'मेलो तरी चालेल,मी त्यांना...',मनोज जरांगे आक्रमक, चौकशांवरून सरकारवर गंभीर आरोप, म्हणाले-‘रात्र वैऱ्याची आहे, सावध राहा’
“सावध राहा, सतर्क राहा. रात्र वैऱ्याची आहे, ते षडयंत्र रचत आहेत. काम करणाऱ्यांना अडचणीत आणत आहेत. दबावातून चौकश्या सुरु आहेत. त्यामुळे एकजूट राहा. संकटात तोंड देण्याची हिंमत ठेवा, असे सांगत जरांगे यांनी समर्थकांना संकटांचा सामना करण्यासाठी तयार राहण्याचे आवाहन केले. “आपलं कोणी नाही, आपले आपणच आहोत,” अशी भूमिका मांडत समाजाने कोणत्याही परिस्थितीत एकजूट सोडू नये, असेही त्यांनी म्हटले. पण तुम्हाला सांगतो, मेलो तरी चालेल, मी त्यांना शरण जाणार नाही, असा इशाराच मनोज जरांगे पाटील यांनी दिला.
दरम्यान, जरांगे यांनी २० दिवसांचे उपोषण संपवताना राज्य सरकारला मराठा आरक्षणाशी संबंधित मागण्यांवर कार्यवाही करण्यासाठी तीन महिन्यांची मुदत दिली होती. सरकारी शिष्टमंडळाशी झालेल्या चर्चेनंतर त्यांनी उपोषण स्थगित केले होते; मात्र आंदोलन संपलेले नसल्याचे स्पष्ट केले होते. मागण्यांवर अपेक्षित कार्यवाही न झाल्यास आंदोलन पुढे नेण्याची भूमिका त्यांनी मांडली होती.
आता या तीन महिन्यांच्या कालावधीत आपल्याला बदनाम करण्याचे प्रयत्न सुरू असल्याचा आरोप जरांगे यांनी केला आहे. दबाव किंवा चौकशीमुळे आपण भूमिका बदलणार नसल्याचे सांगताना त्यांनी “मेलो तरी चालेल, पण शरण जाणार नाही,” अशी भूमिका मांडली. त्यामुळे मराठा आरक्षणाच्या मुद्द्यावर सरकार आणि जरांगे यांच्यातील संघर्ष पुन्हा चर्चेत आला आहे.
जरांगे यांच्या काही सहकाऱ्यांविरोधात आर्थिक व्यवहार आणि कथित वाळू व्यवसायासंबंधी आरोप करण्यात आले आहेत. त्यांचे माजी सहकारी अजय बारसकर यांनी ईडीकडे तक्रार केल्याचे माहिती समोर आली. हे आरोप बारसकर यांचे असून त्यांची स्वतंत्रपणे चौकशी सुरू आहे. आरोप सिद्ध झाल्याचे समजू नये. जरांगे यांनी मात्र या घडामोडींना आंदोलनातील लोकांवर दबाव आणण्याचा प्रयत्न असल्याचे म्हटले आहे. याआधीही सहकाऱ्यांच्या आयकर चौकशीची माहिती समोर आल्यानंतर त्यांनी सरकारवर टीका केली होती आणि चौकशीला सामोरे जाण्याची तयारी दर्शवली होती. आपल्या प्रकृतीचाही उल्लेख करत जरांगे यांनी मराठा समाजासाठी केलेल्या उपोषणांमुळे शरीरावर गंभीर परिणाम झाल्याचे सांगितले. डॉक्टरांनी प्रकृती अत्यंत गंभीर असल्याचे सांगितले होते. या सर्व परिस्थितीतही मराठा आरक्षणाच्या मागणीवरून माघार घेणार नसल्याची भूमिका त्यांनी पुन्हा अधोरेखित केली.
.png "Videos"){kind=small}
