पार्थ पवारांच्या ‘एंट्री’नंतर राष्ट्रवादीत नवी समीकरणे; झिशान सिद्दीकींवर मुंबईची जबाबदारी?
झिशान सिद्दीकी हे दिवंगत बाबा सिद्दीकी यांचे पुत्र असून त्यांनी २०१९ मध्ये वांद्रे पूर्व मतदारसंघातून काँग्रेसच्या तिकिटावर विधानसभा निवडणूक जिंकली होती. २०२४ मध्ये त्यांनी अजित पवार यांच्या नेतृत्वाखालील राष्ट्रवादी काँग्रेसमध्ये प्रवेश केला. सध्या ते राष्ट्रवादी काँग्रेसचे विधान परिषद सदस्य आहेत; मे २०२६ पासून त्यांचा विधान परिषद कार्यकाळ सुरू झाला आहे.
महाराष्ट्र विधान परिषदेच्या निवडणुकीत राष्ट्रवादी काँग्रेसच्या वाट्याला आलेल्या जागेसाठी अनेक इच्छुकांची नावे चर्चेत होती. मात्र, पक्षाने झिशान सिद्दीकी यांना संधी दिली. त्यानंतर आता थेट मुंबई राष्ट्रवादीच्या अध्यक्षपदाची जबाबदारीही त्यांच्याकडे सोपवली जाणार का, याकडे राजकीय वर्तुळाचे लक्ष लागले आहे.
राष्ट्रवादीच्या नव्या नेतृत्वाच्या काळात पार्थ पवार यांचा पक्षाच्या निर्णय प्रक्रियेत वाढता सहभागही चर्चेचा विषय ठरत आहे. पार्थ आणि त्यांचे बंधू जय पवार यांचा पक्षाच्या अंतर्गत कोअर ग्रुपमध्ये समावेश झाल्याचे यापूर्वी वृत्त आले होते. सुनेत्रा पवार यांनी मात्र त्यावेळी काही नावे समाविष्ट होण्यामागे प्रशासकीय/क्लेरिकल चुकीचा संदर्भ दिला होता. मुंबईसारख्या महत्त्वाच्या राजकीय केंद्राची जबाबदारी कोणाकडे सोपवायची, याचा निर्णय राष्ट्रवादीसाठी आगामी काळात महत्त्वाचा ठरणार आहे. त्यामुळे झिशान सिद्दीकी यांच्या नावावरील चर्चा प्रत्यक्ष निर्णयात बदलते का, हे पाहणे महत्त्वाचे ठरणार आहे.
.png "Videos"){kind=small}
