gunratna sadawarte on raj thackeray
Gunratna Sadavarte : मुख्य निवडणूक आयुक्त ज्ञानेश कुमार यांच्या नेतृत्वाखालील निवडणूक आयोगाच्या कारभारावरून महाराष्ट्रातील राजकीय वातावरण तापले आहे. या मुद्द्यावर महाराष्ट्र नवनिर्माण सेना आणि शिवसेना (उद्धव बाळासाहेब ठाकरे) पक्षाने एकत्रितपणे 4 ऑक्टोबरला मुंबईत जनमोर्चा काढण्याची घोषणा केली आहे. हा मोर्चा ‘SIR’च्या मुद्द्यावरून आयोजित करण्यात येणार असल्याचे राज ठाकरे यांनी जाहीर केले आहे.
या पार्श्वभूमीवर अॅड. गुणरत्न सदावर्ते यांनी राज ठाकरेंवर टीका केली आहे. 4 ऑक्टोबरचा मोर्चा यशस्वी होणार नसल्याचा दावा करत सदावर्तेंनी राज ठाकरेंनी आदित्य ठाकरे यांच्या प्रकरणावरही भूमिका स्पष्ट करावी, अशी मागणी केली. राज ठाकरेंचं ‘पितळ उघडं करणार’, असा इशाराही त्यांनी दिला.
सदावर्ते यांनी राज ठाकरेंच्या आंदोलनाच्या भूमिकेवर प्रश्न उपस्थित केले. ओबीसी, कष्टकरी, वंचित आणि अनुसूचित जातीतील विद्यार्थ्यांनी राज ठाकरेंच्या भूमिकेचा निषेध करावा, असे आवाहन त्यांनी केल्याचे वृत्त आहे.
राज ठाकरे-उद्धव ठाकरे पुन्हा एकत्र! 4 ऑक्टोबरला मुंबईत मोठा जनमोर्चा; SIR विरोधात रणशिंग
राज ठाकरेंचे राजकारण म्हणजे ‘राजकीय दुकानदारी’ असल्याची टीकाही सदावर्तेंनी केली. मुंबई बंद किंवा रस्ते बंद केल्यास सामान्य नागरिकांना त्रास होऊ शकतो, असा मुद्दाही त्यांनी मांडला. आंदोलनाच्या इशाऱ्यांना आपण घाबरणार नसल्याचे सांगत राज ठाकरेंवर आणखी टीका करण्याचे संकेत त्यांनी दिले.
ज्ञानेश कुमार यांच्या मुद्द्यावर राज ठाकरेंनी घेतलेल्या भूमिकेवरही सदावर्तेंनी आक्षेप घेतला. इंटर डिपार्टमेंटल कम्युनिकेशन आणि फाईल नोटिंग म्हणजे न्यायालयीन निर्णय नसल्याचे त्यांनी म्हटले. फाईल नोटिंगच्या आधारे कोणताही हक्क सिद्ध करता येत नाही, असा त्यांचा युक्तिवाद आहे.
दरम्यान, राज ठाकरे आणि उद्धव ठाकरे यांनी 4 ऑक्टोबरच्या मोर्चासाठी सर्व राजकीय पक्षांनी सहभागी व्हावे, असे आवाहन केले आहे. मोर्चाची नेमकी वेळ आणि ठिकाण नंतर जाहीर करण्यात येणार असल्याचे राज ठाकरेंच्या घोषणेत सांगण्यात आले आहे.
सदावर्तेंनी राष्ट्रवादी काँग्रेस (शरदचंद्र पवार) पक्षाच्या नेत्या सुप्रिया सुळे यांच्या शेतकरी आंदोलनावरही टीका केली. शेतकऱ्यांच्या भावनांवर राजकारण करू नये, अशी भूमिका त्यांनी मांडली. ‘गाड्या अडवा, जेलमध्ये जायला तयार’ या प्रकारच्या आंदोलनाच्या आवाहनावरही त्यांनी आक्षेप घेतला.
दरम्यान, महाराष्ट्रातील दुष्काळसदृश परिस्थितीच्या पार्श्वभूमीवर सरकारकडून मदतीच्या उपाययोजनांबाबत निर्णय घेण्याची प्रक्रिया सुरू आहे. शेतमजूर आणि अल्पभूधारक शेतकऱ्यांपर्यंत दुष्काळाची मदत पोहोचावी, तसेच अन्नधान्य आणि रेशनची व्यवस्था करावी, अशी मागणी सदावर्तेंनी केली आहे. राज्य सरकारने दुष्काळ जाहीर केल्याबद्दल त्यांनी अभिनंदन करत दुष्काळग्रस्तांसाठी तातडीने आदेश काढण्याची मागणी केली.
.png "Videos"){kind=small}
