“तू चालत राहा पुढं!” Rinku Rajguru च्या ‘आशा’ चित्रपटाचा टिझर प्रदर्शित, वेगळ्या भूमिकेत आर्चीला पाहण्यासाठी प्रेक्षक उत्सुक

रिंकू राजगुरु पुन्हा एकदा नवीन चित्रपटाच्या माध्यमातून प्रेक्षकांच्या भेटीस येणार आहे. नुकतेच तिच्या आगामी 'आशा' चित्रपटाचा टिझर प्रदर्शित झाला आहे.

• रिंकू राजगुरूचा नवीन चित्रपट
• ‘आशा’ चित्रपटाचा टिझर प्रदर्शित
• दीपक पाटील यांचे दिग्दर्शन

मराठी चित्रपटसृष्टीमध्ये नेहमीच वेगवेगळ्या विषयांवरील चित्रपट प्रदर्शित होत असतात. काही चित्रपट आपल्या प्रेरणा देतात. नुकतेच अशाच एका चित्रपटाचे टिझर रिलीज झाले आहे. हा चित्रपट म्हणजे ‘आशा’. या चित्रपटात आपल्याला रिंकू राजगुरू एका वेगळ्या भूमिकेत दिसणार आहे.

‘‘बाई अडलीये… म्हणूनच ती नडलीये’’ या प्रभावी टॅगलाईनसह ‘आशा’ चित्रपटाचा टीझर नुकताच प्रदर्शित झाला असून, हा चित्रपट १९ डिसेंबर रोजी प्रेक्षकांच्या भेटीला येणार आहे.

प्रदर्शनापूर्वीच ‘आशा’ने आपली ताकद दाखवून दिली आहे. ६१ व्या महाराष्ट्र राज्य मराठी चित्रपट पुरस्कार सोहळ्यात तब्बल चार पुरस्कार पटकावत या चित्रपटाने समीक्षकांची दाद मिळवली असून, यामुळे प्रेक्षकांची उत्सुकता अधिकच वाढली आहे.

‘निर्धार’ चित्रपटाचा ट्रेलर पाहून चाहत्यांची वाढली उत्सुकता, जाणून घ्या चित्रपट कधी होणार रिलीज?

चित्रपटात महिलांची जिद्द, त्यांचा संघर्ष, आत्मविश्वास आणि समाजावरील जबाबदाऱ्या हृदयाला भिडतील अशा पद्धतीने मांडल्या आहेत. कथानकाच्या केंद्रस्थानी असलेली ‘आशा सेविका’ ही भूमिका रिंकू राजगुरूने साकारली आहे. तिच्यासोबत सायंकित कामत, उषा नाईक, शुभांगी भुजबळ, सुहास शिरसाट, दिशा दानडे, दिलीप घारे आणि हर्षा गुप्ते हे कलाकारही महत्त्वपूर्ण भूमिकेत दिसणार आहेत.

रिंकूची ‘आशा’ ही केवळ आरोग्य कर्मचारी नसून प्रत्येक स्त्रीचा आधार, मार्गदर्शक आणि निर्भय आवाज आहे. तिच्या नजरेतून जाणवणारा संघर्ष आणि परिस्थितीशी दोन हात करताना दिसणारी तिची ठाम भूमिका हा चित्रपटाचा मुख्य आधार स्तंभ ठरणार आहे.

Weekend जाणार भारी! The Family Man 3 सह 7 जबरदस्त सिरीज-चित्रपट OTT वर घालणार धुमाकूळ; पाहा संपूर्ण यादी

दिग्दर्शक दीपक पाटील म्हणतात, “ ‘आशा’ हा फक्त आशा सेविकांचा चित्रपट नाही, तर घर सांभाळत घराबाहेर पडून स्वतःची स्वप्नं पूर्ण करणाऱ्या प्रत्येक स्त्रीची गोष्ट आहे. नवनवीन विषयांना नेहमीच उघड्या मनाने स्वीकारणाऱ्या मराठी प्रेक्षकांना ही अनोखी आणि संवेदनशील कथा निश्चित आवडेल.’’

‘आशा’चे निर्माते कुमार मंगत पाठक, अभिषेक पाठक, निलेश कुवर, दैवता पाटील आणि दीपक पाटील असून मुरलीधर चटवानी व रवींद्र अवटी सहनिर्माते आहेत. पॅनोरमा स्टुडिओजच्या माध्यमातून प्रदर्शित होणारा हा चित्रपट आगळ्यावेगळ्या कथानकाद्वारे प्रेक्षकांना एका नवे जग दाखवणार आहे.