
Chhagan Bhujbal's reaction An offer of 150 crore for delimitation
मंत्री छगन भुजबळ यांनी नाशिकमध्ये माध्यमांशी संवाद साधला. यावेळी त्यांनी विविध राजकीय विषयांवर स्पष्ट मत मांडले आहे. तसेच संजय राऊतांच्या १५० कोटींच्या दाव्यावर प्रतिक्रिया दिली. ते म्हणाले, “खासदारांबाबत असे दावे करून काहीही उपयोग नाही. आरोप करायचे असतील, तर त्यासाठी ठोस पुरावे समोर ठेवले पाहिजेत. कोणी म्हणतंय की शंभर कोटी, कोणी म्हणतो दीडशे, कोणी हजार कोटी म्हणतोय, याला काय अर्थ आहे. हे जे असे दावे आहे याला पुरावा नाही. पुराव्याशिवाय केलेल्या दाव्यांवर चर्चा करण्यात अर्थ नाही.”
अशी वक्तव्ये करणे चुकीचे – छगन भुजबळ
रिपब्लिकन सेनेचे अध्यक्ष आनंदराज आंबेडकर यांनी दुष्काळावर भाष्य करताना दिवंगत नेते अजित पवार यांचा अपमान होईल, अशा पद्धतीचे वक्तव्य केले होते. यावर छगन भुजबळ म्हणाले, ” आनंदराज आंबेडकर हे सुशिक्षित आहेत. दुर्दैवी अपघातात मृत्यू झालेल्यांबद्दल असे बोलणे योग्य नाही. जे लोक आज आपल्यात नाहीत, त्यांच्याबद्दल अशी वक्तव्ये करणे चुकीचे आहे. आनंदराज आंबेडकर यांचs जे विधान आहे ते आमच्या सारख्याला तरी आवडलेलं नाही.”
पंतप्रधान नरेंद्र मोदी यांनी सोन्याबद्दल वक्तव्य केले होते. सोने खरेदी करू नका, असे आवाहन केले, त्यानंतर सोन्याचा भाव घसरला असे ते म्हणाले. त्यावर भुजबळ यांनी मोदींना पाठिंबा देत, मत मांडले. भुजबळ म्हणाले, “बरोबर आहे ना. त्यांनी त्यावेळी सांगितले होते खरेदी करू नका. आज जवळजवळ वीस, पंचवीस हजार रुपयांनी भाव कमी झाले. जी वस्तुस्थिती त्यांनी आपल्यासमोर मांडली यांची बरोबर आहे,” अशी प्रतिक्रिया भुजबळांनी दिली.
पंढरपूर येथे एकनाथ शिंदे यांना भाजपच्या काही आमदारांनी भेट न दिल्याच्या चर्चेबाबत बोलताना भुजबळ म्हणाले, “काही आमदार वेगवेगळ्या कामांसाठी गेले असतील, तर काहींचे कार्यक्रम आधीच निश्चित झालेले असतील. त्यामुळे या भेटीवरून वेगळा अर्थ काढण्याची गरज नाही. देवेंद्र फडणवीस, एकनाथ शिंदे आणि सुनेत्रा पवार हे महायुतीचे नेते खंबीर आहेत. महायुती सरकार मजबूत ठेवण्यावर सर्वांचाच भर आहे. त्यामुळे अशा छोट्या-छोट्या गोष्टींमुळे महायुतीत मतभेद निर्माण होतील, असे मला वाटत नाही,” असे त्यांनी स्पष्ट केले.