवात केली आहे.
गौरव मोरेच्या करिअरबद्दल बोलायचं झाल्यास, त्याने विविध कॉमेडी शोमध्ये आपल्या अभिनयाची छाप सोडली आहे. चला, हवा येऊ दया. आणि ‘मॅडनेस मचायेंगे’सारख्या कार्यक्रमांमधून त्याने प्रेक्षकांचं भरभरून मनोरंजन केलं आहे. एकंदरीत, आपल्या भन्नाट विनोदाने प्रेक्षकांना हसवणारा गौरव मोरे आता आयुष्याच्या नव्या टप्प्यात प्रवेश करत आहे. त्याच्या या नव्या प्रवासासाठी चाहत्यांकडून शुभेच्छांचा वर्षाव होत असून, त्याचं वैवाहिक आयुष्यही तितकंच आनंदी आणि यशस्वी ठरो, अशी सर्वांचीच इच्छा आहे.
.png "Videos"){kind=small}
