‘लग्नानंतर होईलच प्रेम’ मध्ये जीवा-नंदिनीचा रेट्रो लूक, पार्थ-काव्याचा काऊबॉय अंदाज; प्री-वेडिंग शूटने वाढवली उत्सुकता

लग्नानंतर होईलच प्रेम ही स्टार प्रवाहवरील लोकप्रिय मालिका सध्या प्रेक्षकांना भावनिक आणि रोमँटिक वळणावर घेऊन आली आहे. कथानकात आता मोठा सोहळा रंगणार असून जीवा–नंदिनी आणि पार्थ–काव्या यांच्या लग्नाची तयारी उत्साहात सुरू झाली आहे.

प्रेमातून फुललेलं नातं आता लग्नबंधनात अडकणार असल्याने मालिकेतील प्रत्येक क्षण अधिकच खास ठरत आहे. या आनंदमयी वातावरणात मालिकेतील दोन्ही लाडक्या जोड्यांनी एक खास आणि हटके प्री-वेडिंग शूट केलं आहे.

या शूटमध्ये त्यांचा आजवर कधीही न पाहिलेला अंदाज समोर आला आहे. प्रेक्षकांसाठी हे एक वेगळेच सरप्राइज ठरले आहे. जीवा–नंदिनी यांनी ‘जुनं ते सोनं’ या थीमला साजेसा ८०च्या दशकातील रेट्रो लूक साकारला आहे.

त्या काळातील पोशाख, रोमँटिक पोझेस आणि भावनांनी ओतप्रोत भरलेले क्षण यामुळे त्यांचं प्री-वेडिंग शूट एखाद्या जुन्या गाण्यातील दृश्याची आठवण करून देतं. त्यांच्या अप्रतिम केमिस्ट्रीमुळे हा लूक सोशल मीडियावर चर्चेचा विषय ठरला आहे.

दुसरीकडे, काव्या–पार्थ या जोडीनं पूर्णपणे वेगळा अंदाज निवडला आहे. काऊबॉय स्टाइल, हटके अ‍ॅटिट्यूड आणि मॉडर्न टचमुळे त्यांचा लूक तरुण प्रेक्षकांना विशेष भावला आहे. त्यांच्या स्टायलिश उपस्थितीनं शूटला एक वेगळंच आकर्षण प्राप्त झालं आहे.