Baramati by election : सुनेत्रा पवारांसमोर आकाश मोरेंचे तगडे आव्हान? काँग्रेसने का दिली मोरेंना संधी?

Baramati Congress Candidate : अजित पवारांच्या निधनानंतर बारामतीमध्ये पोटनिवडणूक होत आहे. यासाठी काँग्रेसने आकाश मोरे यांना उमेदवारी दिली आहे. सुनेत्रा पवारांना आव्हान देणारे कोण आहेत आकाश मोरे?

• बारामतीमध्ये विधानसभा पोटनिवडणुकीसाठी अर्जदाखल प्रक्रिया
• बारामतीमध्ये काँग्रेसकडून आकाश विजय मोरे यांची उमेदवारी
• कोण आहे आकाश मोरे?

Baramati by election : बारामती : दिवंगत नेते अजित पवार यांचे जानेवारी महिन्यामध्ये अपघाती निधन झाले. या घटनेनंतर बारामती विधानसभा मतदारसंघाची पोटनिवडणूक जाहीर झाली. अजित पवारांच्या निधनामुळे ही निवडणूक बिनविरोध होण्याची शक्यता होती. तसेच घरातील व्यक्ती गेल्यामुळे शरद पवार यांच्या पक्षाने उमेदवार न देण्याचा निर्णय घेतला. मात्र महाविकास आघाडीमध्ये त्यांचा हा निर्णय मान्य झाला नाही. काँग्रेस पक्षाने आक्रमक भूमिका घेत निवडणूक लढण्याचा निर्णय घेतला. काँग्रेसकडून (Congress) बारामती पोटनिवडणुकीसाठी आकाश मोरे यांना उमेदवारी देण्यात आली आहे.

बारामतीमध्ये काँग्रेस निवडणूक लढवणार असल्याचे स्पष्ट झाले. निवडणूक बिनविरोध व्हावी यासाठी पवार कुटुंबाकडून आणि महायुतीकडून प्रयत्न सुरु होते. काँग्रेसने उमेदवार देऊ नये यासाठी स्वतः सुनेत्रा पवार यांनी महाराष्ट्र काँग्रेस प्रदेशाध्यक्ष हर्षवर्धन सपकाळ यांना फोन केला होता. अजित पवारांच्या निधनामुळे ही निवडणूक बिनविरोध व्हावी आणि काँग्रेसने उमेदनार देऊ नये अशी विनंती स्वतः सुनेत्रा पवारांनी केली होती. मात्र त्यानंतर देखील दिल्लीतून पत्रक जारी करत अॅड. आकाश मोरे यांना उमेदवारी देण्यात आली आहे.

See more

बारामती (२०१) विधानसभा मतदारसंघासाठी होणाऱ्या पोटनिवडणूकीत कॉंग्रेस पक्षाच्या वतीने ॲड. आकाश विजयराव मोरे यांची उमेदवारी जाहीर करण्यात आली आहे. लडेंगे जितेंगे …!#BaramatiByElection #MaharashtraPolitics pic.twitter.com/lUir2VpQ9r — Maharashtra Congress (@INCMaharashtra) April 5, 2026

हे देखील वाचा : “अजितदादाच ही निवडणूक लढवतायेत असं…; सुनेत्रा काकींसाठी रोहित पवारांची भावनिक साद

कोण आहे आकाश मोरे?

बारामती विधानसभा मतदारसंघासाठी पोटनिवडणुकीमध्ये काँग्रेस उमेदवार म्हणून रिंगणात उतरलेले आकाश मोरे हे पेशाने वकील आहेत. आकाश मोरे हे महाराष्ट्र प्रदेश काँग्रेस कमिटीचे ते सचिव देखील आहेत. आकाश मोरे यांनी बी.ए. एलएलबी हे शिक्षण पूर्ण केले असून गेल्या 15 वर्षांपासून बारामती जिल्हा सत्र न्यायालयामध्ये वकिली करत आहेत. बारामतीमध्ये मोर्टी येथील आश्रम शाळेमध्ये सदस्य म्हणून कार्य करत आहेत. बारामतीमध्ये गरीब आणि गरजू विद्यार्थ्यांसाठी ते वसतिगृह आणि आश्रमशाळा चालवतात.

हे देखील वाचा : शेवटच्या निर्णायक क्षणी सुनेत्रा पवारांचा राजकीय डाव; बारामतीसाठी सुनेत्रा पवारांचा थेट काँग्रेस प्रदेशाध्यांना फोन

आकाश मोरे विधानपरिषदेचे आमदार विजय मोरे यांचे पुत्र आहेत. आकाश मोरे यांनी यापूर्वी विधानसभेमध्ये नशीब आजमवले होते. 2014 साली झालेल्या विधानसभा निवडणुकीमध्ये आकाश मोरे हे निवडणुकीच्या रिंगणात उतरले होते. मोरे कुटुंब हे काँग्रेस पक्षातील निष्ठावंतांपैकी एक म्हणून ओळखले जातात. धनगर समाजाचे प्रतिनिधित्व करत असलेल्या मोरेंना काँग्रेसकडून उमेदवारी देण्यात आली आहे. बारामतीमध्ये धनगर समाज मोठ्या प्रमाणात असल्यामुळे कॉंग्रेसने जातीय समतोल राखण्याचा प्रयत्न केला आहे. मात्र बारामती ही नेहमीच पवारांचा गड म्हणून ओळखली जाते. त्यामुळे सुनेत्रा पवारांसमोर आकाश मोरे हे आव्हान देणार का याकडे सर्वांचे लक्ष लागले आहेत.