Anjali Damania : सरकारी जमीन खाऊनही FIR मध्ये नाव नाही; पार्थ पवारांवर अंजली दमानियांचा चढला पारा

सामाजिक कार्यकर्त्या अंजली दमानिया यांनी माध्यमांशी संवाद साधला. यावेळी त्यांनी पुणे जमीन घोटाळा प्रकरणी अजित पवारांचे पुत्र पार्थ पवारांवर कारवाई करण्याची मागणी केली.

• शीतल तेजवानीला अटक झाल्याने पुणे जमीन प्रकरण चर्चेत
• अंजली दमानिया पत्रकार परिषद घेऊन टीका
• पार्थ पवारांवर कारवाई करण्याची मागणी

Anjali Damania : पुणे : मुंढवा आणि कोरेगाव पार्क येथील जमीन घोटाळा प्रकरण पुन्हा एकदा चर्चेत आले आहे. या प्रकरणातील आरोपी शीतल तेजवानी हिला पोलिसांनी बेड्या घातल्या आहेत. शीतल तेजवानीला पुण्यातील महार वतनाच्या जमीन हडप करण्याच्या प्रकरणात पुणे पोलिसांनी अटक केली. यानंतर पुन्हा एकदा उपमुख्यमंत्री अजित पवार यांचे पुत्र पार्थ पवार (Parth Pawar) हे चर्चेत आले आहेत. पार्थ पवार यांचे नाव देखील एफआयआरमध्ये नसल्यामुळे वाद निर्माण झाला आहे. सामाजिक कार्यकर्त्या अंजली दमानिया (Anjali Damania) यांनी पार्थ पवारांविरोधात आक्रमक भूमिका घेतली आहे.

अंजली दमानिया यांनी माध्यमांशी संवाद साधला. यावेळी त्यांनी राज्यातील या जमीन प्रकरणावरुन पार्थ पवार यांना वाचवण्यासाठी जोरदार प्रयत्न सुरु असल्याचे सांगितले. अंजली दमानिया म्हणाल्या की, शीतल तेजवानीला यापूर्वी रॉयल ट्रीटमेंट मिळाली होती. मात्र, त्यांना जी ट्रीटमेंट मिळाली ती बघून बरं वाटलं. पुण्यातील जमीन प्रकरणातील कारवाई संपूर्ण फार्स असून त्याची सुरुवात पाच नोव्हेंबरपासून झाली. इतका संघर्ष करूनही या प्रकरणांमध्ये काहीच होत नाही. अजित पवारांच्या मुलाला कायदा लागू होत नाही, राजकारणी असाल तर तुम्हाला काहीच होत नसल्याचे त्या म्हणाल्या. अधिवेशनामध्ये गदारोळ होऊ शकतो म्हणूनच काहीतरी दाखवायचं म्हणून शीतल तेजवानीला अटक करण्यात आली, असा आरोप अंजली दमानिया यांनी केला.

हे देखील वाचा : निष्काळजीपणाचा कळस! कळवा रुग्णालयात ऑक्सिजन वाहिनी बसवण्यास टाळाटाळ

पुढे त्यांनी दिग्विजय पाटील याच्या चौकशीवरुन पोलिसांवर जोरदार हल्ला केला. अंजली दमानिया म्हणाल्या की, या प्रकरणातील आरोपी दिग्विजय पाटील यांची चौकशी होऊन तो बहरीनला गेला आहे. दिग्विजय पाटील अजित पवार यांच्या चिरंजीवांच्या लग्नासाठी जाणार आहे. इतके गुन्हे दाखल असताना ते त्याला बहरिनला कसे पाठवण्यात आलं? ही व्यक्ती परत आली नाहीतर चौकशी कशी होणार? असा सवाल उपस्थित करत दमानिया यांनी संताप व्यक्त केला.

हे देखील वाचा : अनर्थ! चिमुरड्यांनी प्यायले गुडनाईट लिक्विड अन्…; दापोलीत नेमके घडले तरी काय?

अंजली दमानिया यांनी अजित पवार आणि पार्थ पवार यांच्यावर टीकास्त्र डागले. त्या म्हणाल्या की, त्या म्हणाल्या, अजित पवारांच्या मुलाला कायदा लागू होत नाही, राजकारणी असाल तर तुम्हाला काहीच होत नाही. दिग्विजय पाटलांची चौकशी दोन तारखेला झाली होती आणि आता तो बहरिनला गेल्याची माहिती मिळत आहे. हा जर माणूस परत नाही आला तर इतक्या मोठ्या गोष्टी चौकशी थांबणार असल्याचे अंजली दमानिया म्हणाल्या आहेत. यामुळे आता पार्थ पवार यांच्या मागे पुन्हा एकदा चौकशीचा ससेमीरा लागण्याची शक्यता आहे.