abu azmi Bhiwandi municipal
Bhiwandi News : भिवंडी निजामपूर महानगरपालिकेतील स्वीकृत नगरसेवकांच्या निवडीवरून समाजवादी पक्षात मोठा वाद निर्माण झाला आहे. पक्षाचा आदेश डावलून भाजप आमदार महेश चौघुले यांचे समर्थक मानले जाणारे भरत जंगलानी यांच्या नावाला पाठिंबा दिल्याचा आरोप करत समाजवादी पक्षाने सहा नगरसेवकांची हकालपट्टी केली आहे. या कारवाईमुळे महापालिकेतील पक्षांतर्गत मतभेद उघड झाले असून राजकीय वर्तुळात चर्चा सुरू झाली आहे.
समाजवादी पक्षाच्या प्रदेशाध्यक्ष अबू आसिम आजमी यांच्या आदेशानुसार शहराध्यक्ष रियाज आझमी यांनी सहा नगरसेवकांवरील कारवाई जाहीर केली. हकालपट्टी करण्यात आलेल्यांमध्ये गटनेते आरिब याकूब शेख, काशफी शाफ मोमिन, आजीब जमाल मोमिन, अन्सारी शबाना शमीम, शेख सलमाबानो मोहम्मद अक्रम आणि खान अमल उबैद यांचा समावेश आहे.
स्वीकृत नगरसेवकपदासाठी भरत जंगलानी यांच्या नावाची शिफारस केल्याने पक्षनेतृत्व नाराज झाल्याचं सांगितलं जात आहे. पक्षाने दिलेल्या आदेशानुसार निर्णय न घेतल्याचा ठपका या नगरसेवकांवर ठेवण्यात आला आहे. दरम्यान, या कारवाईबाबत संबंधित नगरसेवकांची भूमिका समोर आल्यास वादाचं चित्र आणखी स्पष्ट होऊ शकतं.
भिवंडी महापालिकेच्या विशेष महासभेत नऊ स्वीकृत सदस्यांच्या नियुक्तीची घोषणा महापौर नारायण चौधरी यांनी केली. जाहीर करण्यात आलेल्या नावांमध्ये काँग्रेसकडून इम्रान मोहम्मद एच. अन्सारी, अरफात ए. शेख आणि सलीम अहमद शेख यांचा समावेश आहे. भाजपकडून सुगंधा टावरे आणि रवी सावंत, शिवसेनेकडून संजय काबुकर, राष्ट्रवादी काँग्रेसच्या शरद पवार गटाकडून गिरीश म्हात्रे, समाजवादी पक्षाकडून भरत जंगलानी आणि कोणार्क विकास आघाडीकडून मयूर विलास पाटील यांची नावे जाहीर करण्यात आली.
मात्र, या निवडीवरून काँग्रेसमध्येही नाराजी समोर आली आहे. काँग्रेसचे गटनेते तथा उपमहापौर तारिक मोमीन यांनी सुचवलेल्या नावांना शहराध्यक्ष आबिद खान यांनी विरोध केल्याचं सांगितलं जात आहे. त्यांनी ही नावे मागे घेण्याची लेखी मागणी केल्याची माहिती आहे.
समाजवादी पक्षाचे शहराध्यक्ष रियाज आझमी यांनी भरत जंगलानी यांच्या जागी सरफराज शेख यांची निवड जाहीर करण्याची मागणी आयुक्त अनमोल सागर यांच्याकडे केल्याचंही सांगितलं जात आहे.
एकीकडे समाजवादी पक्षातील सहा नगरसेवकांवरील कारवाई, तर दुसरीकडे काँग्रेसमधील नाराजी, यामुळे स्वीकृत नगरसेवक निवडीचा मुद्दा चांगलाच चर्चेत आला आहे. पक्षाकडून पुढे काय निर्णय घेतला जातो आणि संबंधित नगरसेवकांची भूमिका काय राहते, याकडे आता लक्ष लागलं आहे.
समस्या सुटली नाही तर वाहनांची तोडफोड… कल्याण-शीळ रस्त्यावरील वाहतूक कोंडीवरून मनसे आक्रमक
.png "Videos"){kind=small}
