मुंबईत एकनाथ शिंदेंचा नवा प्लान? सचिन अहिरांकडे संघटनेची धुरा सोपवण्याच्या हालचालींना वेग

मुंबईतील संघटना मजबूत करण्यासाठी एकनाथ शिंदे यांच्या शिवसेनेकडून नव्या हालचाली सुरू झाल्याची चर्चा आहे. सचिन आहिर यांच्या उपस्थितीत शिवसेना नगरसेवकांची बैठक झाल्याने मुंबईची जबाबदारी त्यांच्याकडे सोपवली जाणार का, याबाबत राजकीय वर्तुळात चर्चा रंगली आहे.

• सचिन आहिर यांच्या उपस्थितीत शिवसेना नगरसेवकांची बैठक
• मुंबईच्या संघटनेची जबाबदारी आहिरांकडे देण्याची चर्चा
• १५ ऑगस्टनंतर विधानसभा मतदारसंघनिहाय बैठका घेण्याची तयारी

 

मुंबईच्या राजकारणात आपली संघटनात्मक ताकद वाढवण्यासाठी एकनाथ शिंदे यांच्या शिवसेनेकडून नव्या हालचाली सुरू झाल्याचे चित्र आहे. महापालिका निवडणुकीत अपेक्षित यश मिळाले नसल्याच्या पार्श्वभूमीवर मुंबईतील पक्षसंघटनेत बदल करण्याच्या दृष्टीने पावले उचलली जात असल्याची चर्चा राजकीय वर्तुळात आहे. याच पार्श्वभूमीवर सचिन आहिर यांचे पक्षातील वाढते सक्रिय योगदान लक्षवेधी ठरत आहे.

शिवसेना नगरसेवकांची एक बैठक सचिन आहिर यांच्या उपस्थितीत पार पडली. विधिमंडळातील कार्यालयात झालेल्या या बैठकीत नगरसेवकांच्या प्रभागातील प्रश्न, विकासकामे आणि स्थानिक पातळीवरील अडचणी यावर चर्चा करण्यात आली. शिवसेनेचे सरचिटणीस आणि माजी खासदार राहुल शेवाळे, सचिव संजय मोरे, उपमहापौर संजय घाडी, गटनेते अमेय घोले यांच्यासह पक्षाचे नगरसेवक बैठकीला उपस्थित होते.

सचिन आहिर हे काही काळापूर्वी उद्धव ठाकरे यांच्या नेतृत्वाखालील शिवसेनेतून एकनाथ शिंदे यांच्या शिवसेनेत दाखल झाले. त्यानंतर त्यांच्यावर उपसभापतीपदाची जबाबदारी सोपवण्यात आली. आता मुंबईतील पक्ष संघटना मजबूत करण्यासाठी त्यांना अधिक मोठी जबाबदारी दिली जाणार का, याबाबत राजकीय चर्चांना सुरुवात झाली आहे.

शरद पवार गटाच्या खासदारांची प्रधानमंत्री मोदींसोबत २० मिनिटे चर्चा; अमोल कोल्हेंनी भेटीचा सगळा तपशीलच सांगितला…

यापूर्वी मुंबईतील संघटनात्मक जबाबदारी राहुल शेवाळे यांच्याकडे होती. मात्र, महापालिका निवडणुकीतील कामगिरीचा आढावा घेतल्यानंतर शिंदेसेनेकडून मुंबईसाठी नव्या पद्धतीने संघटनात्मक बांधणी करण्याचा प्रयत्न सुरू असल्याचे मानले जात आहे. आहिर यांच्या बैठकीतील सक्रिय सहभागामुळे या चर्चेला आणखी बळ मिळाले आहे.

दरम्यान, या बैठकीला राजकीय स्वरूप नसल्याचे गटनेते अमेय घोले यांनी स्पष्ट केले. नगरसेवकांच्या विकासकामांशी संबंधित प्रश्नांवर चर्चा करण्यासाठी बैठक आयोजित करण्यात आली होती. १५ ऑगस्टनंतर प्रत्येक विधानसभा मतदारसंघनिहाय शिवसेनेच्या बैठका घेण्यात येणार असल्याची माहितीही त्यांनी दिली.

मराठा आरक्षणावरून जरांगे पुन्हा आक्रमक; ‘सरकार बदनाम करण्याचा प्रयत्न करेल’, भास्कर जाधवांचा गंभीर आरोप

उपमहापौर संजय घाडी यांनीही नगरसेवकांच्या प्रभागातील समस्या समजून घेण्यासाठी सचिन आहिर यांनी चर्चा केल्याचे सांगितले. त्यामुळे ही बैठक नियमित स्वरूपाची असल्याचे पक्षाकडून सांगितले जात असले, तरी मुंबईतील संघटनात्मक समीकरणांमध्ये बदल होणार का, याकडे राजकीय वर्तुळाचे लक्ष लागले आहे. आगामी काळात मुंबईतील पक्ष संघटनेला अधिक सक्रिय करण्यासाठी एकनाथ शिंदे कोणती पावले उचलतात आणि सचिन आहिर यांना नेमकी कोणती जबाबदारी मिळते, हे पाहणे महत्त्वाचे ठरणार आहे.