तुषार गांधी पोलिसांच्या ताब्यात, सुटकेसाठी आदित्य ठाकरे, संजय राऊत पोलीस ठाण्यात; ज्ञानेश कुमारांविरोधात मुंबईत जोरदार आंदोलन

तुषार गांधी यांना मुंबई पोलिसांनी डी. एन. नगर पोलीस ठाण्यात ताब्यात ठेवल्याची माहिती समोर आली आहे. त्यांच्या सुटकेसाठी आदित्य ठाकरे, संजय राऊत आणि अनिल परब पोलीस ठाण्यात दाखल झाले.

• तुषार गांधींना ताब्यात घेतल्याने ठाकरे गट आक्रमक
• ‘सुटका होईपर्यंत पोलीस ठाण्यातून जाणार नाही’; आदित्य ठाकरेंची भूमिका
• डी. एन. नगर पोलीस ठाण्याबाहेर शिवसैनिकांची गर्दी

 

निवडणूक आयुक्त ज्ञानेश कुमारांच्या राजीनाम्याच्या मागणीसाठी देशभरात आंदोलनाला सुरुवात झाली आहे. दिल्लीत जंतर मंतर वर कॉकरोच जनता पार्टीचे आंदोलन सुरु होण्या आधीच अभिजित दिपके आणि त्यांच्या साथीदारांना दिल्ली पोलिसांनी ताब्यात घेतले. तसेच विरोधी पक्षाच्या नेत्यांनाही ताब्यात घेण्यात आले. अश्यातच आज सकाळीच मुंबई पोलिसांनी सामाजिक कार्यकर्ते तुषार गांधी यांना ताब्यात घेतले. यावरून आता शिवसेना ठाकरे गट चांगलाच आक्रमक झाल्याचे पाहायला मिळत आहे.

महात्मा गांधी यांचे पणतू तुषार गांधी यांना अंधेरी पश्चिम येथील डी. एन. नगर पोलीस ठाण्यात ठेवण्यात आलं आहे. या घटनेनंतर शिवसेना (ठाकरे गट) आक्रमक झाली असून, युवासेना प्रमुख आदित्य ठाकरे यांनी पोलीस ठाण्यात धाव घेतली आहे.

‘सुटका होईपर्यंत पोलीस ठाण्यातून जाणार नाही’

तुषार गांधी यांना ताब्यात घेतल्याच्या घटनेनंतर आदित्य ठाकरे यांनी पोलिसांसोबत चर्चा केली. जोपर्यंत तुषार गांधी यांना सोडलं जात नाही, तोपर्यंत आपण पोलीस ठाण्यातून बाहेर जाणार नाही, अशी भूमिका त्यांनी मांडल्याची माहिती आहे. यावेळी मुंबईतील शिवसैनिकही मोठ्या संख्येने पोलीस ठाण्याबाहेर जमतील, असं आदित्य ठाकरे यांनी पोलिसांना सांगितल्याचं वृत्त आहे. त्यामुळे डी. एन. नगर पोलीस ठाण्याबाहेर राजकीय घडामोडींना वेग आला आहे.

Raj Thackeray : ‘पराकोटीची हुकूमशाही!’ अभिजित दिपकेंच्या अटकेवर राज ठाकरे भडकले, मोदी – शहांविरोधातील संतप्त पोस्ट चर्चेत

संजय राऊत, अनिल परबही पोलीस ठाण्यात

तुषार गांधी यांच्या सुटकेसाठी ठाकरे गटाचे खासदार संजय राऊत, आमदार अनिल परब आणि इतर पदाधिकारीही पोलीस ठाण्यात दाखल झाले आहेत. तुषार गांधी यांना मागील सात ते आठ तासांपासून ताब्यात ठेवल्याचा दावा करण्यात आला आहे.

दरम्यान, मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी मुंबईतील ऑगस्ट क्रांती मैदानावर आंदोलनाची हाक देण्यात आली होती. या आंदोलनापूर्वी मुंबईच्या विविध भागांत कार्यकर्त्यांना ताब्यात घेण्यात आल्याची माहिती समोर आली आहे.

अभिनेता इम्रान खानलाही ताब्यात घेतलं

मुंबईतील ऑगस्ट क्रांती मैदान येथे ज्ञानेश कुमार यांच्या राजीनाम्याच्या मागणीसाठी आंदोलन करण्यात आले. यावेळी पोलिसांनी आंदोलकांना ताब्यात घेतले. अभिनेता इम्रान खान यालाही पोलिसांनी ताब्यात घेतल्याचं वृत्त आहे. दुसरीकडे, आंदोलनांवरील निर्बंधांवरून बॉम्बे लॉयर्स असोसिएशनने सरकारवर टीका करत याला ‘अघोषित आणीबाणी’ असं संबोधलं आहे.

दिल्लीतील SIR विरोधी आंदोलन आणि मुंबईतील पोलिसांची कारवाई यामुळे हा मुद्दा आता चर्चेत आला आहे. तुषार गांधी यांच्या सुटकेसाठी ठाकरे गटाने घेतलेल्या भूमिकेनंतर पोलीस प्रशासन पुढे काय निर्णय घेतं, याकडे लक्ष लागलं आहे.

Mamta Banerjee : ‘आम्हाला किडनॅप केलं’ ममता बॅनर्जींचा दिल्ली पोलिसांवर गंभीर आरोप, पोलीस ठाण्यातच केलं आंदोलन सुरु