EVM Scam : “यावेळी केवळ जरांगेमुळे माझे मताधिक्य कमी झालं…; छगन भुजबळ यांनी स्पष्टच सांगितलं

विधानसभा निवडणुकीच्या निकालावरुन अद्याप राज्यामध्ये राजकारण रंगले आहे. राज्यात ईव्हीएममध्ये घोटाळा झाल्याचा आरोप झाला आहे. यावरुन आता छगन भुजबळ यांनी प्रतिक्रिया दिली आहे.

नाशिक : राज्यामध्ये विधानसभा निवडणुका होऊन दोन महिने उलटले आहेत. निवडणुकीमध्ये महायुतीला एकतर्फी यश मिळाले असूम महाविकास आघाडीचा दारुण पराभव झाला. यामुळे कॉंग्रेससह ठाकरे गटाने ईव्हीएम मशीनमध्ये घोटाळा झाला असल्याचा आरोप केला आहे. हाच आरोप मनसे नेते राज ठाकरे यांनी देखील केला. ईव्हीएम मशीनमुळे महायुतीचे सरकार पुन्हा एकदा आले असल्याचा दावा विरोधकांकडून केला जात आहे. या संदर्भात अजित पवार गटाचे नेते व आमदार छगन भुजबळ यांनी मत व्यक्त केले आहे.

आमदार छगन भुजबळ यांनी नाशिकमध्ये माध्यमांशी संवाद साधला. यावेळी त्यांनी अनेक राजकीय विषयांवर भाष्य केले आहे. राज्यासह देशामध्ये निवडणुकांमध्ये ईव्हीएमचा वापर करावा की नाही याबाबत माध्यमांनी छगन भुजबळ यांना प्रश्न केला. यावर उत्तर देताना भुजबळ म्हणाले की, “मॉक पोल काय आहे ते मला माहिती नाही. काय करायचं ते करा. मी ते वाचलं आहे. मला जर ईव्हीएमचा फायदा मिळाला असता तर मी दीड-दोन लाख मतांनी निवडून आलो असतो. 60 हजार मतांनी मी नेहमीच निवडून आलो, असे स्पष्ट मत छगन भुजबळ यांनी व्यक्त केले आहे.

राजकीय बातम्या वाचण्यासाठी क्लिक करा

पुढे त्यांनी पुन्हा एकदा मराठा नेते मनोज जरांगे पाटील यांचा उल्लेख केला आहे. मनोज जरांगे पाटील आणि छगन भुजबळ यांच्यामध्ये ओबीसी आरक्षणावर जोरदार वाकयुद्ध झाले. याचा परिणाम निवडणुकीवर झाला असल्याचे स्पष्ट मत भुजबळ यांनी व्यक्त केले आहे. छगन भुजबळ म्हणाले की, या वेळेला केवळ जरांगेमुळे माझे मताधिक्य कमी झाले. ईव्हीएममध्ये गडबड असती, तर जरांगे येऊ आणि आणखी कोणी येऊ ईव्हीएमने उलटा सुलटा करून मला दीड ते दोन लाख मताधिक्यावर पोहोचवले असतं, अशी भूमिका अजित पवार गटाचे नेते छगन भुजबळ यांनी घेतली आहे.

पुढे भुजबळ म्हणाले की, “मात्र असे न होता, माझे मताधिक्य कमी झाले. त्यामुळे मी कसे म्हणू की ईव्हीएममध्ये गडबड आहे. त्यामुळे ईव्हीएमचा फायदा झाला असता, तर माझी मते देखील वाढायला हवी होती. ईव्हीएमची गडबड असती, तर मला फायदा का मिळाला नाही हा माझा मुद्दा आहे, अशी भूमिका आमदार छगन भुजबळ यांनी घेतली आहे.

महाराष्ट्रसंबंधित बातम्या वाचण्यासाठी क्लिक करा

महाविकास आघाडीच्या सरकारमध्ये ज्यूनियर म्हणून एकनाथ शिंदे यांच्या मुख्यमंत्रीपदाला विरोध झाला असा दावा काल संजय राऊत यांनी केला होता. त्यावर भुजबळ म्हणाले की, “काका-पुतण्यांनी काय केलं? हे माहिती नाही. परंतु मी असं ऐकलं आहे. आमदारांना सांभाळण्यासाठी ज्येष्ठ आणि प्रमुख माणूस त्या ठिकाणी असणे आवश्यक आहे. हे खरंच आहे, मंत्रिमंडळात अनेक सिनिअर लोकं होते. त्यावेळेस एकनाथराव हे ज्युनिअर होते. मी 91 पासून मंत्री आहे. अजित पवार हे देखील 93 पासून मंत्री आहेत. मग, अशा वेळी त्यांनी हे म्हटलं हे सगळं सांभाळायचं असेल सिनिअर मनुष्य कोणीतरी पाहिजे. हे म्हणाले असल्याची शक्यता नाकारता येत नाही” असं छगन भुजबळ म्हणाले. आमदारांची सुरक्षा कमी करण्याच्या मुद्यावर छगन भुजबळ म्हणाले की, “मला काही कल्पना नाही. मी मंत्रिमंडळात देखील नाही. उपमुख्यमंत्री शिंदे साहेब चौकशी करून लक्ष देतील”