(फोटो सौजन्य - इन्स्टाग्राम)
मराठी इंडी संगीत क्षेत्राच्या वाढत्या प्रभावाचा उत्सव ठरलेला ‘मराठी इंडी म्युझिक अवॉर्ड्स (मिमा) २०२६’ हा भव्य सोहळा नुकताच उत्साहात आणि दिमाखात पार पडला. महाराष्ट्र आर्ट्स अँड कल्चर फाऊंडेशनच्या वतीने आयोजित या कार्यक्रमाला संगीत क्षेत्रातील अनेक दिग्गजांची उपस्थिती लाभली. स्वातंत्र्यवीर सावरकर सभागृहाचे अध्यक्ष रणजीत सावरकर, तसेच प्रियांका बर्वे, सावनी रवींद्र, कार्तिकी गायकवाड यांच्यासह अनेक मान्यवरांनी या सोहळ्याला हजेरी लावली आहे.
जॅकी श्रॉफ यांची माथेरानला खास भेट; श्री पिसारनाथ मंदिर येथे दर्शन, बटाटा वड्याचा देखील घेतला आस्वाद
गेल्या काही वर्षांत मराठी इंडी संगीताने स्वतःची स्वतंत्र ओळख निर्माण केली आहे. चित्रपटांच्या चौकटीबाहेर पडून स्वतःच्या बळावर संगीतनिर्मिती करणाऱ्या कलाकारांना ‘मिमा’सारख्या व्यासपीठामुळे योग्य संधी आणि ओळख मिळत असल्याचे या सोहळ्यात अधोरेखित झाले. गायक, संगीतकार, गीतकार, वादक आणि तांत्रिक क्षेत्रातील कलाकारांचा गौरव करत इंडी संगीताच्या सर्वांगीण प्रवासाचा सन्मान करण्यात आला.
या सोहळ्यात ज्येष्ठ गायक अजित कडकडे यांना ‘संगीत रत्न जीवन गौरव पुरस्कार’ देऊन सन्मानित करण्यात आले. तसेच गीतकार गुरु ठाकूर आणि गायिका बेला शेंडे यांना ‘मराठी इंडी म्युझिक आयकॉन’ पुरस्कार प्रदान करण्यात आला. बासरीवादक अमर ओक यांना ‘एक्सलेन्स इन म्युझिक अवॉर्ड’, तर प्रमोद चांदोरकर यांना ‘टेक्निकल एक्सलेन्स इन म्युझिक अवॉर्ड’ देण्यात आला.
याशिवाय, अवधूत गुप्ते यांच्या ‘आई’ या अल्बमला ‘आयकॉनिक म्युझिक अल्बम’ म्हणून गौरविण्यात आले, तर ‘सोबतीचा करार’ या कार्यक्रमाला ‘आयकॉनिक म्युझिक शो’चा मान मिळाला. विशेष कामगिरीसाठी आकाश देशमुख यांना ‘विशेष दिव्यांग कलाकार पुरस्कार’ आणि परदेशात मराठी संस्कृतीचा प्रचार करणाऱ्या व्ही. रमेश यांना ‘प्रवासी मराठी कलाकार पुरस्कार’ प्रदान करण्यात आला.
भारत माता चित्रपटगृहात ‘सुपर डुपर’चा भव्य प्रीमियर; 6 वर्षांनंतर थिएटरचा दिमाखदार पुनरागमन सोहळा
या सोहळ्याबाबत आयोजक अजय नाईक यांनी सांगितले की, ‘मिमा’ हा केवळ पुरस्कार सोहळा नसून मराठी इंडी संगीताच्या वाढत्या सामर्थ्याचा उत्सव आहे. कलाकारांना योग्य व्यासपीठ, ओळख आणि उद्योगाशी जोडण्याचा उद्देश या उपक्रमामागे असून, भविष्यात मराठी इंडी संगीताला जागतिक स्तरावर पोहोचवण्याचा प्रयत्न सुरूच राहणार आहे. एकंदरीत, ‘मिमा २०२६’ने मराठी इंडी संगीताला नवी ऊर्जा, आत्मविश्वास आणि व्यापक व्यासपीठ मिळवून दिले असून, या क्षेत्राच्या उज्ज्वल भविष्यासाठी हा सोहळा महत्त्वाचा टप्पा ठरला आहे.
