चित्रपटातून प्रेक्षकांचे मनोरंजन तर होतेच, पण चित्रपट विचार, नव्या कल्पना, जगण्याची उमेद आणि प्रेरणादेखील देतो. मात्र नुकत्याच प्रदर्शित झालेल्या ‘सरला एक कोटी’ (Sarla Ek Koti) या चित्रपटाच्या बाबतीत एक अनोखी घटना घडली आहे. हा चित्रपट पाहून भारावलेल्या एका प्रेक्षकाने चित्रपटातील नायिकेच्या नावावरून प्रेरित होऊन आपल्या नवजात मुलीचे नावही सरला ठेवले आहे.
या चित्रपटात ईशा केसकर (Isha Keskar), ओंकार भोजने (Omkar Bhojane), छाया कदम अशी दमदार स्टारकास्ट आहे. चित्रपटगृहात हा चित्रपट प्रेक्षकांच्या पसंतीला उतरला आहे, तसेच समीक्षकांनीही चित्रपटाचे कौतुक केले आहे. मात्र चित्रपटाचे कौतुक करणारी अनोखी गोष्ट नुकतीच समोर आली.
[read_also content=”कहरच! प्रेमीयुगुलांवर चढली होती व्हॅलेंटाईनची नशा, चालत्या बाईकवर केला रोमान्स, व्हिडिओ झाला VIRAL https://www.navarashtra.com/viral/rajasthan-ajmer-valentines-fever-on-lovers-romance-on-moving-bike-video-went-viral-social-media-nrvb-368259.html”]
बीड जिल्ह्यातील अशोक तपसे यांना नुकतेच कन्यारत्न प्राप्त झाले. ‘सरला एक कोटी’ चित्रपट पाहून ते भारावून गेले. चित्रपटातील नायिकेच्या नावावरून त्यांनी आपल्या लेकीचे नाव चक्क सरला ठेवले. चित्रपटाच्या टीमसाठी ही अभिमानाची गोष्ट आहे. ‘सरला एक कोटी’ या चित्रपटाने आणखी एक सरला जन्माला घातली. अतिशय आनंददायी अशी ही घटना असल्याचे दिग्दर्शक नितीन सिंधु विजय सुपेकर यांनी सांगितले.
